نامَه عِبرانِنیا 3

عیسی از موسی سَرتَئِه

1پَ، اَی کاکَئِی مکدّس، اَی شما که تِی دعوت آسِمونی شریک هی، فکرتو لِی عیسی بِه، که آنائِه رسول و گَپترین کاهِن که اُ آنا ایمون مُهَه و اُ آنا اعتراف اَکنِم. 2مِ عیسایی که اُ کسی که اُ آنا معین اُشکِه وفادار هاد، هَموناکِه موسی پیغامبر هم تِی تَموم خونَهِ خدا وفادار هاد. 3اَسِی که عیسی بِشتَه از موسی لایِک جلال اُ حساب اُندِ، مِکَّد که حرمت کسی که خونَه نَک اَکو از خونَه خوش بِشتَئِه. 4اَسِی که هر خونَه‌ای یَک بَنّا اُشَه، ولی بَنّای مَچی خدائِه. 5اَلَه موسی تِی مَکام خادم تِی تَموم خونَهِ خدا وفادار هاد، تا اُ مِ چِی‌یَی که باید بعداً گُتَه اَبو، شهادت هادَ. 6ولی مسیح تِی مَکام پُس، وَر سِرِ خونَهِ خدا، وفادارِه. اَما خونَهِ آنا هِم اَگَه واکعاً اَما اعتماد و افتخارمو تِی امیدمو مُحکام نِگَه بِکنِم.

7پَ هَموناکِه روح کدّوس خدا اَگِه:

«اِراز، اَگَه صداش اَشناوی،

8دلتو سنگ آمَکنی،

هَموناکِه تِی مِ شورشا،

تِی مِ راز امتحانا تِک بیابو تُکِه،

9جَی که بابَیّاتو اُ ما امتحان شُکِه،

و چهل سال آزگار کَریام شُدی.

10و خاطر هَمِ از مِ نَسلا تَریخ هادام

و اُمگُت: ”آنایا همیشَه تِی دِلشو از رَه اُدَر اَچِت، آنایا رَهِی مائا شُنِشناسِدِ؛“

11پَ تِی خشم خوم کَسام ماخَه که

آنایا اُ جَی آسایش ما جا ناچِت.»

12اَی کاکَیّا، حَواستو بِه نِکو کسی از بینتو دل شرور و بی‌ایمون اُشبِه، که شمائا از رَهِ خدای زندَه تُن دَر کو. 13بلکه هر راز اُ یَکُدو تشویک بِکنی تا زَمونی که اُ آنا گُتَه اَبِه ’اِراز‘، تا دل هیچ یَکتو وَ فریب گناه، آ سنگ نِبِه. 14اَسِی که اَما تِی مسیح شریک بُستِم، اَگَه واکعاً مِ خاطر جَمعِنی که از اوّل مُهاد تا آخر مُحکام نِگَه بِکنِم. 15هَموناکِه تِی کتاب زَبور گُتَه بو:

«اِراز، اَگَه صداش اَشناوی،

دلتو سنگ آمَکنی،

هَموناکِه تِی مِ شورشا تُکِه،

16اَسِی که آنایاکِه شُشُفُت ولی دَفَیدو هم شورش شُکِه، چه کسِی هادِت؟ مَ هَمَه، مِ کسِی نِهادِت که موسی از مصر شُ دَر اَئوردِت؟ 17و از چه کسِی چهل سال تَریخ هاد؟ مَ نِه از مِ کسِی که گناه شُکِه، هم آنایایی که جَسدیاشو تِی بیابو اُفتَه؟ 18و دربارَهِ چه کسِی کَسام شاخَه که اُ جَی آسایش آنا جا ناچِت؟ مَ نِه دربارَهِ آنایاکِه نافَرمُنی شُکِه؟ 19پَ اَما دِدائِم که وَخاطر بی‌ایمونی هاد که شُنِشابو جا اُچِت.

Currently Selected:

نامَه عِبرانِنیا 3: LAB

Highlight

Copy