نامَه اوّل تیموتائوس 3
3
ناظریا و شَمّاسِی کلیسا
1اَبِه اُ اِ حرفا اطمینان بِکنِش: اَگَه کسی آرزوی اِئا اُشَه که ناظر کلیسا بِبِه، آنا اَسِی وظیفَه بُری خَشی شوک و ذوک اُشَه. 2پَ یَک ناظر باید تِی زندگیش چِی اُشنِبِه که وَخاطرُش سَرکوفت اُشبِزنِت، شوی یَک زن بِه، هوشیار، خوددار، آبرومند و مِهموننواز بِه و اُشبِشابِه تعلیم هادَ؛ 3عَرَک خور نِبِه، زورگو نِبِه، بلکه آدام آرومی بِه؛ اَزدُم جَر و مُرافِعَه نِبِه و پولدوست نِبِه. 4آنا باید وَ وَلمی اُ اهل خونَش اِدارَه بِکو و اُ بَچ و بارُش اونا تربیت بِکو، که وَ یَک سنگین رنگِنِنِ کامل از آنا اطاعت بِکنِت. 5اَسِی که اَگَه کسی نِدانِه چینا اُ اهل خونَش اِدارَه بِکو، چینا مواظب کلیسای خدا اَبِه؟ 6ناظر کلیسا نباید نو ایمون بِه، نِکو یَک وَخت مغرور بِبِه و تِی مِ محکومیتی بِفتِه که ابلیس اُفتَه. 7علاوَه بَر اِ، آنا باید بین آدامِی بی ایمون خوشنوم بِه، تَ تِی رسوایی و تِی تَلَه ابلیس نِفتِه.
8هَمینا هم شَمّاسیا، باید سنگین رنگین بِت؛ نِه دو رو، نباید اَسیر شراب آخَردَ بِت، و نباید طَمَع منفعتیا شُبِه که از رَهِ نِ وَلم اُ دست اَدا. 9آنایا باید سِررِ ایمونا وَ یَک وجدان پاک نِگَه بِکنِت. 10بِهِری آنایا هم اوّل امتحان بِبِت، مِ موکَوا اَگَه اُ خوشو ثابت شُکِه که بیعیب هِت، بِهِری آنایا وَ عنوان شَمّاسیا خدمت بِکنِت. 11هَمینا هم زِنیاشو باید سنگین رنگین بِت، نِه اِکِه تهمت بِزنِت، بله هوشیار و تِی مَچی وفادار بِت. 12هر یَک از شَمّاسیا باید شوی یَک زن بِه و اُ بَچ و باریاش و اُ اهل خونَش وَ وَلمی اِدارَه بِکو. 13اَسِی که آنایایی که وَ عنوان شَمّاسیا، وَلم خدمت اَکنِت، اَسِی خوشو جایگاه خَشی اُ دست دارِت و هَمینا هم اُ ایمونی که تِی مسیحْ عیسائِه، اطمینان گاتی اُ دست دارِت.
14امید اُمَ که وَزودی تُحَد بِلگام، ولی اِ چِییَهوا تُسِه اَنِوِسام تا، 15اَگَه وَرگار ماکِه، بِدانِش که یَک آدام بین اهل خونَهِ خدا چینا باید رفتار بِکو، بین اهل خونَهِ خدا که کلیسای خدای زندَئِه، و ستون و شالدَه حکیکتِه. 16اَما اُ زابو دارِم که سِررِ دینداری واکعاً گاتِه:
آنا تِی جسم ظاهر بو،
اُ واسطَهِ روح خدا بَر حَک بُدَش ثابت بو،
فرشتَهیّا اُ آنا شُدی،
بین ملتیا اعلام بو،
تِی دنیا اُ آنا ایمون شُئو،
و تِی شکوه و جلال، اُ بَرا بُردَ بو.
Currently Selected:
نامَه اوّل تیموتائوس 3: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
