کارَلِ رسولَل 4

پِطرُس وِ یوحنا در برابر شورِی یهود

1پطرس وِ یوحنا هَنی بِی مردم گَپ ایزَن که کاهِنَل وِ فرمُندۀ ناتورَلِ معبد وِ عِده‌ای وَ فرقۀ صَدوقی‌یَل اومَن طِیشون. 2اونگَل وَ یِکِه رسولَل وَ مردم تعلیم ایدان وِ اعلام ایکِردِن که مِنِه عیسی، زندَه وابی‌یَنِ مُردِه‌یَل هِسی، سخت تَش گِرُتِن. 3پَ اونگَلَه گِرُتِن وِ سی‌یِکِه پَسین بی، تا صَباش مِنِه زِندان نِگَشون کِردِن. 4امّا خیلی وَ اونگَل که پِیومَه اِشنُفتَه بییِن، ایمون آوُردِن وِ عِدۀ مِردَل وَ حدودِ پنج هزار نفر رَسی.

5صَباش، گَپویَلِ قوم وِ شیخَل وِ معلملِ تورات مِنِه اورشلیم دورِ یَک جَم وابی‌یِن. 6مِنِه ای مجلس، حَنّا کاهن اعظم وِ قیافا وِ یوحنایِ کاهن وِ اسکندر وِ تَمومِ اَهلِ‌اَیالِ کِهانت اعظم حضور داشتِن. 7اونگَل پطرس وِ یوحنا نَه نَهان مابِینِشون، وَشون پُرسییِن: «وَ چه قدرت وُ وَ چه نومی ای کارَ کِردیتِه؟»

8اوسِه پطرس وَ روح‌القدس پر وابی، جواب دا: «ای گَپویَلِ قوم وِ ای شیخَل، 9اَر اُمرو وَ خاطرِ خوبی کِردَن وَ حقِ مِردِ علیلی وَ ایما بازخواس ایابو، وِ ایپُرسیت او مِرد چطو شفا جُسِه، 10پَ تَمومِ ایشا وِ تمومِ قومِ اسرائیل بِیونیت که وَ نومِ عیسی مسیحِ ناصری یَه که ای مِرد در برابرِتون ساق‌وُسلامت وِیسایِه، وَ نومِ هَموِه که ایشا کَشی‌ئیتِش وَ صلیب امّا خدا وِّ نَه وَ مُردِه‌یَل زِندَه کِه. 11ای عیسی هَمو "بَردی یَه که ایشا معمارَل رَد کِردیت وِ ایسِه بَردِ اصلیِ بنا وابی‌یِه." 12مِنِه هیشکَه غیرَ وِّ نجات نی، سی‌یِکِه زِرِ آسمون نومی دَ وَ آیَمَل دایَه نَوابی‌یِه تا وَ واسطۀ وِه نجات بِجوریم.»

13وختی جرأتِ پطرس وِ یوحنا نَه دییِن وِ فَمِسِن که آیَمَلِ درس نَخوندَه وِ بیسوادی یَن، حیرت‌زَیَه وابی‌یِن وِ فَمِسِن که اینگَل هَمونگَلی یَن که بِی عیسی بییِنِه. 14امّا سی‌یِکِه او مِردِ شفا گِرُتَه طِی او دِتا وِیسایَه بی، نَتَرِسِن چیئی بِگُن. 15پَ دستور دان که وَ مجلس بِرَن وَدَر وِ خِشون نِشَسِن وَ شُور. 16بِی یَک گُتِن: «بِی ای مِردَل چه کِنیم؟ سی‌یِکِه تَمومِ مردمِ اورشلیم دونِن که معجزۀ آشکاری وَ دَسِشون وابی‌یِه وِ نیتَریم حاشاش کِنیم. 17امّا تا بیشتَرَ یِه چُو نَیُفتایِه مِنِه قوم، بایِس وَ ای مِردَل هشتار بِئیم که دَ بِی احدی وَ ای نوم گَپ نَزَنِن.»

18اوسِه اونگَلَه اُمبِلا صیا کِردِن وُ وَشون حُکم کِردِن که وَتَه وَ نومِ عیسی چیئی نَگُن وِ تعلیمی نَیِن. 19امّا پطرس وِ یوحنا جواب دان: «ایشا خِتون داوری کِنیت، مِنِه نظرِ خدا کویکی دِرِسِه، اطاعت وَ ایشا یا اطاعت وَ خدا؟ 20سی‌یِکِه ایما نیتَریم اوچیئی که دییمِه وِ اِشنُفتیمِه، تعریف نَکِنیم.»

21پَ او دِتا نَه بعدَ یِکِه یِکِلی زَلَشونَه بُردِن وِل کِردِن، سی‌یِکِه رَیی سی مجازاتِشون نَجُسِن، سی‌یِکِه تَمومِ مردم خدا نَه سی اوچیئی که اتّفاق اُفتایَه بی، شکر ایکِردِن. 22سی‌یِکِه او مِردی که بِی معجزَه شفا گِرُتَه بی، بیشتَرَ چل سال داشت.

دِعِی ایموندارَل

23پطرس وِ یوحنا بعدَ آزاد وابی‌یَن، وَرگَشتِن طِی رَفیقَلِشون وِ اوچیئی نَه که کاهنلِ گَپو وِ شیخَل وَشون گُتَه بییِن، تعریف کِردِن. 24اوسِه اونگَل، وختی یِنَه اِشنُفتِن، یِه صیا وَ درگاهِ خدا دعا کِردِن، گُتِن: «ای خداوندِ حاکم وَ تَمومِ کارَل، ای آفرینَندۀ آسمون وِ زمین وِ دریا وِ اوچیئی که مِنِشونِه، 25تِ خُوت وَ واسطۀ روح‌القدس وَ زُوونِ بُو ایما، داوود که خادمِ تِ بی، فرمایش کِردی:

"سیچِه قومَل شورش ایکِنِن

وِ قومَل وَ وِل نَخشَه ایکَشِن؟

26پادِشایَلِ زَمین بِی یَک دَس وَ یکی ایکِنِن وِ هُم‌قطار ایابون؛

وِ فرمانرَوایَل جَم ایابون دورِ یَک،

وَ ضدِ خداوند

وُ وَ ضدِ مسیحِ وُّ."

27وَراسی که مِنِه هَمی شهر، هیرودیس وِ پُنتیوس پیلاتُس بِی غیرِیَهودی‌یَل وِ قومِ اسرائیل وَ ضدِ خادمِ مقدّسِت عیسی که وِّ نَه مسح کِردی، دَس وَ یکی کِردِن، 28تا اوچیئی نَه که دَس وِ ارادۀ تِ نَهاتَر مقدّر کِردَه بی، اَنجوم بییِن. 29ایسِه، ای خداوند، سِیلَ تهدیدَلِشون کُ وِ لطفی کُ وَ خادِمَلِت تا کلامِتَه بِی دلِ جرأتِ بیشتری اعلام کِنِن، 30وِ هَم دَسِ خِتَه وَ شفا دراز کُ وُ وَ نومِ خادمِ مقدّسِت عیسی، نِشونه‌یَل وِ معجزه‌یَلی کُ.»

31بعدَ دعاشون، جِیی که وُچه جَم بییِن، اُفتا وَ دَکِسَن وِ هَمَشون وَ روح‌القدس پِر وابی‌یِن، وِ کلامِ خدا نَه بِی دلِ جرأت اعلام ایکِردِن.

شریک بییَنِ ایموندارَل مِنِه داراییشون

32تَمومِ ایموندارَل یِه‌دل وِ یِه‌جون بییِن وِ هیشکَه چیئی وَ داراییشَه این خُوش نُونِس، بلکم مِنِه هَمَه چی بِی یَک شریک بییِن. 33رسولَل بِی قدرتِ زیادی وَ زندَه وابی‌یَنِ خداوند عیسی شهادت ایدان وِ فیضِ عظیمی وَ ری هَمَشون بی. 34هیشکَه مِلِی اونگَل مُتاج نَبی، سی‌یِکِه هرکه زمین یا حونه‌ای داشت، ایفِرُت وِ پیلِشَه 35اینَها طِی رسولَل تا وَ قَدِ اِتیاجِ هر کس مابینِشون بَهر وابو. 36یوسُف هَم که وَ طِیفِی لاوی وِ اهلِ قبرس بی وِ رسولَل نومِشَه نَهایَه بییِن بَرنابا یعنی «تشویق کنندَه»، 37زمینی که داشت، فِرُت وِ پیلِشَه آوُرد، نَها طِی رسولَل.

Currently Selected:

کارَلِ رسولَل 4: SLB

Highlight

Copy