نامَه اوّل یوحَنا 2
2
1اَی بَچیام، اِ چِییَهوا اَسِی شما اَنِوِسام تَ گناه نِکنی. ولی اَگَه کسی گناهی اُشکِه، حَدِ بای آسِمونی یکی مُهَه که از اَما دفاع اَکو، یعنی عیسی مسیحِ صالح. 2عیسی مِ کُربونِنیه که اُ واسطَهِ آنا گناهیامو بَخشِدَ اَبِه، نِه فَکَط گناهِی اَما، بلکه گناهِی کُل دنیا هم.
3و از اِ اَدانِم که اُ آنا مُشناسِدِ، اَگَه حُکمیاش اَنجوم هاتِم. 4کسی که اَگِه «اُ آنا اَشناسام»، ولی حُکمیاش اَنجوم نادَ، دروغگوئِه و حکیکت تِی آنا نی. 5ولی کسی که کلوم آنا اَنجوم اَدَ، محبت خدا واکعاً تِی آنا کامل بُدِ. از اِکا ماشابِه بِفَهمِم که تِی آنا هِم: 6هرکَه اَگِه تِی آنا آمودِ، باید هَمونا رفتار بِکو که آنا رفتار اُشکِه.
7اَی عزیزیا، حُکم تازَهای تُنسِه نانِوِسام، بلکه حُکم کَدیمِنی که از هَمِ اوّل تُبُدِ. اِ حُکم کَدیمِنا، مِ کلومیه که تُشُنُفتِ. 8ولی با اِ حالا، اِ یَک حُکم تازَهایه که تُنسِه اَنِوِسام که حکیکت اِ حُکما تِی آنا و تِی شما آشکارِه. اَسِی که تاریکی رَد بُدا و نور حکیکی هَمِ آلَه هم دِرَخشِدا.
9هرکَه اَگِه تِک نورِه ولی نَخچ کاکَشو اُشنِبِه، هَنو تِی تاریکیِه. 10هرکَه اُ کاکَشو محبت اَکو، تِی نور آمودِ و هیچچی تِی آنا نی که باعث بِبِه اُ زِمی بِفتِه. 11ولی کسی که نَخچ کاکَشو اُشنی، تِی تاریکیِه و تِی تاریکی رَه اَچِه. و نادو کُ اَچِه، اَسِی که تاریکی چَشیاش کور اُشکِردِ.
12اَی بَچیا، اَسِی شما اَنِوِسام،
اَسِی که گناهیاتو وَخاطر اسم آنا بَخشِدَ بُدِ.
13اَی بابَیّا، اَسِی شما اَنِوِسام،
اَسِی که اُ آناکِه از اوّل هَه، اَشناسی.
اَی جَوونیا، اَسِی شما اَنِوِسام،
اَسِی که اُ آن شَریرا پیروز بُدِستی.
اَی اولادیا، اَسِی شما اَنِوِسام،
اَسِی که اُ با اَشناسی.
14اَی بابَیّا، اَسِی شما اَنِوِسام،
اَسِی که اُ آناکِه از اوّل هَه، اَشناسی.
اَی جَوونیا، اَسِی شما اَنِوِسام،
اَسِی که کَوی هی و کلوم خدا تِی شما آمودِ،
و اُ آن شَریرا پیروز بُدِستی.
خاطر دنیا تُنِبِه
15خاطر دنیا یا هرچی که تِک دنیائِه تُنِبِه. اَگَه کسی خاطر دنیا شَئِه، محبت با تِی آنا نی. 16اَسِی که هرچی تِک دنیائِه، یعنی هوی و هَوسِی جسم، هوی و هَوسِی چَش و غرور زندگی، از با نی بلکه از دنیائِه. 17دنیا و هوی و هَوسیاش اَگذَرِ، ولی آناکِه خواستَهِ خدائا اَنجوم اَدَ، تا اَبَد اَدَمانِه.
هشدار دربارَهِ «ضدّمسیح»
18اَی اولادیا، آخر زَمونِه و هَموناکِه تشُنُفتِ ’ضدّمسیح‘ اَدا، هَمِ آلَه هم بُری ضدّمسیحیا اُندِستِت، پَ از اِکا اَدانِم که آخر زَمونِه. 19آنایا از جمع اَما چِدِت، ولی از اَما نِهادِت؛ اَسِی که اَگَه از اَما هادِت، خاد اَما اَدَمودِت. ولی آنایا چِدِت تَ معلوم بِبِه که هیچیَک از آنایا از اَما نِهِت.
20ولی شما اُ واسطَهِ آن کدّوسا، مَسح و تعیین بُدِستی و هَمَه چیا اَدانی. 21اَسِی شما اَنِوِسام، نِه وَخاطر اِکِه حکیکتا نادانی، بلکه وَخاطر اِکِه حکیکتا اَدانی، و اَسِی اِکِه هیچ دارُوی از حکیکت نی. 22دروغگو کِی، غیر از آناکِه حاشا اَکو عیسی هَمِ مسیح موعودِه. مِ کسی که اُ با و اُ پُس حاشا اَکو ’ضدّمسیحِه‘. 23کسی که اُ پُس حاشا بِکو، اُ با هم اُشنی. هرکَه اُ زابو بیارِ که اُ پُس ایمون اُشَه، اُ با هم اُشَه.
24بِهِری چِی که از اوّل تُشُنُفت تِی شما وامانِه؛ اَگَه چِی که از اوّل تُشُنُفت تِی شما وامانِه، مِ موکَوا شما، هم تِی پُس و هم تِی با اَدَمانی. 25و اِئِه مِ وعدَهای که شُ اَما دَدِ، یعنی زندگِنِ اَبَدی.
26ما اِ چِییَهوا اَسِی شما دربارَهِ کسِی اَنِوِسام که سعی کِردات گول تُبِزنِت. 27ولی دربارَهِ شما، مِ مَسحی که از آنا تُگِرِتِه، تِی شما اَدَمانِه و نیاز تُنی کسی اُ شما تعلیم هادَ، بلکه مَسح آنا دربارَهِ مَچی اُ شما تعلیم اَدَ. مِ مَسحا حکیکیه، و دارُو نی. هَموناکِه شُ شما تعلیم دَدِ، تِی آنا وامانی.
اولادِی خدا
28پَ آلَه، اَی بَچیا، تِی آنا وامانی، تا وَختی که آنا ظاهر اَبِه مطمئن بِبِم و موکَهِ اُندَش شرمندَش نِبِم. 29اَگَه بِدانی که آنا صالحِه، پَ مطمئن بی که، هرکَه مِ چِی که وَلمِه اَنجوم اَدَ، از آنا اُ دنیا اُندِ.
Currently Selected:
نامَه اوّل یوحَنا 2: LAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
