داورلر 9
9
جِدعونون اوغلو اَبئمِلِکئن شِکِمده حؤکمرانلیغی
1یِروببَعَلئن اوغلو اَبئمِلِک شِکِمه، آناسینین قوحوملاری یانینا گتدی. اونلارا و آناسینین بوتون آتا طایفاسینا بله ددی: 2«بوتون شِکِم اهالئسئنه بونو اشئتدئرئب دیئن: ”سئزئن اوچون هانسی یاخشیدیر، یِروببَعَلئن یتمئش اوغلو سئزه داورلئک اتسئن، یوخسا بئر نفر؟ یاددان چیخارتمایین کی، من سئزئن سوموک و اَتئنئزدنَم.“» 3آناسینین قوحوملاری اونون ددئیی بو سؤزلری بوتون شِکِم اَهالئسئنه چاتدیردیلار؛ اونلارین دا اورَکلری اَبئمِلِکه مایئل اولدو و ددئلر: «او بئزه قارداشدیر.» 4اونا بَعَلبِرئتئن عئبادت اِوئندن یتمئش شِکِل#9.4 تقرئبن ۸۰۰ گرم گوموش وردئلر. اَبئمِلِک ده اؤزونه اوجرتله یاراماز و بلالی آداملار توتدو. اونلار اَبئمِلِکئن دالینجا گتدئلر. 5اَبئمِلِک عوفرایا، اؤز آتا اِوئنه گلدی و قارداشلاری یِروببَعَلئن یتمئش اوغلونو بئر داش اوستونده اؤلدوردو. تَکجه یِروببَعَلئن کئچئک اوغلو یوتام اؤزونو گئزلَتدئیئنه گؤره صاغ قالمیشدی. 6بوتون شِکِم و بِیتمئلّو اهالئسی ییغیلیب گتدئلر و شِکِمده داش سوتونون یانینداکی پالید آغاجینین یاخینلیغیندا اَبئمِلِکی پادشاه اعلان اتدئلر.
7بو خبر یوتاما چاتاندا، او گدئب گِرئزئم داغینین تپهسئنده دوردو و اوجا سَسله چاغیریب اونلارا بله ددی: «ای شِکِم اهالئسی، منی اِشئدئن کی، تاری دا سئزی اشئتسئن. 8گونلرئن بئر گونونده بوتون آغاجلار، اؤزلری اوچون پادشاه مسح اتمکدن اؤتری، گدئب زیتون آغاجینا ددئلر: ”بئزئم پادشاهیمیز اول.“ 9لاکئن زیتون آغاجی اونلارا ددی: ”تارینین و ائنسانین شَرَفی اوچون مندن آلینان یاغی آتیب آغاجلارین اوستونده ساللانیب قالیم؟!“ 10سونرا آغاجلار انجئر آغاجینا ددئلر: ”گل سن بئزه پادشاه اول.“ 11آمّا انجئر آغاجی اونلارا ددی: ”شئرئنلئیئمی و گؤزل میوهلرئمی آتیب آغاجلارین اوستونده ساللانیب قالیم؟!“ 12بو دفه آغاجلار اوزوم تَنهیئنه ددئلر: ”گل سن بئزه پادشاه اول.“ 13لاکئن اوزوم تَنهیی اونلارا ددی: ”تارینی و ائنسانلاری سِوئندئرَن تزه شرابلاریمی آتیب آغاجلارین اوستونده ساللانیب قالیم؟!“ 14نهایت، بوتون آغاجلار گلئب تئکانا ددئلر: ”گل سن بئزه پادشاه اول.“ 15تئکان ددی: ”اَگَر، حقئقتن، سئز منی اؤزونوزه پادشاه مسح ادئرسئنئز، گلئن منئم کؤلگَمه سیغینین. بله اولمازسا، قوی تئکاندان آلوو چیخسین و لوبنانین سئدر آغاجلارینی یاندیریب یاخسین.“
16ائندی اگر اَبئمِلِکی پادشاه اتمکده حاق نئیّت و دوغرولوقلا رفتار ادئبسئنئز؟ اگر یِروببَعَل و اونون نسلئنه یاخشیلیق ادئبسئنئز، نجه کی، لایئق ائمئش؟ 17چونکی آتام سئزئن اوچون دؤیوشدو و اؤز جانینی خطره آتیب سئزی مئدیانین اَلئندن قورتاردی. 18آمّا سئز بو گون آتامین اِو اهلئنئن ضئدّئنه چیخیب، یتمئش اوغلونو بئر داش اوستونده اؤلدوروبسونوز، سونرا دا جارئیهسئندن اولان اوغلو اَبئمِلِکی شِکِم اهالئسئنئن پادشاهی ادئبسئنئز، چونکی قوحومونوزدور. 19بس ائندی اگر بو گون یِروببَعَلله اونون اِو اهلئنه حاق نئیّت و دوغرولوقلا رفتار ادئبسئنئز، اوندا اَبئمِلِکدن سِوئنئن و قوی او دا سئزئنله سِوئنسئن. 20یوخسا قوی اَبئمِلِکدن آلوو چیخیب شِکِم و بِیتمئلّو اهالئسئنی محو اتسئن، شِکِم و بیتمئلّو اهالئسئندن ده اود چیخیب اَبئمِلِکی محو اتسئن.» 21یوتام قاچیب آرادان چیخدی و بِعِره گتدی. قارداشی اَبئمِلِکئن قورخوسوندان اورادا قالدی.
شِکِمله اَبئمِلِک آراسیندا موناقئشه
22اَبئمِلِک اوچ ائل ائسرایئل اوستونده باشچیلیق اتدی. 23سونرا تاری اَبئمِلِکله شِکِم اهالئسئنئن آراسینا شَر بئر روح گؤندَردی؛ و اونلار اَبئمِلِکه خیانت اتدئلر. 24بو اونا گؤره باش وردی کی، هم اَبئمِلِک، یِروببَعَلئن یتمئش اوغلونا اتدئیی گوناهین جزاسینی چکسئن، هم ده اَبئمِلِکدن و اونو بو قتله چکن شِکِم اهالئسئندن، تؤکدوکلری قانلارین قئصاصی آلینسین. 25شِکِم اهالئسی داغلارین باشیندا اَبئمِلِکئن ضئدّئنه کمئن قوروب، یولدا یانلاریندان کچنلرئن هامیسینی سویوردولار. بونو اَبئمِلِکه خبر وردئلر.
26عِبِدئن اوغلو گَعَل و قوحوملاری گلئب شِکِمده ساکئن اولدولار. شِکِم اهالئسی اونا بِل باغلادیلار. 27اونلار چؤله، باغلارا گدئب اوزوم ییغدیلار. سونرا بو اوزوملری اَزئب شَنلئک قوردولار و اؤز آللاهلارینین عئبادتگاهینا گدئب یِیئب-ائچدئلر و اَبئمِلِکه لعنت اتدئلر. 28عِبِد اوغلو گَعَل ددی: «اَبئمِلِک کئمدئر، شِکِم کئمدئر کی، بئز اونا خئدمت اِدَک؟ مگر یِروببَعَلئن اوغلو دیئل؟ مگر اونون موعاوئنی ده زِبول دیئل؟ گلئن شِکِمئن آتاسی خَمورون آداملارینا خئدمت ادئن! نه اوچون گرک اَبئمِلِکه خئدمت اِدَک؟ 29کاش بو خالق منئم اَلئمده اولایدی! او زامان اَبئمِلِکی قوواردیم.» سونرا گَعَل اَبئمِلِکه ددی: «قوشونونو ییغ، میدانا چیخ!»
30شهر ریئسی زِبول عِبِدئن اوغلو گَعَلئن بو سؤزلرئنی اشئدنده قضبدن آلیشیب یاندی. 31حئیله ائشلَتدی و اَبئمِلِکئن یانینا قاصئدلر گؤندَرئب ددی: «باخ، عِبِد اوغلو گَعَلله قوحوملاری شِکِمه گلئب شهری سنئن ضئدّئنه قالدیریرلار. 32ائندی سن و آداملارین بو گجه قالخیب چؤلده کمئنده دورون. 33سحر آچیلاندا گونش دوغار-دوغماز قالخیب شهره هوجوم اِدَرسن؛ باخ، گَعَلله آداملاری سنئن ضئدّئنه چیخاندا اَلئندن گلنی ات.»
34اَبئمِلِکله آداملاری گجه ائکَن قالخدیلار و دؤرد دسته اولوب شِکِمئن یاخینلیغیندا کمئنده دوردولار. 35عِبِد اوغلو گَعَل چیخیب شهر دروازاسینین گئرئش یِرئنده دوردو؛ اَبئمِلِک و آداملاری کمئندن چیخدیلار. 36گَعَل اونلاری گؤرنده زِبولا ددی: «باخ، داغلارین تپهسئندن بئر دسته خالق اِنئر.» زِبول اونا ددی: «گؤردویون، داغلارین کؤلگهسیدئر، آداملارا اوخشادیرسان.» 37گَعَل سؤزونه داوام ورئب ددی: «باخ اؤلکهنئن یوخاریلاریندان خالق اِنئر. فالچیلار پالیدی یولوندان دا بئر دسته گلئر.» 38او زامان زِبول اونا ددی: «ائندی او کئبئرلی دئلئن هارادادیر کی، ددئن: ”اَبئمِلِک کئمدئر کی، بئز اونا خئدمت اِدَک؟“ حقارتله باخدیغین خالق مگر بو خالق دیئل؟ ائندی میدانا چیخ، اونلارلا دؤیوش.» 39گَعَل شِکِم اهالئسئنئن قاباغینا چیخیب اَبئمِلِکله دؤیوشدو. 40اَبئمِلِک اونو قوودو، گَعَل اونون قاباغیندان قاچدی. آداملارین چوخو یارالانیب دروازانین گئرئش یرئنه قدر یره سَرئلدئلر.
41اَبئمِلِک اَرومادا یاشادی. آمّا زِبول گَعَلله قوحوملارینی قوووب قویمادی کی، شِکِمده یاشاسینلار. 42صاباحیسی شِکِم خالقی چؤله چیخاندا بو بارهده اَبئمِلِکه خبر ورئلدی. 43او، قوشونونو گؤتوروب اوچ دستهیه آییردی و اونلار چؤلده کمئن قوروب گودّولر؛ اَبئمِلِک خالقین شهردن چیخدیغینی گؤرنده قالخیب هوجوم اتدی و اونلاری قیلینجدان کچئرتدی. 44اَبئمِلِکله دستهسی جَلد ائرهلی کچئب، شهر دروازاسینین گئرئشئنده دایاندیلار؛ او بئری ائکی دسته چؤلدهکی خالقین اوستونه دوشوب اونلاری قیردیلار. 45اَبئمِلِک بوتون گون شهرئن ضئدّئنه دؤیوشدو و اورانی آلیب اورادا اولان آداملاری قیردی؛ سونرا شهری وئران ادئب، یرئنه دوز اَکدی.
46شِکِمئن بورجوندهکی باشچیلار بونو اشئدنده اِلبِرئت معبدئنئن قالاسینا گئردئلر. 47اَبئمِلِکه خبر چاتدی کی، بوتون شِکِم بورجوندهکی باشچیلار اورایا ییغیلیبلار. 48اَبئمِلِک بوتون آداملاری ائله برابر صَلمون داغینا چیخدی. اَلئنه بالتا گؤتوروب آغاجدان بئر بوداق کسدی و اونو چئیئنلرئنئن اوستونه قویوب یانینداکی خالقا بله ددی: «جَلد اولون، من نجه ادئرم، سئز ده اِله ادئن.» 49بوتون خالق بئر-بئر بوداقلاری کَسئب اَبئمِلِکئن دالیسیجا گتدی و بوداقلاری قالانین اطرافیندا قویوب اود ووردو. شِکِم بورجوندهکی آداملاردان مئنه قدر کئشی و آرواد یانیب اؤلدو.
50اَبئمِلِک تِبِصه گتدی و اورانی موحاصئره ادئب آلدی. 51شهرئن اورتاسیندا مؤحکم بئر بورج وار ائدی. بوتون شهر اهالئسی، کئشئلر و آروادلار بورجه قاچیب قاپینی ائچهرئدن باغلادیلار و بورجون دامینا چیخدیلار. 52اَبئمِلِک گلئب بورجه هوجوم اتدی. بورجون قاپیسینا یاخینلاشدی کی، اورایا اود وورسون. 53او واخت بئر آرواد دَیئرمانین اوست داشینی اَبئمِلِکئن باشینا توللاییب کلّهسئنی اَزدی. 54اَبئمِلِک تِز سئلاح داشییان جاوانی چاغیریب ددی: «چک قیلینجی، منی اؤلدور. قوی منئم بارهمده دِمهسئنلر کی، اونو بئر آرواد اؤلدوردو.» جاوان قیلینجی ائله اونو ووردو و اَبئمِلِک اؤلدو. 55ائسرایئللیلر گؤرنده کی اَبئمِلِک اؤلوب، هامیسی اؤز یرئنه قاییتدیلار. 56بونونلا دا تاری اَبئمِلِکئن یتمئش قارداشینی اؤلدورمکله آتاسینا اتدئیی پئسلئیی اؤز باشینا گتئردی. 57تاری شِکِم اَهالئسئنئن ده بوتون پئسلئیئنی اؤز باشلارینا گتئردی. یِروببَعَلئن اوغلو یوتامین لعنتی اونلارین اوستونه دوشدو.
Currently Selected:
داورلر 9: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
