نامَه اوّل قُرِنتِنیا 6
6
شکایت و شکایت کَشی بین ایمونداریا
1هر وَخت یکیتو از یِکِیدو شکایت اُشَه، چینا جرأت اَکو وَ جَی اِکِه شکایتُش حَدِ ایموندارِی اُ مسیح بِبَ، اُ دادگاه گُنَهکاریا اَبَه؟ 2مَ نادانی ایموندارِی اُ مسیح اُ دنیا حُکم اَکنِت؟ اَگَه دنیا باید اُ واسطَهِ شما حُکم بِبِه، چینا تُناشابِه دربارَهِ کَرِی بُری کینگِلتَه حُکم بِکنی؟ 3مَ نادانی که اَما باید اُ فرشتَه‌یّا حُکم بِکنِم؟ پَ دِگَه چه بِرَسِه اُ مسائِل اِ زندگِنا. 4پَ اَگَه بینتو اینا اختلافِی هَه، اَسِی چه اِ اختلافیَه‌وا حَدِ کسی اَبری که تِی کلیسا حرفیاشو اعتباری اُشنی؟ 5اِئا اَگام تَ شرمندَتو بِکنام. مَ اَبِه یَک آدام با حکمت بینتو نِبِه تَ جَر و بحث بین کاکَیَّه‌وا فیصلَه هادَ؟ 6در عوض، کاکَ وَ ضد کاکَ اُ دادگاه اَچِه؟ آنا هم حَدِ بی‌ایمونیا؟
7اصلاً اینا شکایتِی که بینتو هَه، خوش اَسِی شما شکستِه. وَ جَی اِ، اَسِی چه کَبول ناکنی که مظلوم شما بی؟ اَسِی چه کَبول ناکنی کسی که کُلَه شُ سِرَ چِدِ شما بی؟ 8بَرعکس، شما خوتو کسی هی که ظلم اَکو و اُ سِرِ مردم کُلَه اَنِسِه، مِ هم در حَک کاکَیّاتو.
9مَ نادانی که ظالمیا وارث پادشاهِنِ خدا نابِت؟ گول مَخری! نِه بی‌عفتیا، نِه بُت‌پرستیا، نِه زِناکاریا، نِه مِ مَردِی که اُمرَییَه اَخَتِت - چه مِ کسی که اِ کَرا اَکو و چه کسی که اِ کَرا لِی آنا اَنجوم اَبِه، 10نِه دُزیا، نِه طَمَع‌کاریا، نِه عَرَک خوریا، نِه کسِی که دُشمو اَتِت، و نِه حُکَه بازیا، وارث پادشاهِنِ خدا نابِت. 11مُشتی از شما اینا هادی، ولی تِی اسم خداوند عیسی مسیح و اُ واسطَهِ روح خدای اَما، شُشتَه بُدِستی، مکدّس بُدِستی و صالح اُ حساب اُندِستی.
از بی‌عفتی بِگُروخی
12«مَچی اَسِی ما روائِه،» ولی هَمَه چی مفید نی. «مَچی اَسِی ما روائِه،» ولی ناهِرام چِی اختیارِنِ ما اُ دست بِگِرِ. 13«خوراک اَسِی اَشکامِه و اَشکام اَسِی خوراک،» و خدا، اُ دوتاشو، هم اُ اِ، هم اُ آنا نابود اَکو. بَدن اَسِی بی‌عفتی نی، بلکه اَسِی خداوندِه و خداوند اَسِی بَدنِه، 14خدا وَ کُدرت خوش، اُ خداوند عیسی زندَه شاکِه و اُ اَما هم زندَه اَدَکو. 15مَ نادانی که بَدَنِی شما عضوِی مسیحِه؟ پَ اَلَه عضوِی مسیحا واسیام و عضوِی یَک فاحشَه بِکنام؟ اصلاً! 16یا مَ نادانی مِ مردی که اُ فاحشَه‌ای اَنُخِه، خاد آنا یَک بَدن اَبِه؟ اَسِی که، هَموناکِه تِی تورات نوشتَه بُدِ: «آن دوتا یَک بَدن اَبِت.» 17ولی آناکِه اُ خداوند اَنُخِه، خاد آنا یَک روح اَبِه.
18از بی‌عفتی بِگُروخی! هر گناهِیدو که آدام اَکو دَر از بَدنِه، ولی کسی که بی‌عفتی اَکو، وَ ضد بَدن خوش گناه اَکو. 19یا مَ نادانی که بَدنتو، هَمِ بَدنی که از خدا تُهَه، معبد روح کدّوس خدائِه که تِی وجودتوئِه؟ شما مال خوتو نِهی. 20اَسِی که شما وَ یَک بَهایی خِلِدَ بُستی، پَ بَدنتو اَسِی جلال خدا اُ کَر بِگِری.
Currently Selected:
نامَه اوّل قُرِنتِنیا 6: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
