نامَه اوّل تِسالونیکِنیا 4
4
زندگِنِ خداپَسندانَه
1پَ آخر کَر، اَی کاکَیّا، اَما تِی خداوند عیسی از شما مُئِه و خواهش اَکنِم، که هَموناکِه از طرف اَما اُ شما رَسی، که چینا باید رفتار بِکنی و خدائا خشنود بِکنی، درست هَموناکِه اَنجوم دَدای، اِئا بِشتَه و بِشتَه اَنجوم هاتی. 2اَسِی که شما اَدانی از طریق خداوند عیسی، چه فَرمُنِی مُن شما دَ.
3اَسِی که اِئِه خواستَهِ خدا، یعنی مکدّس بُدَتو: که اُ خوتو از بیعفتی دور بِکنی. 4تا هر یَکتو بِدو که چینا تِی مکدّس بُدَ و تِی حرمت، اختیارِنِ بَدن خوش اُشبِه. 5نِه تِی هوی و هَوس شَهوت، چُنِ غیریهودِنِی که خدائا ناشناسِت. 6و تا هِسکَه تِی اِ کَضیَهوا در حَک کاکَشو خطا و دست درازی نِکو. اَسِی که خداوند انتکام هَمَهِ اِ چِییَهوا اَگِرِ، هَموناکِه کَبلتَه هم مُن شما گُت و وَ جدیّت هشدار مُدَدی. 7اَسِی که خدا اُ ناپاکی دعوت اُشنِکِردِستِم، بلکه اُ مکدّس بُدَ دعوت اُشکِردِ. 8پَ هرکَه اِئا رَد بِکو، آداما رَد ناکو، بلکه خدائا رَد اَکو. مِ خدایی که روح کدّوس خوش اُ شما اَدَ.
9اَلَه دربارَهِ محبت کاکَ بِراسِئی، شما نیازی تُنی که کسی تُنسِه بِنوسِه، اَسِی که شما خوتو از خدا تُن یاد گِرِتِه که خاطر یَکُدو تُبِئِه، 10و واکعاً هم که تِی کُل منطکَهِ مقدونیَه خاطر هَمَهِ کاکَیّا تُئِه. ولی اَی کاکَیّا، اَما از شما خواهش اَکنِم که اِئا بِشتَه و بِشتَه اَنجوم هاتی.
11و آرزوی اِئا تُبِه که زندگِنِ آرومی تُبِه، و سِرَتو تِی کَرِ خوتو بِه، و خاد دستیاتو کَر بِکنی، هَموناکِه اَما مُن شما فَرمو دَ. 12تا جلووِ آدامِی بیایمون وَ وَلمی رفتار بِکنی و محتاج هِسکَه نِبی.
اُندَهِ خداوندْ عیسی
13ولی اَی کاکَیّا، اَما مُنائِه از حال ایموندارِی که مُردِستِت، بیخبر بی، تا نِکو چُنِ بَکیَه مردم که امیدی شُنی، غمگین بی. 14اَسِی که از مِکاکِه اَما ایمون مُهَه که عیسی مُرد و دَفَیدو زندَه آبو، پَ هَمونا هم، اُ واسطَهِ عیسی، خدا مِ ایموندارِی که مُردِستِت، اُمرَهِ آنا اَدارِ. 15اَسِی که اَما اِئا اُ واسطَهِ کلوم خداوند خوش تُنسِه اعلام اَکنِم، که اَما که زندَه هِم و تا آگِشتَئِه خداوند اَدَمانِم، از مِ ایموندارِی که مُردِستِت جلو نازنِم. 16اَسِی که خداوند، خوش، خاد فَرمُنی که وَ کال بلندِه، خاد صدای رئیس فرشتَهیّا، و خاد صدای شیپور خدا، از آسِمو زیر اَدا. مِ موکَوا اوّل، مِ ایموندارِی اُ مسیح که مُردِستِت، زندَه اَدَبِت. 17پَ اَما که زندَه هِم و آمودِستِم! خاد آنایا اُمرَییَه، تِی اَبریا بَرا بُردَ اَبِم، تا خداوندا تِی هوا بِبِنِم، و اینایی اَسِی همیشَه خاد خداوند اَدَمانِم. 18پَ وَ اِ حرفیَهوا اُ یَکُدو دلگرم آکنی.
Currently Selected:
نامَه اوّل تِسالونیکِنیا 4: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
