نُومَه وِ تیتوس 2
2
تعلیمِ دُرِسِ نِه یای بِ
1اما تو چیائی نِه کِه وِ طبقِ تعلیمِ دُرِس اَ، یای بِ. 2پیایا ریشاِسبی وِ هوش بان، وقار داشتوئَن، خُوددار بان، وَ دِ ایمُو وَ محبت وَ پایاری، دُرِس رفتار بَکَن.
3دایایا هَم بایِس قُرپ داشتوئَن، بُختُومزِه نوئَن، دِ بَنِ شِرُوِ زیاد نوئَن. وِنُو بایِس چیئی کِه خو اَ نِه تعلیم بِئَن، 4تا جُونَهزَنُو نِه یای بِئَن کِه مِیرَهدوس بان، بچُونِشُو نِه دوس داشتوئَن، 5خُوددار وَ پاک بان، وَ کِهنو بان، مِرَبُو وَ مطیعِ مِیرَهیاشُو بان، تا کلُومِ خدا گَن گُتَه نوئَه.
6هِه وِ چِنی هَم پیایا جِوُو نِه تشویق کُو تا خُوددار بان. 7دِ هَر بابت سَرمشقی دِ کاریا خو با، دِ تعلیمِ خُوت ریراس با وَ وقار داشتو، 8وَ چِنُو دُرِس قِصَه کُو کِه عِیوی وِش نَنیئَن، تا حریف دِ یَه کِه چی گَنی نارَه کِه دِمُو بُوئَه بور با.
9غُلِمیا نِه تشویق کُو کِه دِ هَر چی مطیعِ اربابیا خُوشُو بان، بی یَکِه یَکِدو بَکَن وِنُو نِه راضی نِئَه دارَن، 10دُوزی نَکَن، بلکِم وِ تمُومی ایمُونِ خو نِه نِشُو بِئَن، تا دِ هَر چی، قِشَنگی تعلیمِ نجاتدهندَهمُو خدا نِه وِ خوئی نِشُو بِئَن.
11سی یَکه فیضِ خدا دیاری بییَه، فیضی کِه گِردِ مردِم نِه نجات مِیئَه، 12وِ اِیما یای مِیئَه کِه بیدینی وَ هَوَسیا دنیائی نِه وِل بَکیم، وا خُودداری، صالحبییِه وَ دینداری دِ ایی زِمُو زِنِهئی بَکیم، 13وَ چَش وِ رَه او اُمیدِ هورِم بایم، یعنی دیاری بییِهنِ جِلالِ خدای عظیم وَ نجاتدهندَهمُو عیسی مسیح، 14کِه جُونِ خُوشِه سی اِیما دَه تا اِیما نِه دِ هَر شِرارَت راهائی بِئَه وَ قُومی نِه پاک بَکَه سی خُوش کِه تَنیا هینِ خُوش بان کِه سی کاریا خو غیرت دارَن.
15ایی چیا نِه اِعلُوم کُو، وَ وا اقتدارِ تمُوم تشویق وَ توبیخ کُو. نِئیل کَس تو نِه نِئییَه بِئیرَه.
Currently Selected:
نُومَه وِ تیتوس 2: NLB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
