نامَه دوّم قُرِنتِنیا 9
9
جمع آکِردَهِ هَدیَه اَسِی مسیحنِی شهر اورشلیم
1اَلَه نیازی نی دربارَهِ اِ خدمتِ ایموندارِی اُ مسیح تُنسِه بِنوسام، 2اَسِی که اَدانام که شوک و ذوک تُهَه و اَسِی هَمِ هم حَدِ مردم منطکَهِ مقدونیَه اُ شما افتخار اَکنام. مُ آنایا گُتِه که شما از پارسال تِی منطکَهِ اَخائیَه اَسِی هَدیَه دَدَ آمادَه هادی. غیرتتو باعث بُدِ که بُری از آنایا هم اِ کَرا بِکنِت. 3ولی اُ اِ کاکَیّا اَفرِستام تَ ثابت بِبِه که افتخار اَما اُ شما دربارَهِ اِ مسئلَهوا اَلَکی نِبُدِ، تَ هَموناکِه مُ آنایا گُتِه آمادَه بِبی. 4وَ اِلّا، اَگَه چند نفر از مردم مقدونیَه مُمرَه بِلگِت و بِفَهمِت که آمادَه نِهی، اَما وَخاطر مِ اطمینانی که مُن شما بُدِ چاد سرافکندَه اَبِم. دِگَه از اِکِه شما خوتو چاد سرافکندَه اَبی هیچ چی ناگام. 5پَ اُمدی لازمِه که از کاکَیّا خواهش بِکنام زودتَه تُنحَد بِلگِت و هَدیَهئِی که وعدَه تُدَدِستاد، وَ جلو آمادَه بِکنِت. تَ اینایی اِ هَدیَهوا، هَدیَهای بِه که نِه وَ زور، بلکه وَ میل خوتو تُدَدِ.
وَ خارامی هَدیَه دَدَ
6حرف سِرِ اِئِه: هرکَه کام بِکَرِ، کام هم جورُم اَکو، و هرکَه فَراوون بِکَرِ، وَ فَراوونی هم جورُم اَکو. 7هرکَه باید مِکَّدَ هادَ که تِی دلُش تصمیم اُشگِرِتِه، نِه وَ بی میلی یا وَ زور، اَسِی که خدا خاطر آدامی که وَ خارامی هَدیَه اَدَ شَئِه. 8خدا شَشابِه هر نعمتیا تُنسِه فَراوون بِکو تَ همیشَه تِی مَچی اَسِی هَمَهِ نیازیاتو بَس بِه و اَسِی اَنجوم هر کَرِ خَش، وَ فَراوونی تُبِه. 9هَموناکِه تِی کتاب زَبور نوشتَه بُدِ:
«وَ دست و دلوازی تکسیم اُشکِردِ، شُ نیازمندیا دَدِ،
صالحِنِ آنا تا اَبَد اَدَمانِه.»
10خدا که بَذرا اَسِی کشاورز و نُنا اَسِی خَردَ آمادَه اَدَکو، بَذرتو اَسِی کِشتَه آمادَه و فَراوون اَکو و محصول صالحِنِ شما هم بُری اَکو. 11شما از هر نظر ثروتمند اَبی تَ تِی مَچی دست و دلواز بی، و اِ دست و دلوازِنا اُ واسطَهِ اَما اُ شکرگذارِنِ خدا اَرَسِه.
12اَسِی که اَنجوم اِ خدمتا، نِه فَکَط نیازِی ایموندارِی اُ مسیحا رفع اَکو، بلکه باعث اَبِه که عدَهِ زیادی خدائا بی حَد و اندازَه شکر بِکنِت. 13زِرِ امتحان اِ خدمتا، مردم وَخاطر اطاعت شما، خدائا حمد و ستایش اَکنِت، مِ اطاعتی که از اعتراف شما اُ انجیل مسیح اَدا، و هَمینا هم وَخاطر مِ دست و دلوازِنیه که موکَهِ کمک کِردَ اُ آنایا و اُ هَمَه تُهَه. 14آنایا وَخاطر فیض بُری عظیم خدا که لِی شمائِه، اَسِی شما اشتیاک شُهَه و تُنسِه دعا اَکنِت. 15خدائا شکر وَخاطر مِ هَدیَهاُش که وَ هیچ کلمَهای نابِه وصفُش بِکنِش!
Currently Selected:
نامَه دوّم قُرِنتِنیا 9: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
