کارَلِ رسولَل 10

پِطرُس وُ کُرنِلیوس

1مِنِه شهرِ قیصَریَه مِردی بی، وَ نومِ کُرنِلیوس، وَ فَرمُنده‌یَلِ گردانِ رومی معروف وَ «گردانِ ایتالیایی». 2وُّ وِ اَهلِ‌اَیالِش هَمَشون خداپَرَس وِ خداترس بییِن. کُرنِلیوس بِی دَسِ‌دلوازی وَ فقیرَل صَدقَه ایدا وِ همیشَه وَ درگاه خدا دعا ایکِه. 3یِه رو حدودِ ساعت سه بعدَظهر آشکارا مِنِه رؤیا دی که یِه فرشتۀ خدا اومَه طِیش وِ گُت: «ای کُرنِلیوس!»

4کُرنِلیوس هراسون وَش تییَه دُت وِ جواب دا: «بَلِه، خداوند!»

فرشتَه گُت: «دعایَل وِ صَدقه‌یَلِ تو مِی قُربونیِ ذِکر وَ پیشگاهِ خدا رَسییِه. 5ایسِه عِدِه‌ای نَه بِسی کُ وَ شهرِ یافا وِ شمعون معروف وَ پطرسَ بیار وِیچو. 6وِّ مِمونِه وَ طِی دبّاغی وَ نومِ شمعون که حونَش هیبِی دریا یَه.»

7وختی او فرشته‌ای که باش گَپ ایزَه وَ طِیش رَت، کُرنِلیوس دِتا وَ خادِمَلِش وِ یکی وَ سَربازَلی نَه که وَش وَفادار بی، صیا کِه 8وِ تمومِ جریانَه سیشون تعریف کِه وِ اونگَلَه بِسی کِه وَ یافا.

9صَباش، نِزِنگِ ظهر، وختی مِنِه رَه بییِن وُ وَ شهر نِزِنگ ایابییِن، پطرس رَت سَرِ تُو تا دعا کِنِه. 10وُچِه گَسنَش وابی وِ خواس چیئی بِخَرِه. مِنِه هَمو حالی که غذا نَه آمایَه ایکِردِن، پطرس رَت وَ خَلسَه. 11مِنِه او حال دی که آسمون واز وابی‌یِه وِ چیئی مِی سفره‌ای گَپو که وَ چارکُنجِش اُوویزِه، وَ طرفِ زمین ایا دومِن 12وُ پِرِه وَ هَمَه طور چارپایَل وِ خَزندِه‌یَل وِ باهِندِه‌یَل. 13اوسِه صیایی وَش گُت: «ای پطرس، وَری، سَر بویور وِ بِخَه!»

14پطرس گُت: «سَرُم تِراشتَه، خداوندا، سی‌یِکِه وَتَه وَ چیئی حروم یا نجس لُو نَزَمِه.»

15دَفِۀ دوم او صیا وَش گُت: «اوچییَلی که خدا پاک کِردِه، تِ نجس نَیون!»

16یِه سه دَفَه تکرار وابی وِ اوسِه دَرجا سفرَه بالا بُردَه وابی وَ آسمون.

17مِنِه هَمو حال که پطرس بِی حیرت وَ معنیِ ای رؤیا فکر ایکِه، اونگَلی که کُرنِلیوس بِسی کِردَه بی، حونۀ شمعونَه جُسِن، وِ رَسییِن وَ درِ حونَش. 18اونگَل بِی صییِی بلند ایپُرسییِن: «مَه شمعون معروف وَ پطرس وِیچِه مِمونِه؟»

19پطرس هَنی مِنِه فکرِ رؤیا بی که روح‌القدس وَش گُت: «سِی کُ، سه نفر وَ دینِ تِ ایگَردِن. 20وَری وِ بِرَه دومِن وِ مِنِه رَتَنِ باشون دُو وَ شک نَبو، سی‌یِکِه اونگَلَه مِ بِسی کِردِمِه.»

21پطرس رَت دومن وُ وَشون گُت: «مِ هَموِنُم که وَ دینِش ایگَردیت. سیچِه اومِیتِه؟»

22اونگَل گُتِن: «کُرنِلیوسِ فَرمُندَه، ایما نَه بِسی کِردِه. وِّ مِردی صالح وِ خداترسِه وِ یَهودی‌یَل هَمَه وَ خوبی وَش یای ایکِنِن. وُّ وَ طرفِ یِه فرشتۀ مقدّس دستور گِرُت که بِسی کِنِه وَ دینِت وِ تِنَه دعوت کِنِه وَ حونَش، تا گَپَلِتَه بِشنِفِه.» 23پَ پطرس بُردِشون وَ حونه تا مِمونِش بون.

صَباش پطرس وَریسا وِ باشون رُونَه وابی. یِه‌پاره‌ای وَ کَکایَلِ اهلِ یافا هَم باش رَتِن. 24صَبِی او روز رَسییِن وَ شهرِ قیصَریَه. کُرنِلیوس، اَهلِ‌اَیالِش وِ قومِ خیشَل وِ رفیقَلِ نزدیکِشَه هَم جَم کِردَه بی وِ بَندیرِ اومَیَنِشون بی. 25وختی پطرس اومَه مِنِه حونه، کُرنِلیوس جِکِس وَ رَش وِ اُفتا وَ پاش، وِّ نَه پرستش کِه. 26امّا پطرس راسِش کِه وِ گُت: «وَری، مِ هَم یِه آیَمُم.»

27اوسِه پطرس در حالی که باش گَپ ایزَه رَت مِنِه حونَه وِ وُچِه بِی جَمی گَپو ریوَری وابی. 28پطرس وَشون گُت: «ایشا خِتون دونیت که سی یِه یَهودی رَوا نی که بِی کسی وَ یِه ملتِ دَ نِشَسِ بَرخاس کِنِه یا بِرَه وَ حونَش. امّا خدا وَ مِ نشون دایِه که مِ هیشکَه نَه نجس یا ناپاک نَیونُم. 29پَ وختی بِسی کِردیت وَ دینُم، بی چَکِ چونَه اومَم. ایسِه بِگِیت، سیچه مِنَه خواسیت؟»

30کُرنِلیوس جواب دا: «چار رو نَهاتَر مِنِه هَمی موقَع، دورِوَرِ ساعت سه بعدَظهر، مِنِه حونۀ خُوم داشتُم دعا ایکِردُم که یِه دَفَه مِردی مِنِه جومۀ نورانی وِیسا دَمِ ریم 31وِ گُت: "کُرنِلیوس، دعات مستجاب وابی‌یِه وِ صدقه‌یَلِت مِنِه حضورِ خدا قبول وابی‌یِه. 32ایسو عِدِه‌ای نَه بِسی کِ وَ یافا وُ وَ دینِ شمعونِ معروف وَ پطرس بو. وِّ مِمونِه وَ طِی شمعونِ دبّاغ، که حونَش هیبِی دریا یَه." 33پَ دَرجا بِسی کِردُم وَ دینِت وِ تِ هَم لطف کِردی وِ اومِی. ایسِه تَمومِ ایما مِنِه حضورِ خدا حاضریم تا هر چیئی که خداوند وَت فرمایش کِردِه، بِشنِفیم.»

34اوسِه پطرس گَپِشَه ایطو شروع کِه: «ایسِه فَمِسُم که وَراسی خدا مابینِ قومَل فَرخ نینِه؛ 35بلکم وَ هر ملتی، هرکه وَ خدا زَلَش بِرَه وِ هرچی نَه که دِرِسِه انجوم بییِه، موردِ قبولِ وِّ ایابو. 36ایشا وَ پِیومی که خدا سی قومِ اسرائیل بِسی کِه، خَوَر داریت که وَ واسطۀ عیسی مسیح که خداوندِ هَمَه یَه، وَ صلح‌وُسلامتی بشارت دا. 37ایشا خِتون دونیت که ای اَمر چطو بعدَ تعمیدی که یحیی وَش موعظَه ایکِه، مِنِه جلیل شروع وابی وِ رَسی وَ سرتاسرِ یهودیَه، 38وِ چطو خدا، عیسِی ناصری نَه بِی روح‌القدس وِ قدرتِ خُوش مسح کِه، طوری که هَمَه جا ایگَشت وِ کارَل خوب ایکِه وِ تَمومِ اونگَلی نَه که زِرِ جورِ اِبلیس بییِن، شفا ایدا، سی‌یِکِه خدا باش بی.

39«ایما شاهِدَلِ تَمومِ کارَلی یِیم که وِّ مِنِه دیار یهود وِ مِنِه اورشلیم کِه. اونگَل وِّ نَه وَ صلیب کَشییِن وِ کُشتِنِش. 40امّا خدا مِنِه روز سوم زِندَش کِه وِ ظاهرِش کِه، 41امّا نَه وَ هَمَه، بلکم تِنا وَ شاهدلی که خُوش وَ نَهاتَر انتخاب کِردَه بی، یعنی وَ ایما که بعدَ زندَه وابی‌یَنِش وَ مُردِه‌یَل، باش خَردیم وِ نُوشیئیم. 42وِّ وَمون اَمر کِه تا ای حقیقتَه وَ قوم اعلام کِنیم وِ شهادت بِئیم که خدا وِّ نَه نَهایِه تا داورِ زندِه‌یَل وِ مُردِه‌یَل بو. 43تَمومِ پیغمبرَل درموردِ وِّ شهادت اییِن که هرکه وَش ایمون بیارِه، وَ نومِ وِّ گِنایَلِش آمرزییَه ایابو.»

44پطرس هَنی داشت ای چییَلَه ایگُت که روح‌القدس وَ ری تَمومِ اونگَل که پِیومَه ایشنُفتِن، قرار گِرُت. 45یِه‌پاره‌ای وَ ایموندارَلِ یهودی‌نژاد که بِی پطرس اومَیَه بییِن، وختی دییِن عطایِ روح‌القدس حتی وَ ری غیرِیَهودی‌یَل هَم رِتِه، حیرت‌زَیَه وابی‌یِن. 46سی‌یِکِه اِشنُفتِن که اونگَل وَ زُوونَلِ دَ گَپ ایزَنِن وِ خدا نَه حمد وُ ثَنا ایکِردِن. اوسِه پطرس گُت: 47«ایسِه که اینگَل روح‌القدسَه دِرُس مِی ایما جُسِنِه، دَ کی ایتَرِه جِلو تعمیدِشونَه مِنِه اُو بِگِرِه؟» 48پَ پطرس دستور دا اونگَلَه وَ نومِ عیسی مسیح تعمید بییِن. اوسِه وَ پطرس خواسِن سی چَن رو وِیسِه طِیشون.

Currently Selected:

کارَلِ رسولَل 10: SLB

Highlight

Copy