نامۀ اَوَل وَ تیموتائوس 6
6
1تَمومِ اونگَلی که زِرِ جیِ بَندِهای یَن، بایِس اربابَلِ خِشونَه تمام وُ کمال قابلِ حُرمت نَهایَن بِیونِن، تا وَ ضِدِ نومِ خدا وِ تعلیمِ ایما چی گَندی گُتَه نَوابو. 2اونگَل که اربابَلِشون ایموندارِن، نَبایِس وَ خاطرِ کَکا بییَنِشون، اونگَلَه بیحُرمت کِنِن؛ بَلکَم بایِس بِختَر خِذمَتِشون کِنِن، سییِکِه اونگَلی که وَ ای خذمتِ خوب نفع ایبَرِن، ایموندار وِ عزیزِن. ای چییَلَه وَشون تعلیم بییِه وُ وَ اَنجوم دایَنِش تشویقِشون کُ.
عاقبتِ پیلدوسی
3اَر کَسی طوری دَ تعلیم بییِه وِ گَپَلِ دِرِسِ خداوند ایما عیسی مسیح نَه وِ تعلیمِی که وَ ری دینداری یَه قبول نَیاشتَه بو، 4وِّ غُد وابییِه وِ هیچ نیفَهمِه. ایطو آیَمی حِرص ایزَنِه سی جَرِبحث وِ مِرافَه وَ سَرِ کلمهیَل، که باعثِ حَسودی، مِرافَه، فاشگویی وِ بَدگَمونی ایابو 5وِ باعثِ جنگِ جِدالِ هَمیشهای مابینِ آیَمَلی ایابو که فکرِشون فاسدِه وُ وَ حقیقت بینَصیبِن، گَمون ایکِنِن دینداری وسیلهای یَه سی سود بُردَن.
6امّا دینداری بِی قناعت، سودِ گَپویی یَه. 7سییِکِه ایما چیئی وَ ای دنیا نَآوُردیمِه، وِ نیتَریم چیئی هَم وَش بویَریم. 8اَر خَردَنی وِ پوشییَنی داریم، قانع ایابِیم. 9امّا اونگَل که اُرزو پیلدار بییَن دارِن، اییُفتِن مِنِه وسوسَه، مِنِه تَلۀ خواسِهیَلی که بیخودِن و ضَرَر ایزَنِن، که مردمَه ایکَشِه وَ نابودی وِ هلاکت. 10سییِکِه پیلدوسی ریشۀ هَمَه طور گَندی یَه. سی هَمی حِرصِ پیلِه که، یِهپارهای وَ رَه ایمون وِل وابییِنِه وِ خِشونَه گرفتارِ دَردَلِ زیادی کِردِنِه.
سفارش پولُس وَ تیموتائوس
11امّا تِ ای مِردِ خدا، وَ تَمومِ اینگَل بِدَرَه، وُ وَ دینِ صالحی، دینداری، ایمون، محبت، پاوَرجایی وِ ملایمت بو. 12مِنِه جنگِ خوبِ ایمون بِجَنگ. بِچَسب وَ او حیاتِ ابدی که سیش خُوندَه وابییِه وِ دَر برابرِ شاهِدَلِ زیاد، وَش اعتراف کِردی. 13وَ طِی خِدِیی که وَ تَمومِ چییَل زِندِیی ایبَخشِه، وِ مِنِه حضورِ مسیح عیسی که مِنِه شهادَتِش طِی پُنتیوس پیلاتُس اعترافِ خوب کِه، وَت سخت سفارِش ایکِنُم، 14که ای حُکمَه تا زَمونِ ظهورِ خداوَندمون عیسی مسیح، بیعیب وِ بیمَزِمَت نِگَه کِنی، 15که خدا وِه نَه مِنِه وَختِ دِرِسِش اَنجوم اییِه، وِّ که مبارکِه وِ حاکمِ یکتا، شاهِ شاهَل وِ خداوندِ خداوَندَلِه. 16وِّ که تِنا وجودِ ابدی یَه، وِّ که مِنِه نوری منزل دارِه که نیابو وَش نِزِنگ وابی، وِ هیشکَه وَتَه نَدییِشِه وِ نیتَرِه بِوینِش. حُرمت وِ سلطنت تا وَ اَبد این وِّ بو. آمین.
17وَ دارایَلِ ای دورَه حُکم کُ که غُد نَبون وُ وَ مالِ ای دنیا که وَ بِین ایرَه، امید نَبَندِن. بَلکَم امیدِشون وَ خدایی بو که هَمَه چی نَه وَ فَراوونی سی ایما آمایَه ایکِنِه تا وَشون کِیف کِنیم. 18وَشون یای بییِه که خوبی کِنِن، مِنِه کارَلِ خوب، دارا بون، دَسِدِلواز وِ بَخشَندَه بون. 19وَ ای تَرتیب، گَنجی سی خِشون ذَخیرَه ایکِنِن که پییِی خوبی سی آیندَشونِه، تا بِچَسبِن وَ اوچیئی که حیاتِ واقعی یَه.
20ای تیموتائوس، ناتورِ او اَمونَتی بو که وَ دَس تِ دایَه وابییِه. وَ گَپَلِ پیکِ دنیایی وِ عَقیدهیَلِ مخالِفی که وَ غَلط، شناخت خُوندَه ایابو، دیری کُ؛ 21سییِکِه یِهپارهای که مِنِه ای چییَل ادِعاشون ایابی، وَ ایمون وِل وابییِنِه.
فیض بِی تِ بو.
Currently Selected:
نامۀ اَوَل وَ تیموتائوس 6: SLB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
