یوشَع 14
14
کَنَعان تورپاغینین بؤلونمهسی
1بونلاردیر او تورپاقلار کی، ائسرایئل اؤولادلاری کَنَعان تورپاغیندان ائرث آلدیلار؛ بو تورپاقلاری کاهئن اِلعازار، نون اوغلو یوشَع و ائسرایئل اؤولادلارینین قبئلهلرئنئن نسئل باشچیلاری، 2ربّئن موسا واسئطهسیائله بویوردوغو کئمی دوقّوز قبئله و بئر قبئلهنئن یاریسی اوچون ائرث اولاراق پوشکله بؤلدولر. 3چونکی موسا ائکی قبئله ائله یاریم قبئلهنئن ائرث اولان تورپاغینی اوردونون شرق طرفئنده اونلارا ورمئشدی، لاکئن اونلارین آراسیندا لاوئلیلره ائرث اولاراق تورپاق ورمهمئشدی. 4چونکی یوسئف اؤولادلاری مِنَسّه و اِفرایئم ائکی قبئله ائدئلر. لاوئلیلره هچ بئر تورپاق حئصّهسی ورئلمهدی مگر او شهرلر کی، اونلارا یاشاماق اوچون ورئلمئشدی و اوتلاقلار کی، اونلارین سورولری و ناخیرلاری اوچون ورئلمئشدی. 5ائسرایئل اؤولادلاری ربّئن موسایا بویوردوغو کئمی اتدئلر و تورپاغی بؤلوشدولر.
کالئبئن خِبرونو آلماسی
6بله بئر زاماندا یهودا اؤولادلاری گئلگالا، یوشَعئن یانینا گلدئلر. قِنئزلی یِفونّه اوغلو کالئب یوشَعه ددی: «سن اؤزون بئلئرسن کی، قِدِشبَرنِعهده رب سنئنله منئم حاقّیمدا تاری آدامی موسایا نه ددی. 7قیرخ یاشیندا ائدئم کی، ربّئن قولو موسا منی اؤلکهنی گؤزدن کچئرتمک اوچون قِدِشبَرنِعهدن گؤندَردی و من گؤردوکلرئمی اورهیئمده حئسّ اتدئیئم کئمی اونا خبر وردئم. 8لاکئن منئمله بئرلئکده گدن هموطنلرئم، خالقین اورهیئنی اوزدولر. آمّا من بوتون اورَکله تاریم ربّئن دالینجا گتدئم. 9او گون موسا آند ائچئب ددی: ”قدم باسدیغین تورپاق حتمن سنه و سنئن اؤولادلارینا ابدئلئک ائرث ورئلهجک، چونکی سن تاریم ربّئن دالینجا بوتون اورَکله گدئبسن.“ 10ائندی باخ، رب وردئیی سؤزه عمل اتدی و منی داها قیرخ بش ائل یاشاتدی. رب بو سؤزو موسایا ائسرایئللیلرئن صحرادا گَزدئکلری واخت دِمئشدی. من بو گون هشتاد بش یاشیندایام. 11موسانین منی گؤندَردئیی واختدا اولدوغوم کئمی، بو گون ده قووّتلییَم. او زامان قووّتئم نجه ائدی، ائندی ده گئرئب-چیخماق و دؤیوشمک اوچون اله قووّتئم وار. 12بونا گؤره ده ربّئن او زامان ددئیی بو داغلیق یری سن ائندی منه ور. او گون سن ده اشئتدئن کی، بو داغلیق یرده عَناقلیلار و بؤیوک و قالا دووارلی شهرلری وار. بلکه رب منئمله اولار و من ده ربّئن ددئیی کئمی اونلاری قووارام.» 13یوشَع اونا برکت وردی. خِبرونو یِفونّه اوغلو کالئبه ائرث اولاراق وردی. 14بونون اوچون خِبرون بو گونه قدر قِنئزلی یِفونّه اوغلو کالئبئن ائرث تورپاغیدیر. چونکی او بوتون اورَکله ائسرایئلئن تاریسی ربّئن دالینجا گتمئشدی. 15خِبرونون آدی اوّلجه قئریَتاَربَع ائدی. عَناقلیلار آراسیندا اَربَع لاپ بؤیوک آدام اولموشدو.
اؤلکه موحارئبهدن اَمئن-آمانلیغا چیخدی.
Currently Selected:
یوشَع 14: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
