یوشَع 6
6
اَرئحانین سوقوطو
1ائسرایئل اؤولادلارینین اوزوندن اَرئحا برک باغلانمیشدی. اورایا گئرئب-چیخان یوخ ائدی. 2رب یوشَعه ددی: «باخ اَرئحانی، اونون پادشاهی ائله ائگئد آداملارینی سنه تسلئم اتمئشم. 3سئز، یعنی بوتون دؤیوشچولر شهرئن اطرافینا بئر دفه دولانین؛ آلتی گون بله ادئن. 4عهد ساندیغینین قاباغیندا، یدّی کاهئن، قوچ بوینوزوندان اولان یدّی کَرهنای داشیسین. یدّئنجی گون شهری یدّی دفه دولانین و کاهئنلر کَرهنایلاری چالسینلار. 5او زامان کی، اونلار قوچ بوینوزوندان اولان کَرهنایی اوزون بئر شکئلده چالیرلار و سئز اونو اشئدئرسئنئز، بوتون خالق گور سَسله باغیرسین. او واخت شهرئن قالا دووارلاری یره ییخیلار و خالقین هر بئری دایاندیغی یردن شهره قالخار.» 6نون اوغلو یوشَع کاهئنلری چاغیریب اونلارا ددی: «عهد ساندیغینی گؤتورون. ربّئن ساندیغی قاباغیندا یدّی کاهئن قوچ بوینوزوندان اولان یدّی کَرهنای داشیسین.» 7خالقا دا ددی: «قاباغا گدئن و شهری دولانین. قویون سئلاحلی آداملار ربّئن ساندیغی قاباغیندا گتسئنلر.»
8یوشَع بونو خالقا ددئیئنده، یدّی کاهئن قوچ بوینوزوندان اولان یدّی کَرهنایی گؤتوردولر و ربّئن قاباغیندا کچئب کَرهنایلاری چالدیلار؛ ربّئن عهد ساندیغی دا اونلارین دالینجا آپاریلدی. 9سئلاحلی آداملار کَرهنایلاری چالان کاهئنلرئن قاباغیندا گدئردئلر. کاهئنلر کَرهنایلاری چالا-چالا گِدَرکن، آرخادا اولان دسته ساندیغین دالینجا گدئردی. 10لاکئن یوشَع خالقا امر ادئب ددی: «سئزه ”چیغیرین“ دئیهجیئم گونه قدر چیغیرمایین، سَسئنئزی اشئتدئرمهیئن، آغزینیزدان هچ بئر سؤز چیخماسین. آنجاق من دئیَن واخت چیغیرین.» 11بلهجه ربّئن عهد ساندیغینی شهرئن اطرافینا بئر دفه دولاندیردی؛ سونرا اوردوگاها گلدئلر و اورادا گِجَلهدئلر.
12یوشَع سحر اِرکَن قالخدی. کاهئنلر ده ربّئن ساندیغینی گؤتوردولر. 13یدّی کاهئن کی، قوچ بوینوزوندان اولان یدّی کَرهنایی داشیییردیلار، ربّئن ساندیغی قاباغیندا گدئردئلر و کَرهنایلاری چالیردیلار؛ سئلاحلی آداملار اونلارین قاباغیندا گدئردی. آرخا دسته ده، کاهئنلر شیپورلاری چالارکَن اونلارین دالینجا گدئردی. 14بلهجه اونلار ائکئنجی گون ده شهری بئر دفه دولاندیلار و اوردوگاها قاییتدیلار؛ آلتی گون بله اتدئلر.
15یدّئنجی گون تزدن سحر آچیلاندا قالخدیلار و شهری یدّی دفه بو قایدا ائله دولاندیلار؛ آنجاق او یدّئنجی گون، شهری یدّی دفه دولاندیلار. 16یدّئنجی دفه دولانان زامان، کاهئنلر کَرهنایلاری چالاندا، یوشَع خالقا ددی: «چیغیرین! چونکی رب شهری سئزه ورئب. 17شهر بئزه حارامدیر، شهر و اوندا اولان هر شی ربّه عاییددیر؛ آنجاق فاحئشه راخاب و اونونلا بئرلئکده اِوده اولانلارین هامیسی گرک صاغ قالسین. چونکی او، گؤندَردئیئمئز اِلچئلری گئزلَتدی. 18لاکئن سئز، حارام اولموش شیلردن اوزاق دورون، اله کی، طاماحلانماییب حارام اولان شیلردن هچ نه گؤتورمیهسئنئز و ائسرایئل اوردوگاهینی لعنت آلتینا سالماییب باشینا بلا گتئرمیهسئنئز. 19آنجاق بوتون قیزیل و گوموش، بورونج و دمئر اشیالار ربّه مخصوصدور؛ اونلار گرک ربّئن خزئنهسئنه ورئلسئن.»
20خالق چیغیردی و کاهئنلر کَرهنایلاری چالدیلار. خالق کَرهنای سَسئنی اشئدنده اوجادان چیغیردی. او واخت قالا دووارلاری ییخیلیب یرله بئر اولدو و خالقین هر بئری ائرهلی گدئب شهری آلدیلار. 21اونلار شهرده اولانلارین هامیسینی حارام اولاراق قیلینجدان کچئردئب کامئل محو اتدئلر؛ کئشئنی، آروادی، جاوانی، قوجانی، اؤکوزو، قویونو، اِششهیی.
22یوشَع اؤلکهنی گؤزدن کچئردن او ائکی جاسوسا ددی: «فاحئشه آروادین اِوئنه گدئن، اونا آند ائچدئیئنئز کئمی آروادی و اونون یانینداکیلارین هامیسینی اِودن چیخاردین.» 23بلهجه بو جاوان جاسوسلار گدئب راخابی، آتاسینی، آناسینی، قارداشلارینی، و بوتون وار-یوخونو گتئردئلر؛ اونلار حتّا اونون بوتون قوحوملارینی دا گتئردئلر و اونلاری ائسرایئل اوردوگاهینین کناریندا قویدولار. 24شهره و اورادا اولان هر شیه اود ووروب یاندیردیلار. آنجاق قیزیل و گوموشو، بورونج و دمئر اشیالاری ربّئن خَزئنهسئنه قویدولار. 25لاکئن یوشَع فاحئشه راخابی، اونون آتاسینین عایئلهسئنی و اونون بوتون وار-یوخونو حئفظ اتدی؛ آرواد بو گونه قدر ائسرایئللیلرئن آراسیندا یاشاییب، چونکی اَرئحانی گؤزدن کچئرتمَک اوچون یوشَعئن گؤندَردئیی اِلچئلری یانیندا گئزلَتدی.
26یوشَع او واخت خالقا آند ائچدئرئب اونلارا ددی: «ربّئن حوضوروندا ملعون اولسون او آدام کی، بو اَرئحا شهرئنی برپا ادئر؛ بونو ادن آدام اونون بونؤورهسئنی ائلک اوغلونون حیاتی باهاسینا قویاجاق، اونون دروازالارینی دا کئچئک اوغلونون حیاتی باهاسینا برپا ادهجک.» 27بلهجه رب یوشَعله ائدی و اونون شؤهرتی بوتون اؤلکهیه یاییلدی.
Currently Selected:
یوشَع 6: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
