نامَه عِبرانِنیا 8
8
گَپترین کاهِن یَک عهد بِهتَه
1اَلَه اصل مطلب چِی که اَگائِم اِئِه: اَما اینا گَپترین کاهِنی مُهَه که اُ دست راست تختِ مَکام عظمت تِک آسِمو اُدائی، 2و یَک خادمِه تِی جَئِی مکدّس، یعنی تِی مِ چادر حکیکِنا که خداوند اُشزادِ، نِه انسان. 3اَسِی که هر گَپترین کاهِن معین اَبِه تا هَدیَهیّا و کُربونِنیا تَکدیم بِکو. پَ، اَسِی اِ کاهِنا هم لازمِه که چِی اَسِی تَکدیم کِردَ اُشبِه. 4اَلَه اَگَه آنا لِی زِمی هاد، اصلاً کاهِن نابو، اَسِی که کاهِنِی دِگَه هِت که طِبک شریعت هَدیَهئِی تَکدیم اَکنِت. 5آنایا یَک نَمونَه و سایَهای از چِییَی آسِمونیا خدمت اَکنِت. اَسِی که وَختی موسی پیغامبر شَئِست مِ چادرا بِزاد، خدا شُ آنا فَرمو دَ و اُشگُت: «حَواسُت بِه که مَچیا طِبک اُلگویی که تِی کاو اُ تو نِشو دَدَ بو نَک بِکنِش.» 6ولی خدمتی که مسیح شُ دست اَئوردِ، بُری بَراتَ از خدمت کَدیمیه، اَسِی که آنا واسطَهِ یَک عهد بُری بِهتَئِه، عهدی که لِی وعدَهئِی خَشتَه بَنا بُدِ.
7اَسِی که اَگَه مِ عهد اوّلا بدون نقص هاد، نیاز نِهاد اَزدُم عهد دوّم بِم. 8اَسِی که خدا تِک آنایا عیب اَدَجُرِه و اَگِه:
«خداوند اَگِه، بِبِنی، رازِی اَرَسِه
که ما خاد کوم اسرائیل و کوم یهودا
یَک عهد جدیدی اَدَبانام.
9نِه چُنِ عهدی که خاد بابَیّاشو اُمبَست،
تِی مِ رازا که دست آنایا اُمگِرِت
تا از سرزمین مصر شُندَر بیارام.
خداوند اَگِه، اَسِی که آنایا تِی عهد ما وفادار آنِمودِت،
پَ ما از آنایا لو ماگَردِنَه.
10خداوند اَگِه:
اَسِی که اِئِه، عهدی که بعد از آن رازیا
خاد کوم اسرائیل اَدَبانام.
ما حُکمِی خوم تِی فکریاشو اَنِسام
و لِی دلیاشو اَنِوِسام
و ما خدای آنایا اَبام،
و آنایا کوم ما اَبِت.
11هِسکَه اُ هُمسادَش یاد نادَ
و کسی اُ کاکَی خوش ناگِه،
”اُ خداوند بِشناس!“
اَسِی که آنایا هَمَه، از کینگِلِه و گَپ، اُ ما اَشناسِت،
12اَسِی که مُکابِل خطائیاشو رحم اَکنام
و گناهیاشو دِگَه اُ یاد نِدارام.»
13خداوند وَ حرف زادَ از یَک عهد ’جدید‘، مِ عهد اوّلا از اعتبار اَبی؛ مِ چِی که از اعتبار اَفتِه و کاهنَه اَدَبِه، آمادَهِ از بین چِدَئِه.
Currently Selected:
نامَه عِبرانِنیا 8: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
