نُومَه وِ کلیسای روم 11
11
باقیمَنَهیا اسرائیل
1پس میپُرسِم: مَه خدا قُومِ خُوشِه رَد کِردَه؟ اصلا! سی یَکِه مِه خُوم اسرائیلیاِم، دِ نسلِ ابراهیم وَ دِ طایفَه بنیامین. 2خدا قُومِ خُوشِه کِه دِ نِهاتِر اِشناخت، رَد نَکِردَه. مَه نُئُونیت اوچیئی کِه نیسَنَهیا مقدس دِبارَه ایلیا نبی مُوئَه، کِه چطور او دِ دَسِ قُومِ اسرائیل وِ تِه خدا گِلِهئی کِرد؟ گُت: 3اِ خداوند، وِنُو پِیغَمَریا تو نِه کُشتِنَه، مذبحیاتِه رِمَنِنَه، وَ تَنیا مِه مَنِمَه وِجا، وَ قَصتِ جُونِ مِه نِه کِردِنَه.» 4اما خدا چی وِش جُئُو دَه؟ یَکِه «مِه سی خُوم هفت هزار نفر نِئَه داشتِمَه کِه دِ وَرِ بُتِ بعل زُونی نَزَنَه.» 5پس هِه چِنی، دِ ایی زِمُونِ حاضر هَم باقیمَنَهیائی هیسِن کِه دِ رَه فیضِ خدا انتخاب بینَه. 6اما اَر دِ رَه فیض با، دَ وِ ری کاریا نی؛ وَرنَه فیض دَ فیض نی؛ اما اَر وِ ری کاریا با، دَ دِ فیض نی، وَرنَه کار دَ کار نی.
7اوسِه چی؟ یَکِه قُومِ اسرائیل او چیئی نِه کِه دِ دُمِش بی وِ دَس نیُووِردَه، وِنُو کِه انتخاب بینَه وِ دَس اُوِردِن، اما باقی دِلِشُو سخت بی؛ 8چِنُو کِه دِ کِتُومقدس نیسَنَه بییَه:
«خدا روحِ شیتی وِشُو دَه
چَشیائی کِه نِئینَن
وَ گوشیائی کِه نَشنُوئَن، تا وِ اِیمرو.»
9وَ داوود نبی مُوئَه:
«سِفرَهشُو سیشُو بوئَه وِ دام وَ تِلَه،
نَسَقی با وَ بَردی کِه میکوئَهشُو وِ زِمی؛
10چَشیاشُو چِنُو تار با کِه نَتُونِسوئَن بِئینَن،
وَ قِیشُو سی همیشَه دولو با.»
11پس میپُرسِم: یعنی وِنُو کُفتِسِن وِ زِمی تا سی همیشَه بِفتَن؟ اصلا! بلکِم وِ سُنَه خبطِ وِنُو، نجات نِصیوِ غیرِیهودیُو بییَه، تا قُومِ اسرائیل بیا وِ غیرت. 12ایسِه اَر خبطِ وِنُو باعثِ دُولَهمَنی دنیا اَ، وَ اَر شِکِسِشُو باعثِ دُولَهمَنی غیرِیهودیُونَه، هِه کِه قُومِ یهود وِ طورِ کامل نجات پیا بَکَن چَنی بیشتِر باعثِ دُولَهمَنی موئَن!
13ایمدال ری صُبَتِم ها وا شِما غیرِیهودیُو. دِ اوچِه کِه مِه رسولِ غیرِیهودیُونِم، وِ خدمتِ خُوم مُونِم 14تا یِه جوری هُمتیرَهیا خُومِه بیارِم وِ غیرت، وَ قَری دِشُو نِه نجات بِئِم. 15سی یَکِه اَر رَدبییِهنِشُو وِ معنی صُولِ خدا وا جاهان اَ، قبولبییِهنِشُو چی موئَه، غیرِ زِنَهبییِه دِ مُردَهیا؟ 16اَر تیکِلُونجِهای دِ خمیر کِه وِ عنوانِ نُوبَر وِ خدا تقدیم موئَه، مقدس با، پس گِردِ خمیر مقدس اَ؛ وَ اَر ریشَه مقدس با، پس تَلیا هَم مقدس اَن.
17اما اَر قَری دِ تَلیا اِشکِسِنَه، وَ تو وایَکِه تَلی دِ زیتونِ وحشی بیئی، دِ مینِ تَلیا هَنی وِ دارِ زِیتُو پِیوَن حَردی وَ ایمدال دِ شیرَه پُرقُوَتِ بُنِ دارِ زیتُو بَر مُوری، 18وِ او تَلیا نَبال. اَر چِنی هیسی، وِ ویر بیار کِه تو ویردارِ او بُن نیسی، بلکِم او بُن ویردارِ تونَه. 19اوسِه مُوئی: «تَلیا اِشکِسِن تا مِه پِیوَن بام.» 20یَه دُرِس اَ. وِنُو وِ سُنَه بیایمُونیشُو اِشکِسِن، اما تو وِ ایمُونَه کِه پایاری. پس غورت نو، بلکِم زَلَهت رُوئَه. 21سی یَکِه اَر خدا وِ تَلیا طبیعی رَحم نَکِرد، وِ تو هَم رَحم نِمیکَه.
22پس مِرَبونی وَ سختگیری خدا دِ وَرِ چَشِت با؛ وِ وِنُونی سخت مِئیرَه کِه دِ ایمُو اُفتانَه، اما وا تو مِرَبُونَه، وِ ایی شرط کِه دِ مِرَبُونی او بَمُونی؛ وَرنَه تو هَم بُرِسَه موئی. 23وَ اَر وِنُو هَم دِ بیایمُونی نَمُونَن، هَنی پِیوَن مُوحُورَن، سی یَکِه خدا تُونَه وِنُو نِه دُوارَه پِیوَن بَزِنَه. 24سی یَکِه اَر تو دِ دارِ زِیتونِ وحشی بُریَه بیئی وَ بَرخِلافِ طبیعتِت وِ دارِ زِیتونِ اهلی پِیوَن بیئی، پس چَنی بیشتِر تَلیا اصلی تُونَن وِ دارِ زِیتُونی کِه دِ وَه بُریَه بینَه، پِیوَن بان.
سِرِ نجاتِ اسرائیل
25بِرارُو، نِمیحام دِ ایی سِر بیخَوَر بایت، نَکَه وِ تِه خُوتُو گِمُو بَکیت دُونائیت: یَکِه سنگدلی وِ قَری دِ قُومِ اسرائیل حاکم بییَه، تا زِمُونی کِه شِمارِ غیرِیهودیُونی کِه وِ مسیح ایمُو میارَن کامل با. 26وَ هِه چِنی گِردِ قُومِ اسرائیل نجات پیا میکَه، چِنُو کِه دِ نیسَنَهیا مقدس نیسَنَه بییَه:
«نجات دهندَه دِ صهیون میا،
وَ بیدینی نِه دِ خاندانِ یعقوب وِرمیارَه.
27وَ یَه عَهدِ مِه وا وِنُونَه
هِه کِه گُنَهیاشُو نِه وِردارِم.»
28دِ لاحاظِ انجیل، یهودیُو وِ سُنَه شِما دُشمِنَن؛ اما دِ لاحاظِ انتخابِ خدا، وِ سُنَه اَجدادِشُو، سِتینِ خدا اَن. 29سی یَکِه خدا پیشکَشیا وَ دعوتِ خُوشِه پس نِمِئیرَه. 30سی یَکه هِه چِنُو کِه زِمُونی شِما نِسوَت وِ خدا نافِرمُو بیئیت، اما ایسِه وِ سُنَه نافِرمُونی یهودیُو رَحمَتِ خدا اُومایَه وِ ریتُو، 31پس وِنُو هَم ایسِه نافِرمُو بینَه تا وِ سُنَه رَحمَتِ خدا وِ شِما، وِ وِنُو هَم رَحم بوئَه. 32سی یَکِه خدا گِردِ نِه نِئایَه دِ بَنِ نافِرمُونی تا وِ همَه رَحم بَکَه. 33چَنی قیل اَ دُولَهمَنی وَ دُونائی وَ معرفتِ خدا!
دِ داوَرییاش نِموئَه سَر دِراُوِرد
وَ رَهیاشِه نِموئَه فَمِس.
34«سی یَکه کیَه کِه فکرِ خداوندِ نِه دُونِسوئَه،
یا چِه کسی مشاورِ او بییَه؟
35«یا کیَه کِه پیشکَشی وِ خدا دِئوئَه
تا وِش وِرگَردِنَه؟»
36سی یَکِه همَه چی دِ او، وَ وِ واسطَه او، وَ سی اونَه.
جِلال تا ابد وِ او با! آمین.
Currently Selected:
نُومَه وِ کلیسای روم 11: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company