وَحی 13
13
جونوَر وحشِنِ اوّل
1مِ موکَوا ما اُمدی یَک جونوَر وحشی از تِک دریا دَر اُندا. مِ جونوَر وحشِنا ده تا شاخ و هفتا سِرَ اُشهاد، و ده تا تاج لِی شاخیاش هاد؛ و لِی هر سِرَش هم اسم کفرآمیزی نوشتَه بُستاد. 2مِ جونوَر وحشِنا که اُمدی چُنِ پلنگ هاد؛ پَییاش چُنِ پَئِی خرس و کَپُش چُنِ کَپ شیر هاد. اَژدَها کُدرتُش و تختُش و یَک اِکتدار گاتی شُ آنا دَ. 3یکی از سِرَئِی مِ جونوَر وحشِنا، اُنگار که یَک زخم کُشَندَهای اُشهاد، ولی زخم کُشَندَش بِه آبُستاد. و هَمَهِ زِمی هُشکشو اُشزادِستاد و اَزدُم مِ جونوَر وحشِنا اَچِدِت. 4آدامیا اُ اَژدَها پرستش شُکِه، اَسِی که آنا اِکتدارُش شُ مِ جونوَر وحشِنا دَدِستاد. و آنایا مِ جونوَر وحشِنا پرستش شُکِه و شواَگُت: «کِی که چُنِ اِ جونوَر وحشِنا بِه؟ کِی که اُشبِشابِه وَ ضد آنا جنگ بِکو؟»
5اُ مِ جونوَر وحشِنا کَپی دَدَ بو تا وَ تکبّر حرف بِزاد و کفر بِگِه، و اُ آنا اجازَه دَدَ بو که اَسِی چهل و دو ماه از اِکتدارُش استفادَه بِکو. 6آنا کَپُش واز شاکِه اَسِی کفر گُتَه اُ خدا و کفر گُتَه اُ اسم آنا و اُ مِ جَی که شُ تِک زندگی اَکو، یعنی اُ آنایاکِه تِی آسِمو زندگی اَکنِت. 7هَمینا اُ آنا اجازَه دَدَ بو که اُمرَهِ ایموندارِی اُ مسیح بِجَنگِه و اُ آنایا پیروز بِبِه؛ و اُ آنا اِکتدار دَدَ بو که اُ هر طایفَه، هر کوم، هر زابو و هر ملتی حُکمرانی بِکو. 8هَمَهِ آنایایی که لِی زِمی زندگی اَکنِت مِ جونوَر وحشِنا اَپَرستِت، یعنی هَمَهِ مِ کسِی که کَبل از شروع دنیا اسمشو تِی مِ دفتر زندگِنا نوشتَه نِبُدِ که مال مِ بَرَّهوائِه که کُربونی بو.
9آناکِه گاش اُشَه بِشناوِ:
10اَگَه کَرارِ کسی اَسیر بِبِه،
اُ اَسیری اَچِه.
اَگَه کَرارِ کسی وَ شمشیر کُشتَه بِبِه،
باید وَ شمشیر کُشتَه بِبِه.
اِ پایداری و ایمون ایموندارِی اُ مسیحا شَئِه.
جونوَر وحشِنِ دوّم
11مِ موکَوا ما یَک جونوَر وحشِنِیدو اُمدی که از زِمی دَر اُندا. مِ جونوَر وحشِنا چُنِ یَک بَرَّه دوتا شاخ اُشهاد و چُنِ یَک اَژدَها حرف شَزاد. 12آنا تَموم اِکتدار مِ جونوَر وحشِنِ اوّلا وَ جَی آنا استفادَه شَکِه و اُ زِمی و اُ آنایایی که شُ تِک زندگی شواَکِه مجبور شَکِه تَ جونوَر وحشِنِ اوّلا که زخم کُشَندَش بِه آبُدِستادا بِپَرَستِت. 13جونوَر وحشِنِ دوّم نِشونَه و معجزهئِی گاتی اَنجوم شَدَ، حتی کَری شَکِه که جلووِ چَش مردم تَش از آسِمو اُ لِی زِمی بِبَرِئی. 14خاد مِ نِشونَه و معجزهئِی که اجازَه اُشهاد وَ جَی مِ جونوَر وحشِنِ اوّلی اَنجوم هادَ، اُ آنایایی که لِی زِمی زندگی شواَکِه گول اُشزاد و شُ آنایا گُت که، از جونوَر وحشِنی که وَ شمشیر زخمی بُدِ ولی هَنو زندَئِه یَک بُتی نَک بِکنِت. 15اُ آنا اجازَه دَدَ بو تا اُ بُت مِ جونوَر وحشِنا نَفَس هادَ، تا بُت جونوَر وحشی حتی اُشبِشابِه حرف بِزاد، و کسِی که بُت جونوَر وحشِنا پرستش شُناکِه، شُن کُشتَه هادَ. 16هَمینا هم، اُ هَمَه، از کینگِلِه و گَپ، فخیر و پولدار، آزاد و غُلوم مجبور اُشکِه تا لِی دست راستشو یا لِی پِشانیشو نِشونَه هُنِسِت. 17تا هِسکَه اُشنِشابِه بِخِلِه یا بِفرِشِه، مَ اِکِه مِ نِشونَهوا اُشبِه که مِ نِشونَهوا، یا اسم مِ جونوَر وحشِنا هاد یا شماره اسمُش هاد. 18اِ حکمت شَئِه: هرکَه که فَهم اُشَه بِهِر تَ شماره مِ جونوَر وحشِنا حساب بِکو، اَسِی که آنا، شماره یَک انسانِه. و شمارَش ششصد و شصت و ششه.
Currently Selected:
وَحی 13: LAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
