انجیلِ لوقا 3
3
یحیی آمادَه کُنَندَه رَه عیسی
1دِ پُونزَهِمین سالِ حكومتِ تیبِریوس قیصرِ روم، هِه کِه پُنتیوس پیلاتُس والی یهودیَه بی، هیرودیس حاكمِ ولاتِ جلیل، وَ بِرارِش فیلیپُس حاكمِ ایتوریَه وَ تراخونیتیس بی، وَ لیسانیوس حاكمِ آبِلینی بی، 2وَ حنا وَ قیافا هَم کاهِنیا اعظم بییِن، كلُومِ خدا دِ بیاوُو وِ یحیی، کُرِ زكریا، نازل بی. 3یحیی مِیرَت وِ سَرتاسَرِ هورَه گِلالِ اُردُن وَ سی مردِم اِعلُوم میکِرد کِه سی آمرزشِ گُنَهیاشُو توبَه بَکَن وَ تعمید بِئیرَن. 4هِه چِنُو کِه دِ ایی بارَه دِ کِتُوِ اِشعَیا نَبی اُومایَه کِه:
«دَنگِ وَه کِه دِ بیاوُو میقارنَه،
رَه خداوندِ نِه آمادَه بَکیت!
رَهیا او نِه راس بَکیت
5گِردِ دِرَهیا پُر وَ گِردِ کُوءیا وَ تَپَهیا میکِپیئَن یِه دَس موئَن؛
رَهیا کَژ، راس
وَ رَهیا چالیپِلوقی، صاف موئَن.
6اوسِه تمُومیِ بَشَر نجاتِ خدا نِه مِئینَن.»
7یحیی ری وِ جِماعتی کِه سی تعمید گِرِتِه، مِیمان وِ تِهش، میگُت: «اِ اَفعی زادَهیا، کی وِتُو هُشتار دَه تا دِ غَضُوی کِه ها دِ نِهاتُو، بَجیئیت؟ 8پس توبَه خُوتُو نِه وا کردار وَ رفتارِتُو، نِشُو بِئیت وَ تِه خُوتُو نُوئیت: ”جَدِ اِیما ابراهیم اَ؛ سی یَکِه وِتُو مُوئِم، خدا تُونَه دِ ایی بَردیا بَچُونی سی ابراهیم دُرِس بَکَه. 9هِه ایسِه هَم تیشَه وِ ریشَه داریا نِئایَه بییَه. زوتا، هَر داری كِه میوَه خو وِ بار نیارَه، بُریَه وَ دِ تَش وَنَه موئَه.»
10جماعت دِش پُرسیئِن: «پس چی بَکیم؟» 11یحیی جُئُو دَه: «وَه کِه دو جُومَه دارَه، یَكیشِه بِئَه وِ وَه کِه نارَه، وَ هَر کَه خوراک دارَه، هَم هِه چِنی بَکَه.» 12خَراجگیریا هَم اُومان تا تعمید بِئیرَن. وِنُو دِش پُرسیئِن: «استاد، اِیما چی بَكیم؟» 13یحیی وِشُو گُت: «بیشتِر دِ چیئی کِه تعیین بییَه خراج نَسُونیت.» 14سَروازیا هَم دِش پُرسیئِن: «پس اِیما، چی بَکیم؟» وِشُو گُت: «وِ زور دِ کَسی پیل نَسُونیت وَ وِ هیشکَه بُختُومِ دِرو نَزِنیت وَ وِ حَقِ خُوتُو قانع بایت.»
15مردِم وا هَوَس چَش وِ رَه بییِن وَ وا خُوشُو فکر میکِردِن کِه یعنی ممکن اَ یحیی هِه او مسیحِ موعود با؟ 16جُئُو یحیی وِ گِردِشُو یَه بی: «مِه شِما نِه وا اُو تعمید مِیئِم، اما یَکی قویتِر دِ مِه مییایَه کِه مِه حتی قابل نیسِم بَنِ اُرِسییاشِه واز بَکِم. او شِما نِه وا روحالقدس وَ تَش تعمید مِیئَه. 17او آشیرِ خُوشِه دِ دَس دارَه تا خَرمِهنِ خُوشِه پاک بَکَه وَ گَنِمِ نِه دِ اَمارِ خُوش اَنُوختَه بَکَه، اما کَهیا نِه دِ تَشی کِه هیچ کور نِموئَه، مِیسوزنَه.»
18وِ ایی ترتیب یحیی وا نصیحتیا زیادی هَنی خَوَرِ خُوشِه پاتشائی خدا نِه وِ مردِمِ اِعلُوم میکِرد. 19اما هیرودیسِ حاکِم، کِه یحیی او نِه وِ سُنَه زَ داشیش هیرُودیا، وَ گِردِ کاریا گَنِش، توبیخ کِردی، 20یحیی نِه وَن وِ هُلِفدُو وَ هِه وِ چِنی خَبطی هَنی نِئا وِ سَرِ خَبطیاش.
تعمیدِ عیسی وَ شجرَه نُومچَه او
21هِه کِه مردِم گِرد تعمید میگِرِتِن وَ عیسی هَم تعمید گِرِتی وَ دعا میکِرد، آسمُو گُشِس، 22وَ روحالقدس وِ شکلِ جسمانی، چی کَموتَری نِشِس وِ ریش وَ دَنگی دِ آسمُو وِریسا کِه: «تو کُرِ عزیز مِنی. وَ مِه دِت راضیاِم.»
شجرَه نُومَچه عیسی
23عیسی نِزیکِ سی سال داشت کِه خدمتِ خُوشِه شروع کِرد. او وِ گِمُونِ مردِم کُرِ یوسف بی، وَ یوسف کُرِ هِلی، 24هِلی کُرِ مَتات، مَتات کُرِ لاوی، لاوی کُرِ مِلكی، مِلکی کُرِ یَنا، یَنا کُرِ یوسف، 25یوسف کُرِ مَتاتیا، مَتاتیا کُرِ عاموس، عاموس کُرِ ناحوم، ناحوم کُرِ حِسْلی، حِسْلی کُرِ نَجَی، 26نَجَی کُرِ مَعَت، مَعَت کُر مَتاتیا، مَتاتیا کُرِ سِمِعین، سِمِعین کُرِ یُسِک، یُسِک کُرِ یهودا، 27یهودا کُرِ یوحَنان، یوحَنان کُرِ ریسا، ریسا کُرِ زِروبابِل، زِروبابِل کُرِ شِئَلتی ئیل، شِئَلتی ئیل کُرِ نیری، 28نیری کُرِ مِلكی، مِلکی کُرِ اَدی، اَدی کُرِ قوصام، قوصام کُرِ اِلمادام، اِلمادام کُرِ عیر، 29عیر کُرِ یوشع، یوشع کُرِ اِلعازار، اِلعازار کُرِ یوریم، یوریم کُرِ مَتات، مَتات کُرِ لاوی، 30لاوی کُرِ شَمعون، شَمعون کُرِ یهودا، یهودا کُرِ یوسف، یوسف کُرِ یونام، یونام کُرِ اِلیاقیم، 31اِلیاقیم کُرِ مِلیا، ملیا کُرِ مِنا، مِنا کُرِ مَتاتا، مَتاتا کُرِ ناتان، ناتان کُرِ داوود، 32داوود کُرِ یَسا، یَسا کُرِ عُوبید، عُوبید کُرِ بوعَز، بوعَز کُرِ سَلمون، سَلمون کُرِ نَحشُون، 33نَحشُون کُرِ عمیناداب، عمیناداب کُرِ رام، رام کُر حِصرون، حِصرون کُرِ فِرِص، فِرِص کُرِ یهودا، 34یهودا کُرِ یعقوب، یعقوب کُرِ اسحق، اسحق کُرِ ابراهیم، ابراهیم کُرِ تارَح، تارح کُرِ ناحور، 35ناحور کُر سِروج، سِروج کُرِ رِعو، رِعو کُرِ فِلِج، فِلِج کُرِ عِبِر، عِبِر کُرِ شِلَخ، 36شِلَخ کُرِ قینان، قینان کُرِ اَرفَكشاد، اَرفَکشاد کُرِ سام، سام کُرِ نوح، نُوح کُرِ لَمِک، 37لَمِک کُرِ مَتوشالَح، مَتُوشالَح کُرِ خَنوخ، خَنوخ کُرِ یارِد، یارِد کُرِ مَهَللئیل، مَهَللئیل کُرِ قینان، 38قینان کُرِ اَنوش، اَنوش کُرِ شِیث، شِیث کُرِ آیِم وَ آیِم کُرِ خدا بی.
Currently Selected:
انجیلِ لوقا 3: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
