نامۀ دِوُم وَ تیموتائوس 4
4
1مِ دَر برابرِ خدا وِ مسیح عیسی که وَ زِندِهیَل وِ مُردِهیَل داوری ایکِنِه، وُ وَ خاطرِ ظهورِ وُّ وِ پادشائیش، وَت سفارش ایکِنُم که 2کلامِ خدا نَه موعظَه کُ، وَخت وُ بیوَخت آمایَه بو، بِی صبرِ زیاد وِ تعلیمِ کامل، اِصلا وِ توبیخ وِ تشویق کُ. 3سییِکِه زَمونی ایایِه که مردُم طاقتِ اِشنُفتَنِ تعلیمِ دِرِسَه نَیارِن، بَلکَم معلِمَلِ زیادی دورِ خِشون جَم ایکِنِن تا اوچیئی نَه که گوشَلِشون ایخوا وِ بِی هوی وُهَوَسَلِشون جور ایدَرا، وَشون بِشنِفِن؛ 4وُ وَ گوش دایَن وَ حقیقَت ریشونَه اییَرگَردَنِن، وِ ری ایکِنِن وَ طَرفِ مَتَلَلِ خیالی. 5امّا تِ مِنِه هَمَه چی وَ هوش بو؛ عذابَلَه طاقت بیار؛ کارِ اعلامِ انجیلَه بِکُ وِ خذمتِ خِتَه تمام وُ کمال وَ آخِر بِرَسون.
6سییِکِه خینِ مو، هَمیسِه، مِی پیشکِشیِ شراب، دَرحالِ رِتَنِه وِ زَمونِ رَتَنُم وَ ای دنیا رَسییِه. 7مِ جنگِ خوبَه کِردِمِه، وِ دورِ خِمَه وَ آخِر رَسُندِمِه وِ ایمونِمَه نِگَه کِردِمِه. 8وَ یِه واپَس تاجِ صالحی سیم آمادَه یَه، تاجی که خداوند، او داورِ عادل، مِنِه او روز وَم عطا ایکِنِه، نَه تِنا وَ مو، بَلکَم وَ تَمومِ اونگَل که مِنِه شوقِ ظهورِ وِّ بییِنِه.
سفارِشَلِ آخِر
9تلاش کُ تا هَرچه زیتَر بییِی طِیم. 10سییِکِه «دیماس» وَ خاطرِ عشقِ ای دنیا مِنَه وِل کِردِه وِ رَتِه وَ تسالونیکی. «کریسکیس» رَتِه وَ غَلاطیَه وِ «تیتوس» هَم رَتِه وَ دَلماتیَه. 11تِنا لوقا بِی مِنِه. مَرقُسَ وَگِه وِ بِی خُوت بیار، سییِکِه وِّ مِنِه خِذمَتُم مَهلی وَ کارِم ایا. 12«تیخیکوسَ» بِسی کِردُم وَ اَفِسُس. 13موقِی اومَیَنِت، قَبایی نَه که مِنِه ترُوآس طِی «کارپوس» وَجا نَهام بِی خُوت بیار، وِ کِتابَل وِ مخصوصاً طومارَلَه هَم بیار.
14«اسکندرِ مِسگر»، مَهلی وَم بَدی کِه. خداوند سِزِی کارَلِشَه اییِه. 15تِ هَم وَش دیری کُ، سییِکِه بِی پِیومِ ایما سخت ضِدیَت ایکِنِه.
16مِنِه اَوَلین دفاعُم، هیشکَه پُشتُم نَوِیسا، بَلکَم هَمَه مِنَه وِل کِردِن. نَکِنِه یِه وَ حسابِشون نَهایَه وابو. 17امّا خداوند بام وِیسا وِ وَم قویَت بَخشی تا او پِیوم وَ واسطۀ مو وَ تَمومی اعلام وابو وِ تَمومِ غیریَهودییَل وِه نَه بِشنِفِن. وُ مِ وَ کَپِ شیر نجات گِرُتُم. 18خداوند مِنَه وَ هَر کارِ گَندی نجات اییِه وُ مِنَه وَ سلامت وَ پادشاییِ آسمونیِ خِش ایارِه. جلال وَ وِّ بو تا ابدالآباد. آمین.
سلامَلِ آخِر
19سلامِ مِنَه وَ «پریسکیلا» وِ «آکیلا» وِ اَهلِاَیالِ «اونیسیفوروس» بِرَسون. 20«اِراستوس» وِیسا مِنِه قُرَنتُس، وِ مو «تروفیموسَ» که مریض بی جا نَهام مِنِه میلیتوس. 21تلاش کُ تا نِهِی زِمِسون بییِی وِیچو. «یوبولوس»، «پودِنس»، «لینوس»، «کلودیا» وِ تَمومِ کَکایَل وَت سلام ایرَسونِن.
22خداوند بِی روحِ تِ بو. فیضِ خدا بِی تِ بو.
Currently Selected:
نامۀ دِوُم وَ تیموتائوس 4: SLB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
