روت 3
3
روت بوعَزئن خرمنئنده
1بئر گون قایینآناسی ناعومی روتا ددی: «قیزیم، مگر منه گرکلی دیئل کی، سنئن راحاتلیغین اوچون بئر یر آختاریم؟ 2کنئز قیزلاری ائله ساحهسئنده ائشلهدئیئن بوعَز مگر بئزئم قوحوموموز دیئل؟ باخ، او بو آخشام خرمنده آرپا سووورور. 3سن ده یویون، عطئرلَن و لاپ گؤزل پالتارینی گِیئنئب خرمنه اِن. آمّا او یِیئب-ائچمهیئنی قورتارمایینجا اؤزونو اونا گؤرسدمه. 4اِله کی، یاتماغا گتدی، یرئنی تاپیب آیاقلارینین اوستونو آچ و اورادا یات. سونرا نه اتمک لازیمدیر، او اؤزو سنه دئیهجک.»#3.4 بو، قدئم ائسرایئللیلرده اَره گتمهیه بئر ائشارهدئر. 5روت اونا ددی: «ددئکلرئنئن هامیسینا عمل ادهرم.»
6روت خرمنه اِندی و قایینآناسینین بوتون تاپشیریقلارینا عمل اتدی. 7بوعَز یِیئب-ائچئب کِفی کؤکَلَندن سونرا، یاتماق اوچون محصول تایاسینین کنارینا گتدی. روت دا گئزلئجه گلدی و آیاقلارینین اوستونو آچیب اورادا اوزاندی. 8گجه یاریسی بئردن بوعَز دئسکئندی و چِورئلئب باخاندا گؤردو کی، آیاقلاری آلتیندا بئر آرواد اوزانیب. 9بوعَز آروادا ددی: «سن کئمسن؟» آرواد جاواب وردی: «من کنئزئن روتام. اَتهیئنله بو کنئزئنئن ده اوستونو اؤرت، چونکی سن منئم قورتاراجاق قَیّومومسان.» 10بوعَز ددی: «قوی رب سنه برکت ورسئن، قیزیم! آخیرکی مهرئبانلیغین اَوّلکئندن ده یاخشیدیر. چونکی جاوان کئشئلرئن دالینجا گتمهدئن، ائستر کاسیب اولسون، ائستر وارلی. 11قیزیم، داها قورخما! ددئیئن هر شیی سنئن اوچون ادهجیم. شهرئمئزئن بوتون اهالئسی یاخشی بئلئر کی، سن شخصئیّتلی بئر آروادسان. 12دوزدور، سنئن قَیّومون منم، آمّا مندن ده یاخین بئر قَیّوم وار. 13بو گجهنی قال، صاباح اگر او آدام سنه قَیّوم اولماق ائستهسه، چوخ یاخشی، قوی اولسون. یوخ، اگر بوندان ائمتئناع اتسه، وار اولان رب حاقّی، سنئن قَیّومون من اؤزوم اولاجاغام. حلهلئک صاباحا قدر یات.»
14بلهجه روت اونون آیاقلاری آلتیندا صوبحهجک یاتدی و سحرئن آلاقارانلیغیندا، گؤزون حله یاخشی سچمهدئیی واختدا آیاغا قالخدی، چونکی بوعَز دمئشدی: «قوی هچ کس بئلمهسئن کی، خرمنه آرواد گلئب.» 15سونرا بوعَز روتا ددی: «اوست اؤرتویونو گؤتور، بورادا توت.» روت اؤرتویونو گؤتوروب کناریندان توتدو. بوعَز آلتی اؤلچو آرپانی اؤرتویون اوستونه تؤکوب اونا وردی. روت شهره قاییتدی.
16او، قایینآناسینین یانینا گلنده، قایینآناسی اونا ددی: «نجه اولدو، قیزیم؟» روت بوعَزئن اونا نه اتدئیئنی ناعومئیه دانیشدی. 17سونرا ددی: «او منه بو آلتی اؤلچو آرپانی ورئب ددی کی، قایینآنانین یانینا اَلیبوش قاییتما.» 18ناعومی روتا ددی: «قیزیم، گؤزله، گؤر بو ائشئن آخیری نجه قورتاریر؛ چونکی او آدام بو ائشی بو گون آخیرا چاتدیرمایینجا آرام اولمایاجاق.»
Currently Selected:
روت 3: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company