نامَه دوّم پِطرُس 3
3
رازِ خداوند
1اَی عزیزیا، اَلَه اِ نامَه دوّمِه که تُنسِه اَنِوِسام. هر دوتا نامَهوا وَ نیّت یادآوری اُمنِوِشت تَ اُ شما اَسِی یَک فکر پاک تحریک بِکنام، 2تَ اُ یاد بیاری پیشگوئِنِی پیغامبرِی مکدّسا و هَمینا هم حُکم خداوند و نجاتدَهندَهوا که اُ واسطَهِ حوارِنیاتو دَدَ بو.
3کَبل از هر چی، اِئا بِدانی که تِی رازِی آخر، کسِی که رِشخاند اَکنِت دِئِت که اَزدُمبالَهِ خواستَهئِی گناه آلود خوشو هِت و هَمیناکِه رِشخاند اَکنِت 4اَگائِت: «پَ کُئِه وعدَه اُندَهِ آنا؟ اَسِی که از زَمونی که بابَیّامو اُ خاوِ مرگ چِدِت، مَچی هَمونائِه که از شروع خلکت هاد.» 5اَسِی که آنایا وَ عمد چَششو لِی اِ حکیکتا اَدَبانِت، که آسِمونیا از بُری کَبلتَه بُستِت، و زِمی از هُو و اُ وسیلَه هُو شِکل اُشگِرِت، اُ واسطَهِ کلوم خدا، 6و اُ وسیلَه هَمِ هاوا، مِ دنیایی که مِ زَمونا هاد، اُ زِرِ هُو چو و از بین چو. 7ولی وَ مِ کلوما، آسِمونیا و زِمِنی که آلَه هَه، اَسِی تَش ذخیره اَبِت، و تا رازِ داوری و هلاکَت بیدینیا، نِگَه اَبِت.
8ولی عزیزیا، چَش لِی اِ حکیکتا آمَبانی، که حَدِ خداوند یَک راز چُنِ هزار ساله و هزار سال چُنِ یَک راز. 9برخلاف گَمون مُشتی، خداوند تِی اَنجوم وعدَهاش وَرگار آناکو، بلکه نسبت اُ شما صبورِه، و اُشنائِه که کسی هلاک بِبِه، بلکه شَئِه هَمَه توبَه بِکنِت.
10ولی رازِ آگِشتَئِه خداوند عیسی چُنِ دُز اَدا و مِ موکَوا آسِمونیا وَ غُرِشت ترسناکی از بین اَچِت و اَجسام آسِمونی تَش اَگِرِت و اَزیَه اَپاشِت، و زِمی و کَرِی که شُ لو اَنجوم بُدِ، آشکار اَبِه.
11اَلَه که هَمَهِ اِ چِییَهوا اینا اَزیَه اَپاشِت، شما باید چینا مردمی بی؟ شما باید یَک زندگِنِ مکدّس و دینداری تُبِه، 12و چَش انتظار اُندَهِ رازِ خدا بی و اونا زندگی بِکنی که مِ رازا زودتَه بِرَسِه، مِ رازا باعث اَبِه که آسِمونیا تَش بِگِرِت و اَزیَه بِپاشِت و اَجسام آسِمونی هَمیناکِه سُتات، آ هُو بِبِت. 13ولی اَما طِبک وعدَه آنا، منتظر آسِمونِی جدید و یَک زِمِن جدید هِم که هر چِی که تِی چَش خدا وَلمِه، تِک آنایا آمودِ.
حرفِی آخر
14پَ اَی عزیزیا، اَلَه که چَش انتظار اِ چِییَهوا هی، بُری سعی بِکنی که تِی حضور آنا بیلَکَه و بیعیب و تِی صلح و سلامتی بی. 15و صبر خداوندموئا نجات اُ حساب بیاری، هَموناکِه کاکَی عزیزمو پولُس هم، طِبک حکمتی که اُ آنا دَدَ بُدِ اَسِی شما اُشنِوِشتِه. 16آنا تِی هَمَهِ نامَهیّاش هر وَخت که از اِ چِییَهوا حرف اَزاد، اینا اَنِوِسِه. چِییَی تِی نامَهیّاش هَه، که فَهمِدَش سختِه، که آدامِی نادون و سُست، والونَه شَدَکنِت، هَموناکِه خاد بَکیَه نوشتَهئِی مکدّس هم اَکنِت و اِ باعث هلاکَتشو اَبِه.
17پَ شما اَی عزیزیا، اَلَه که اِ چِییَهوا وَ جلو اَدانی، حَواستو بِه که وَ خطای مردم شریر از رَه اُدَر نِچی و پایداری و تحملتو از دست نِتی. 18بلکه تِی فیض و شناخت خداوندمو و نجاتدَهندَمو عیسی مسیح رشد بِکنی، اَسِی آنا از آلَه تا اَبَدالآباد شکوه و جلال بِه. آمین.
Currently Selected:
نامَه دوّم پِطرُس 3: LAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
