نامَه یعکوب 2
2
گناه فرق نَدَ
1کاکَئِی ما، شما که اُ سرورمو عیسی مسیح، خداوند جلال ایمون تُهَه، بین مردم فرق مَنِسی. 2اَسِی که اَگَه کسی وَ انگشتر طِلا و جُمَهِ گِرو اُ مجلس شما بیاد و یَک فخیری هم وَ جُمَهِ کاهنَه جا بیاد، 3و اَگَه شما اُ آناکِه جُمَهِ گِرو شُبارِ بِشتَه توجه بِکنی و اُ آنا بِگائی: «بِفرما اِکا بَرا هُنی،» ولی اُ مِ فخیرا بِگائی: «هَم مِکا وَایست!» و یا: «اِکا حَدِ پَئِی ما لِی زِمی هُنی،» 4مَ اینا شما بین خوتو فرق تُنِنَدِ و خاد فکرِی شریر کضاوت تُنِکِردِ؟
5کاکَئِی عزیز ما، گاش کَر بِکنی! مَ خدا اُ فخیرِی اِ دُنیَهوا انتخاب اُشنِکِردِ تا تِی ایمون ثروتمند بِت و مِ پادشاهِنا اُ ارث بِبرِت، مِ پادشاهِنی که خدا اُ کسِی که خاطرُش شُئِه وعدَه اُشدَدِ؟ 6ولی شما اُ آدام فخیر بی حرمتی تُکِردِ. مَ هَمِ ثروتمندیا نِهِت که اُ شما ظلم اَکنِت و تُن دادگاه اَکَشِت؟ 7مَ اِیا نِهِت که اُ مِ اسما که حرمت اُشَه و لِی شما نَدَ بُدِ، کفر اَگائِت؟
8اَگَه شما حکیکتاً مِ شریعت شاهانَهوا طِبک نوشتَه مکدّس اُ جا بیاری که اَگِه: «خاطر هُمسادَت چُنِ خوت اُتبِئِه،» کَرِ خَش اَکنی. 9ولی اَگَه بین مردم فرق هُنِسی، گناه اَکنی و شریعت، اُ شما مقصّر اَدو و محکوم تواَکو. 10اَسِی که هرکَه هَمَهِ شریعتا اَنجوم هادَ ولی تِی یَک مورد خطا بِکو، مِ آداما مقصّر اِئِه که هَمَهِ شریعتا شُ زِر پا نَدِ. 11اَسِی که مِ خدایی که اُشگُت: «زِنا مَکو،» هَمینا هم اُشگُت: «کَتل مَکو.» اَگَه زِنا نِکنِش، ولی کَتل بِکنِش، شریعتا تُ زِر پا نَدِ.
12پَ چُنِ کسِی حرف بِزنی و رفتار بِکنی که طِبک شریعت آزادی، اُ آنایا حُکم اَبِه 13اَسِی که اُ مِ آدامی که شُ هِسکَه رحم نِکِردِ، وَ بی رحمی حُکم اَبِه. رحم کِردَ اُ حُکم کِردَ پیروزِه!
ایمون بدون عمل مُردَئِه
14کاکَئِی ما، چه فایدَهای اُشَه اَگَه کسی بِگِه ایمون اُشَه، ولی عمل اُشنِبِه؟ مَ اینا ایمونی شَشابِه اُ آنا نجات هادَ؟ 15اَگَه کاکَ یا دادَئی جُمَه اَسِی بار کِردَ اُشنِبِه و محتاج خوراک روزانَه بِه 16و یکی از شما اُ آنایا بِگِه: «اُچی وَ سلامت، گرم و سیر آبی،» بدون اِکِه چِییَی که اَسِی بَدنشو نیاز شُهَه شُهادَ، چه فایدَهای اُشَه؟ 17هَمینا هم ایمون وَ تنهایی اَگَه عمل اُشنِبِه، یَک ایمون مُردَئِه.
18ولی یکی اَگِه: «تو ایمون اُتَه و ما هم عمل اُمَ!» تو ایمونُت بدون عملُت اُ ما نِشو هادِ و ما هم ایمونُم وَ عملُم اُ تو نِشو اَتام. 19تو ایمون اُتَه که خدا یکیه. خوب اَکنِش! حتی دیویا هم اینا ایمونی شُهَه و از تِرس اَلَرزِت!
20اَی نادون، تَئِه بِدانِش اَسِی چه ایمون بدون عمل بی فایدَئِه؟ 21مَ جَد اَما ابراهیم پیغامبر، مِ موکَوا که اُ پُسُش اِسحاک لِی کُربونگاه تَکدیم اُشکِه، خاد عمل، صالح اُ حساب نِمَ؟ 22اَبِنِش که ایمون خاد عملُش کَر شَکِه و، ایمون خاد عملُش کامل بو. 23و مِ نوشتَهای که تِی توراتِه اَنجوم بو که اَگِه: «ابراهیم اُ خدا ایمون شَئو و اِ اَسِی آنا صالحی اُ حساب اُمَ،» و اُ آنا رَفیک خدا گُتَه بو. 24اَبِنی که آدام وَ عمل، صالح اُ حساب اَدا، نِه فَکَط وَ ایمون تنها.
25هَمینا هم مَ راحابِ بَدکارَه نِهاد که وَ عمل، صالح اُ حساب اُمَ، مِ موکَوا که شُ کاصدیا جا دَ و اُ آنایا از رَهِیدو اُشفِرِستَ؟ 26اَسِی که هَموناکِه جسم بدون روح مُردَئِه، ایمون هم بدون عمل مُردَئِه.
Currently Selected:
نامَه یعکوب 2: LAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
