نامۀ اَوَل وَ تیموتائوس 4
4
یِهپارهای وَ ایمون ریشونَه اییَرگَردَنِن
1امّا روحِ خدا، آشکارا ایگُ که مِنِه زَمونَلِ آخِر، یِهپارهای بِی وَقف کِردَنِ خِشون وَ روحَلِ گولزَنَک وِ تَعلیمَلِ دیوَل، وَ ایمون اییَرگَردِن، 2وَ خاطرِ ریاکاریِ دِروکِنَل، که وجدانِشون سُتِه وِ انگار داغی نَهانِه ری وجدانِشون. 3اونگَل ازدواجَه منع ایکِنِن وُ وَ پَریز وَ خَردَنییَلی حُکم اییِن، که خدا آفرییِه تا اونگَلی که وَ حقیقت ایمون دارِن وِ وَش آگایَن، بِی شکر کِردن وَشون بِخَرِن. 4سییِکِه هر چیئی که خدا آفرییِه، خوبه، وِ هیچ چی رَد نیابو، اَر بِی شکر کِردن قبول وابییِه، 5سییِکِه بِی کلامِ خدا وِ دعا تقدیس ایابو.
6اَر ای چییَلَه وَ کَکایَل یای بِیی، خادمِ خوبِ مسیح عیسی ایابِی، تربیت وابییَه مِنِه او کلامِ ایمون وِ تعلیمی خوب که وَ دینِش بییِی. 7بِی مَتَلَلِ خیالیِ گند وِ پیک کاری نَیاشتَه بو، بَلکَم خِتَه سی دینداری تربیت کُ؛ 8سییِکِه هَرچَن تربیتِ بَیَن یِچِی فِیدَه دارِه، امّا دینداری سی هَمَه چی فِیدَه دارِه، سییِکِه هَم زِندِیی ایسِه نَه وعدَه اییِه، هَم حیاتِ آیندَه نَه.
9ایابو وَ ای گَپ اِطمینون کِه وُ وَ هر بابت وَ تَمومی قبولِش کِه. 10سییِکِه سی هَمیِه زحمت ایکَشیم وِ تلاش ایکِنیم، سییِکِه ایما امیدِ خِمونَه نِهِیمِه وَ ری خِدِی زِندَه، که نجات دهندۀ تَمومِ آیَمَلِه، مخصوصاً اونگَلی که ایمون دارِن.
11ای چییَلَه حُکم کُ وِ تعلیم بییِه. 12نَل هیشکَه تِنَه وَ خاطرِ جَوونیت خوار کِنِه، بَلکَم مِنِه گفتار، مِنِه کردار، مِنِه محبت، مِنِه ایمون، مِنِه پاکی، سی ایموندارَل سَرمشق بو. 13تا موقِی اومَیَنُم، خِتَه وَقفِ یِه کُ تا کلامِ خدا نَه سی مردم بِخونی وِ تشویقِشون کِنی وِ تعلیمِشون بِئی. 14وَ او عَطِی روحانی که مِنِه تِنِه، بی اعتنایی مَکُ، عطایی که وَ واسطۀ نَبوَت جُسی، اوسِه که شُورِی شیخَل دَس نَهان وَ ریت.
15ای چییَلَه وَجا بیار، وِ خِتَه وَقفِ اونگَل کُ، تا پیشرفتِت وَ هَمَه آشکار وابو. 16خوب حَواسِت بو وَ خُوت وِ تعلیمی که ایئی. مِنِه یِه پاوَرجا بو، سییِکِه بِی ای کار هَم خِتَه وِ هَم اونگَلی نَه که وَت گوش اییِن نجات ایئی.
Currently Selected:
نامۀ اَوَل وَ تیموتائوس 4: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
