نُومَه دوئِم وِ تیموتائوس 4
4
1مِه وِ تِه خدا وَ مسیح عیسی کِه وِ زِنَهیا وَ مُردَهیا داوَری میکَه، وَ وِ سُنَه اُومایِهنِش وُ پاتشائیش، وِت سفارش میکِم کِه 2کلُومِ خدا نِه موعظَه بَک وَ وَخت وُ بیوَخت آمادَه با، وا صُورِ زیاد وَ تعلیمِ کامل، اصلاح وُ توبیخ وُ تشویق بَک. 3سی یَکه زِمُونی میآیَه کِه مردِم تعلیمِ دُرِسِ نِه تاو نِمیارَن، بلکِم معلمیائی دُورِ خُوشُو جمع میکَن تا اوچیئی نِه کِه گوشیاشُو میحا بَشنُوئَه وَ وا هوی وُ هَوَسیاشُو جور دِرمیا، دِ وِنُو بَشنُوئَن؛ 4وَ دِ گوش دِئِه وِ حقیقت ری وِرمیگَردِنَن، وَ ری میارَن والا مَتَلیا خیالی. 5اما تو دِ همَه چی وِ هوش با؛ عَذُویا نِه تاو بیار؛ کارِ اِعلُومِ انجیلِ نِه بَک وَ خدمتِ خُوتِه تمُومِکمال وِ آخِر بَرَسُو.
6سی یَکه خینِ مِه، هِه ایسِه، هِه چی پیشکَشی شِرُو، دِ حال رِختِسِنَه وَ وَختِ رَتِهنِم دِ ایی دنیا رَسِسَه. 7مِه جنگِ خو نِه کِردِمَه، وَ دور خُومِه وِ آخِر رَسَنِمَه، ایمُونِمِه نِئَه داشتِمَه. 8دیسِه وا دِما تاجِ صالحبییِه سیم آمادَهآ، تاجی کِه خداوند، او داوَرِ عادل، دِ او روز وِم مِیئَه_ نَه تَنیا وِ مِه، بلکِم وِ گِردِ وِنُو کِه دِ شوقِ اُومایِهنِ او بینَه.
سفارشیا آخِر
9تَقِلا کُو تا هَرچی زیتِر بیای وِ تِهم. 10سی یَکه «دیماس» وِ سُنَه دوس داشتِهنِ ایی دنیا مِه نِه وِل کِردَه وَ رَتَه وِ تِسالُونیکی. «کریسکیس» رَتَه وِ غَلاطیَه وَ «تیتوس» هَم رَتَه وِ دَلماتیَه. 11تَنیا لوقا مَنَه وام. مَرقُسِ نِه وِردار وَ واردِ خُوت بیار، سی یَکه او دِ خدمَتِم خیلی میا وِ کارِم. 12«تیخیکوسِ» نِه رِ کِردِم وِ اَفِسُس. 13هِه کِه اُومایی، قَبائی نِه کِه دِ ترُوآس وِ تِه کارپوس نِئام وِ جا، وا خُوت بیار، وَ کِتُویامِه هَم، وَ بخصوص طوماریا نِه هَم.
14اسکندرِ مِسگَر، وا مِه خیلی گَنی کِرد. خداوند سزا کاریاشِه مِیئه. 15تو هَم دِش دیری کُو، سی یَکه سخت ها وِ تیشکِ پیغُومِ اِیما.
16دِ دفاعِ اولِم، هیشکَه دِ پُشتیم دِر نِیُوما، بلکِم همَه مِه نِه وِل کِردِن. نَکَه یَه وِ حِسُوشُو نِئایَه با. 17اما خداوند اِیسا وام، وِم قُوَه دَه تا او پِیغُوم، توسطِ مِه تمُومِکمال اِعلُوم با وَ گِردِ غیرِیهودیُو وَه نِه بَشنُوئَن. وَ مِه دِ دَمِ شیر راها بیم. 18خداوند مِه نِه دِ هَر کارِ گَنی راها میکَه وَ مِه نِه وِ سِلامت وِ پاتشائی آسمُونی خُوش میارَه. جِلال وِ او با تا ابد وَ ابد. آمین!
سِلامیا آخر
19وِ «پریسکیلا» وَ «آکیلا» وَ هوزِحَضِراتِ «اونیسیفورُس» سِلام بَرَسُو. 20«اِراستوس» مَن دِ قُرَنتُس، وَ مِه «ترُوفیموس» نِه دِ میلیتوس، ناخوش نِئام وِ جا. 21تَقِلا کُو تا وِرَز زِمِسُو بیایی وِ ایچِه. «یوبولوس» «پودِنس»، «لینوس»، «کلُودیا» وَ گِردِ بِرارُو وِت سِلام مِیرَسنَن.
22خداوند وا روحِ تو با. فیضِ خدا وا تو با.
Currently Selected:
نُومَه دوئِم وِ تیموتائوس 4: NLB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
