نامَه غلاطِنیا 5
5
مسیح اُ اَما آزاد اُشکِردِ
1اَسِی آزادی هاد که مسیح آزاد اُشکِردِستِم. پَ پابَرجا وَایستی و دَفَیدو اُ خوتو گرفتار جووئِه بَردگی مَکنی.
2بِبِنی؛ ما پولُس، اُ شما اَگام که اَگَه سُنَّت بِبی، مسیح هیچ سودی اَسِی شما اُشنی. 3ما یَک دَفَیدو اُ هرکَه که سُنَّت بِبِه شهادت اَتام که وظیفَه اُشَه تَموم شریعتا نِگَه بِکو. 4شما که سعی اَکنی اُ وسیلَه شریعت صالح اُ حساب بِلگی، شما از مسیح جدا بُدِستی و از فیض دور اُفتَدِستی. 5اَسِی که اُ واسطَهِ روح خدا و اُ وسیلَه ایمونِه، که اَما خومو وَ شوک و ذوک چَش انتظار مِ صالح بُدَئی هِم که اُ آنا امید مُهَه. 6اَسِی که تِی مسیحْ عیسی نِه سُنَّت بُدَ مُهمِه نِه سُنَّت نِبُدَ، بلکه فَکَط مِ ایمونی که اُ واسطَهِ محبت کَر اَکو مُهمِه.
7وَلم تُن خیز اَکِه. کِه جلوتو اُشگِرِت تا از حکیکت اطاعت نِکنی؟ 8اِکِه شما اینا مُجاب بُستی، از طرف آناکِه اُ شما دعوت اَکو، نی. 9«هیلَهوای خِمیرمایَه، باعث اَبِه کُل خِمیر بیاد.» 10ما تِی خداوند خاطرُم جَمعِه، که شما عکیدَیدو کَبول ناکنی. و آناکِه فکرتو اُیَه اَلِزِه سزاش اَگِرِ، هرکَه شَئِه بِه. 11ولی اَی کاکَیّا، اَگَه ما هَنو سُنَّت بُدَهئا تعلیم اَتام، پَ چرا هَنو آزار و اذیت اَبِنام؟ اَگَه اونا هاد، دِگَه کسی از پیغوم صلیب دِلخور نابو. 12گاشکَه آنایاکِه تُن یَه اَلِزِت، اُ خوشو کُلاً از مردی شواَبِست!
13اَسِی که اَی کاکَیّا، شما اُ آزادی دعوت بُدِستی. فَکَط آزادیتو یَک فرصتی اَسِی جسم مَکنی، بلکه اُ واسطَهِ محبت، اُ یَکُدو خدمت بِکنی. 14اَسِی که تَموم شریعت تِی یَک حُکم اُ اَنجوم اَرَسِه، اِکِه «خاطر هُمسادَت چُنِ خوت اُتبِئِه.» 15ولی اَگَه اُ یَکُدو اَخواستی و اُ زیر اَتی، حَواستو بِه که وَ دست یَکُدو نابود نِبی.
خاد روح خدا رفتار بِکنِم
16ولی ما اَگام خاد روح خدا رفتار بِکنی، مِ موکَوا خواستَهئِی جسما اَنجوم ناتی. 17اَسِی که خواستَهئِی جسم وَ ضد روح خدائِه و خواستَهئِی روح خدا، وَ ضد جسمِه؛ اَسِی که اِ دوتا وَ ضد یَکُدو هِت، تَ جلوتو از مِ کَرِی که تُئِه اَنجوم هاتی بِگِرِ. 18ولی اَگَه وَ روح خدا هدایت اَبی، شما زِرِ شریعت نِهی.
19اَلَه کَرِی جسم معلومه: بیعفتی، ناپاکی، هَوسبازی، 20بُتپرستی، جُودَهای، دشمنی، جَر و جِنجال، حسودی، تَریخی، جاهطلبی، اختلاف، جدایی، 21حسادَت، مَستی، عیاشی و اینا چِییَی. هَموناکِه کَبلتَه هشدار اُمدَدی، اُ شما هشدار اَتام اَگام که آنایایی که اینا کَرِی اَنجوم اَتِت پادشاهِنِ خدائا اُ ارث نابرِت.
22ولی ثَمَرَهِ روح خدا، محبت، خارامی، صلح و سلامتی، صبوری، مهربونی، خوبی، وفاداری، 23آرومی و خودداریه. هیچ شریعتی وَ ضد اینا چِییا نی. 24آنایایی که مال مسیحْ عیسی هِت، جسما خاد هوی و هَوسیاش و خواستَهیّاش شُن صلیب کَشِدِ. 25اَگَه اُ وسیلَه روح خدا زندگی اَکنِم، بِلگی وَ روح خدا هم رفتار بِکنِم. 26بِلگی مغرور نِبِم و اُ یَکُدو تَریخ نِکنِم و حسود یَکُدو نِبِم.
Currently Selected:
نامَه غلاطِنیا 5: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
