نامَه یعکوب 1
1
1از یعکوب، غُلوم خدا و خداوند عیسی مسیح،
اُ دوازده طایفَه اسرائیل که تِک دنیا پَخشِت.
سلام!
امتحان کِردَهِ ایمون
2اَی کاکَئِی ما، هر وَخت وَ امتحانِی مَ رَکَمی روبَرو اَبی، اِئا خارامِنِ گاتی بِدانی! 3اَسِی که اَدانی که امتحان بُدَئِه ایمونتو، باعث پایداری و تحمل اَبِه. 4بِهِری پایداری و تحمل، کَرُش کامل اَنجوم هادَ تا شما بالغ و کامل بی و چِی کام تُنِبِه. 5اَگَه از شما کسی محتاج حِکمتِه، از خدا اُشبِئِه و اُ آنا دَدَ اَبِه. از مِ خدایی که وَ دست و دلوازی و بدون سرزنش، اُ هَمَه اَدَ. 6ولی مِ آداما وَ ایمون اُشبِئِه و هیچ شَکی اُشنِبِه، اَسِی که کسی که شَک اُشَه، چُنِ موج دریائِه که باد آنا شَبَه و شُ اِراو و آنرُو اَبی. 7اینا آدامی نباید فکر بِکو که از خداوند چِی اَگِرِ، 8آنا یَک آدام دو دِلیه و تِی هیچیَک از رفتاریاش ثُبات اُشنی.
9کاکَی که فخیرِه باید اُ سربلندِنِ خوش تِی حضور خدا افتخار بِکو، 10و کاکَی ثروتمند اُ اُفتادَگیش، اَسِی که آنا چُنِ گُل صَحرو از بین اَچِه. 11اَسِی که خورشید وَ آفتُووِ غَلَشُش دَر اَدا، و عَلافا هُشک اَدَکو؛ گُلُش اَبَرِئی و جوهُنیش از بین اَچِه، هَمینا هم آدام ثروتمند وسط کَر و کاسبیش، از بین اَچِه.
12خوش وَ حال آدامی که تِی امتحانیا پایداری و تحمل اَکو، اَسِی که وَختی از امتحانیا سربلند دَر بیاد، مِ تاج حیاتا اَگِرِ. مِ تاجی که خدا اُ کسِی که خاطرُش شُئِه وعدَه اُشدَدِ.
13هِسکَه وَختی وسوسه اَبِه، نِگِه: «خدائِه که اُ ما وسوسه اَکو،» اَسِی که خدا اُشناشابِه وَ هیچ بَدِنی وسوسه بِبِه، و خوش هم اُ کسی وسوسه ناکو. 14ولی موکَهای که کسی وسوسه اَبِه، هوی و هَوس خوشِه که گول شَزاد و شُ دام اَبی. 15پَ وَختی هوی و هَوس حاملَه بِبِه، گناه اُ دنیا دارِ و گناه هم وَختی حسابی گات بِبِه، مرگ اُ بار اَدارِ.
16کاکَئِی عزیز ما، گول مَخری! 17هر هَدیَه خوب و هر هَدیَه کامل از بَرائِه، از طرف بای نوریا اَدا. مِ بایی که تِی آنا نِه تغییری هَه و نِه هیچ سایَهای که وَخاطر تغییر بِه. 18آنا طِبک اِرادَهِ خوش اُ اَما وَ کلوم حکیکت شُ وجود اَئو تا چُنِ ثَمَرَهِ اوّل آفریدَئِی آنا بِم.
شُنُفتَ و اَنجوم دَدَهِ کلوم خدا
19کاکَئِی عزیز ما، اِئا بِدانی: هر کسی تِی شُنُفتَ تُند، تِی گُتَه آروم و تِی خشم هم آروم بِه! 20اَسِی که خشم آدامی مِ صالحِنی که خدا شَئِه اُ بار نِدارِ. 21پَ مَ رَکَم فاسِدِنی و هر اثری که از شرارتِه اُ لَرد نِسی و وَ اُفتادَگی، کلومی که تِک دلتو کِشتَه بُدِ کَبول بِکنی، مِ کلومی که شَشابِه جونتو نجات هادَ.
22ولی اَنجوم دَهندَهئِی کلوم خدا بی، نِه فَکَط شَنوندَهِی آنا، که اُ خوشو گول اَزنِت! 23اَسِی که مِ آدامی که کلوم خدائا اَشناوِ و اُ مِ کلوما عمل ناکو، چُنِ کَسیه که تِی آینَه چَشِ لوش اَکو 24اَسِی که آنا چَش خوش اَکو و اَچِه، و جِخُو شُزیاد اَچِه شَکلُش چینا هاد. 25ولی آناکِه اُ شریعت کامل که شریعت آزادیِه چَش اَکو، و اُ آنا عمل اَکو، شَنوندَهای نی که شُزیاد اَچِه، بلکه اَنجوم دَهندَهِ آنائِه. آنا تِی کَری که اَکو برکت اَگِرِ.
26اَگَه کسی گَمون اَکو دیندارِه ولی جلووِ زابوش ناگِرِ بلکه اُ دلُش گول اَزاد، دیندارِنِ مِ آداما کِراماند اُشنی. 27دیندارِنِ پاک و بدون لُشی که تِک نظر خدای بائِه، اِئِه که: اُ یتیمیا و بِوَهزِنیا موکَهِ مصیبتشو کمک بِکنِم، و اُ خومو از فاسِدِنِ اِ دُنیَهوا حفظ بِکنِم.
Currently Selected:
نامَه یعکوب 1: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
