نامَه دوّم قُرِنتِنیا 10
10
دفاع پولُس از خدمتُش
1ما، پولُس، که و گُفتَئِه مُشتیتو، وَختی روبَروتو هام بَزَهرَه هام، ولی وَختی از شما دورام دِلِرز هام، وَ اُفتادَگی و آرومِنِ مسیح، وَ اصرار از شما مَئِه، 2و التماستو اَکنام که وَختی تُنحَد اُندام مجبور نِبام وَ دِلِرزی، تِی لوی مُشتی آدام وَایستام. یَک مُشتی که گَمون اَکنِت اَما وَ فکر انسانی زندگی اَکنِم. 3اَسِی که با اِکِه اَما تِی جسم زندگی اَکنِم، ولی خاد فکرِی انسانی ناجَنگم. 4اَسِی که اسلحَهئِی جنگ اَما جسمانی نِهِت، بلکه اسلحَهیّامو کُدرت الهی شُهَه تا اُ کَلعَهیّا نابود بِکنِت. 5اَما هر بحثیا و هر عکیدَه پُر ادعایی که وَ ضد شناخت خدائِه نابود اَکنِم و هر فکریا اَسِی اطاعت از مسیح اَسیر اَکنِم. 6موکَهای که از مسیح کامل فَرمو بِبری، اَما آمادَه هِم، که اُ هر نافَرمُنِنی مجازات بِکنِم.
7اُ مِ چِی که جلووِ چَشیاتوئِه توجه بِکنی. اَگَه کسی مطمئنِه که مال مسیحِه، بِهِر مِ آداما اُ یاد بیارِ که هَموناکِه آنا مال مسیحِه اَما هم مال مسیح هِم. 8اَسِی که حتی اَگَه هیلَی بِشتَه از اندازَه اُ اِکتدارمو افتخار بِکنام خَجالَت زادَ نابام. مِ اِکتداری که خداوند اَسِی بَنای شما اُشدَ نِه اَسِی نابودیتو. 9اُمنائِه اینا اُ نظر بیاد که وَ نامَهیّام زَهرَتو بُردام، 10اَسِی که مُشتی اَگائِت: «نامَهیّاش کَوی و ساگیه، ولی وَختی مُنحَدِ، ضعیفِه و حرف زادَش دو کِرنی نااَرزِه.» 11بِهِر اینا کسی بِفَهمِه موکَهای که آنکا نِهِم مِ چِی که تِی نامَهیّامو اَگائِم، وَختی که آنکا هِم، اَنجومُش اَتِم.
12اَما جرأت ناکنِم که اُ خومو خاد یَک مُشت از آدامِی که از خوشو تعریف اَکنِت یکی بِکنِم یا اُ خومو خاد آنایا مکایسَه بِکنِم. ولی وَختی آنایا اُ خوشو خاد یَکُدو اَسَنجِت و اُ خوشو خاد یَکُدو مکایسَه اَکنِت، نادونِت. 13ولی اَما بِشتَه از اندازَه افتخار ناکنِم، بلکه فَکَط تا حَدّ و حدودی که خدا اَسِی اَما معین اُشکِردِ افتخار اَکنِم، مِ حَدّی که حتی تا شما هم اَرَسِه. 14اَسِی که اَما پا از حَدّ خومو جلوتَه نانِسِم، اوناکِه اُنگار تُنحَد نِندِستِسبِم. اَسِی که اَما اوّلین کسِی هادِم که انجیل مسیحا مُن شما رَسِنَه. 15اَما بِشتَه از اندازَه اُ مِ کَری که بَکیَه زحمتُش شُکَشِدِ افتخار ناکنِم، بلکه امید مُهَه که هَموناکِه ایمونتو بُری بُدا، حَدّ و حدود خدمت اَما هم بینتو بُری زیاد بِبِه. 16تَ مُبِشابِه انجیلا تِی سرزمینِی که آنراوِ شما هِت اعلام بِکنِم. اَسِی که مُنائِه اُ کَری که هَمِ آلَه هم، تِی حَدّ و حدود یِکِیدو اَنجوم بُدِ، افتخار بِکنِم. 17«بِهِر کسی که افتخار اَکو، اُ خداوند افتخار بِکو.» 18اَسِی که آناکِه از خوش تعریف اَکو مِ نی که کَبول اَبِه، بلکه مِ کسی کَبول اَبِه که خداوند تعریفُش اَکو.
Currently Selected:
نامَه دوّم قُرِنتِنیا 10: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
