نامَه اوّل قُرِنتِنیا 14
14
نبوّت کِردَ و حرف زادَ وَ زابُنِی دِگَه
1اَزدُمبالَهِ محبت بی و وَ غیرت عطائِی روحانیا بطلبی، مخصوصا اِکِه نبوّت بِکنی. 2اَسِی که آناکِه وَ زابُنِ دِگَه حرف اَزاد، خاد آدامیزاد حرف نازاد بلکه خاد خدا حرف اَزاد. اَسِی که هِسکَه حرفُش نافَهمِه؛ بلکه آنا تِی روح خدا از سِرّیا حرف اَزاد. 3ولی آناکِه نبوّت اَکو، خاد مردم حرف اَزاد تَ اُ آنایا بَنا بِکو و تشویک و دلگرمشو بِکو. 4آناکِه وَ یَک زابُنِ دِگَه حرف اَزاد اُ خوش بَنا اَکو، ولی آناکِه نبوّت اَکو کلیسائا بَنا اَکو. 5ما مَئِه که هَمَهِ شما وَ زابُنِی دِگَه حرف بِزنی، ولی بِشتَه مَئِه که نبوّت بِکنی. آناکِه نبوّت اَکو از آناکِه وَ زابُنِی دِگَه حرف اَزاد، سَرتَئِه، مَ اِکِه یکی ترجمه بِکو تَ اینایی کلیسا بَنا بِبِه.
6اَلَه اَی کاکَیّا، اَگَه ما تُنحَد بِلگام و وَ زابُنی دِگَه حرف بِزنام، ولی اَسِی شما وَحی یا آگاهی یا نبوّت یا تعلیمی نیارام چه فایدَهای تُنسِه اُمَ؟ 7حتی سازِی چُنِ نی یا چَنگ که جو شُنی، اَگَه صداشو فرقی اُشنِبِه، چینا کسی شَشابِه بِفَهمِه اِ که زَتا چِئِه؟ 8و اَگَه شیپور یَک صدای مشخص نِدَ، کِ اَسِی جنگ آمادَه اَبِه؟ 9دربارَهِ شما هم اینائِه. اَگَه وَ زابُنِ خوتو حرفِی بِزنی که نابِه بِفَهمِش، چینا کسی شَشابِه بِفَهمِه که چه گُتاش؟ اَسِی که اُنگار خاد هوا حرف زَتاش. 10شَکی نی که تِک دنیا بُری زابُنِی مَ رَکَمی هَه، و هیچیَکشو بیمعنی نی. 11پَ ما اَگَه مَعنِنِ حرف یَک زابُنیا نِفَهمام، ما اَسِی آناکِه خاد ما حرف زَتا یَک غریبَه هام و آنا هم مُسِه یَک غریبئِه. 12اَسِی شما هم اینائِه. وَخاطر اِکِه، غیرت تُهَه که عطائِی روح خدا آشکار بِبِه، سعی بِکنی که تِی بَنا کِردَهِ کلیسا پیشرفت بِکنی.
13وَخاطر هَمِ آناکِه وَ یَک زابُنِ دِگَه حرف اَزاد باید دعا بِکو که حرفِی خوشا ترجمه بِکو. 14اَسِی که اَگَه ما وَ یَک زابُنِ دِگَه دعا بِکنام، روحُم دعا اَکو، ولی عَکلُم هیچ نَفعی نابَه. 15باید چه بِکنام؟ وَ روح خوم دعا اَکنام ولی خاد عَکلُم هم دعا اَکنام؛ وَ روح خوم سرود حمد و ستایش اَخوانام ولی خاد عَکلُم هم اَخوانام. 16وَ اِلّا، اَگَه تو وَ روح خوت شکر اَکنِش، چینایی کسی که از اِ چِییَهوا بی خَبرِه شَشابِه اُ شکر کِردَهِ تو آمین بِگِه؟ وَختی که نادو چه گُتاش! 17اَسِی که تو وَلم شکر اَکنِش، ولی باعث بَنای یِکِیدو نابِه. 18خدائا شکر اَکنام که بِشتَه از هَمَهِ شما وَ زابُنِی دِگَه حرف اَزنام؛ 19ولی مَئِه تِی کلیسا پنج کلمَه وَ عَکل خوم حرف بِزنام که یَک چی مُ بَکیَه یاد دَدِسبِه، وَ جَی اِکِه ده هزارتا کلمَه وَ یَک زابُنِ دِگَه حرف بِزنام.
20اَی کاکَیّا، تِی فَهمِدَ چُنِ بَچیا مَبی، تِی بَدی کِردَ چُن بَچِی کینگِلِه بی. ولی، تِی فَهمِدَ چُن یَک آدام بالغ بی. 21تِی تورات اینا نوشتَه بُدِ:
«”اُ وسیلَه آدامِی که وَ زابُنِی غریب حرف اَزنِت
و از کَپِ غریبَهیّا
خاد اِ کوما، حرف اَزنام،
و حتی مِ موکَوا هم، اُ حرف ما گاش کَر ناکنِت.“
خداوند اَگِه.»
22پَ حرف زادَ وَ زابُنِی دِگَه، یَک نِشونَهایه اَسِی بیایمونیا نِه اَسِی ایمونداریا؛ ولی نبوّت کِردَ نِشونَهایه اَسِی ایمونداریا نِه اَسِی بیایمونیا. 23پَ، اَگَه هَمَهِ اعضای کلیسا دوریَه جمع آبِت و هَمَه وَ زابُنِی دِگَه حرف بِزنِت، و یَک مُشتی که از اِ چِییَهوا خبر شُنی یا بیایمونِت، اُ تِک جمعشو بِلگِت، مَ اُ آنایا ناگائِت که شما گِنا هی؟ 24ولی اَگَه هَمَه نبوّت بِکنِت و یَک آدام بیایمون یا کسی که از اِ چِییَهوا خبر اُشنی اُ تِک مجلسشو بیاد، هَمَه باعث اَبِت که مِ آداما مُجاب بِبِه که گُنَهکارِه، و از طرف هَمَه کضاوت اَبِه، 25سررِی دلُش آشکار اَبِه، و اینایی لوش اُ لِی زِمی اَنِسِه و اُ خدا پرستش اَکو و اعلام اَکو که: «خدا واکعاً بین شمائِه.»
26پَ اَی کاکَیّا منظور چِئِه؟ موکَهای که دوریَه جمع اَدَبی، هرکَه یَک سرود، یَک تعلیم، یَک وَحی، وَ یَک زابُنِ دِگَه حرف زادَ و یا یَک ترجمهای اُشَه. اِیا هَمَه اَسِی بَنا کِردَ بِه. 27اَگَه کسی وَ یَک زابُنِ دِگَه حرف اَزاد، آنا هم فَکَط دو یا نهایتاً سه نفر، وَ نوبت حرف بِزنِت و یَک نفر هم ترجمه بِکو. 28ولی اَگَه کسی نِبِه که ترجمه بِکو، بِهِر آنایا تِی کلیسا ساکت وامانِت و تِی دِلشو خاد خدا حرف بِزنِت.
29از کسِی که نبوّت اَکنِت، دو یا سه نفر نبوّت بِکنِت و بَکیَه حرفیاشو بِسَنجِت. 30اَگَه یَک آدامِیدو که آنکا اُدائی وَحی شُبِرَسِه، بِهِر مِ آداما اوّل ساکت وامانِه. 31اَسِی که شما هَمَه وَ نوبت تاشابِه نبوّت بِکنی تَ هَمَه تعلیم بِگِرِت و هَمَه دلگرم آبِت. 32روح کسِی که نبوّت اَکنِت از کسِی که نبوّت اَکنِت اطاعت اَکنِت. 33اَسِی که خدا، خدای بینظمی نی، بلکه خدای صلح و سلامتیه.
هَموناکِه تِی هَمَهِ کلیسائِی کسِی که اُ مسیح ایمون شُهَه، اینائِه. 34زنیا باید تِی کلیسائیا ساکت وامانِت. اَسِی که اُ آنایا اجازَه حرف زادَ دَدَ نِبُدِ، بلکه باید اطاعت بِکنِت، هَموناکِه شریعت هم اَگِه. 35اَگَه چِی هَه که شُئِه یاد بِگِرِت تِی خونَه از شوشو بِپُرسِت؛ اَسِی که اَسِی زن عیبه که تِی کلیسا حرف بِزاد.
36مَ کلوم خدا از طرف شما اُمَ؟ یا مَ فَکَط اُ شما رَسِدِ؟ 37اَگَه یکی فکر اَکو که نبوّت اَکو یا یَک آدام روحانیه، آنا باید تایید بِکو اِ چِییَی که تُنسِه اَنِوِسام یَک حُکمیه از طرف خداوند. 38اَگَه کسی اِئا کَبول نِکو، خوش هم کَبول نابِه.
39پَ اَی کاکَیّام، وَ غیرت تُبِئِه که نبوّت بِکنی و حرف زادَ وَ زابُنِی دِگَهوا مَنع مَکنی. 40ولی مَچی باید وَلم و منظم اَنجوم بِبِه.
Currently Selected:
نامَه اوّل قُرِنتِنیا 14: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
