داورلر 8
8
اِفرایئمئن حسودلوغو
1اِفرایئملیلر جِدعونا ددئلر: «بو نه ائشدئر باشیمیزا گتئردئن؟ مئدیانلیلارلا دؤیوشه گِدنده نئیه بئزی چاغیرمادین؟» بوندان اؤتری اونونلا آغیر موباحئثه اتدئلر. 2آمّا جِدعون اونلارا ددی: «آخی سئزئن گؤردویونوز ائشلرئن یانیندا، ائندی گؤردویوم بو ائش نهدئر کی؟ اِفرایئمئن اوزوم باشاقلاری اَبئعِزِرئن اوزوم باغینین محصوللاریندان مگر یاخشی دیئل؟ 3مئدیان باشچیلاری عورِب و ذِعِبی، تاری سئزه تسلئم ادئب؛ مگر سئزئن گؤردویونوز ائشلرئن یانیندا من نه اده بئلمئشم؟» بونو دئیَندن سونرا اِفرایئملیلرئن اونا اولان قضبی یاتدی.
4جِدعون اوردون چایینا چاتدی، اؤزو و یانینداکی اوچ یوز نفرله برابر چایی کچدئلر. اونلار یورولماقلارینا باخماییب دوشمنلرئن تعقئبئنه داوام ورئردئلر. 5او گلئب سوکّوت آداملارینا ددی: «خاهئش ادئرم، آرخامجا گلن آداملارا بئر تئکه چؤرک ورئن، چونکی طاقتدن دوشوبلر. آمّا من مئدیان پادشاهلاری زِبَخ و صَلمونّانین دالینجا گدئرم.» 6سوکّوت باشچیلاری اونا ددئلر: «مگر زِبَخ و صَلمونّانین اَلی ائندی سنئن اَلئندهدئر کی، سنئن دؤیوشچولرئنه چؤرک وِرَک؟» 7جِدعون اونلارا ددی: «نِینَک، رب زِبَخ و صَلمونّایی منه تسلئم ادنده سئزئن اَتئنئزی چؤلون تئکانلاری و کوللاری ائله دئدهجیم.» 8اورادان گلئب پِنواِله چیخدی و اوراداکیلاردان دا هَمَن شیی ائستهدی. سوکّوت ساکئنلری نجه اونا جاواب ورمئشدئلر، پِنواِل ساکئنلری ده اونا اِله جاواب وردئلر. 9جِدعون پِنواِل ساکئنلرئنه ده بله ددی: «صاغ-سالامات گِرئیه قاییتدیغیم زامان، بو بورجو داغیداجاغام.»
10زِبَخله صَلمونّا بوتون شرق خالقلارینین قوشونوندان صاغ قالانلارلا قَرقوردا ائدئلر و اونلارین سایی اون بش مئن نفره قدر اولاردی؛ اونلارین اوردوسوندان یوز ائیئرمی مئن جنگاور یره سَرئلمئشدی. 11جِدعون نوبَخ و یوگبوهانین شرقئندن، یعنی کؤچَریلرئن یولوندان کچئب، لاقید دایانان دوشمن اوردوگاهینا هوجوم اتدی. 12زِبَخ و صَلمونّا قاچدیقدا، جِدعون دا اونلاری تعقئب اتدی. او، مئدیانین ائکی پادشاهی زِبَخله صَلمونّانی توتوب، بوتون قوشونو مغلوب اتدی.
13سونرا یوآش اوغلو جِدعون خِرِسئن یوخاریسیندان دؤیوشدن قاییتدی. 14سوکّوت ساکئنلرئندن بئر جاوانی توتوب اوندان سؤز آلدی. او دا اونا سوکّوت باشچیسی اولان یتمئش یدّی آغساقّالین آدینی یازیب وردی. 15جِدعون سوکّوت ساکئنلرئنئن یانینا گلئب ددی: «باخ، بو دا زِبَخ و صَلمونّا کی، اونون بارهسئنده منی اَله سالیب دِدئنئز: ”مگر زِبَخ و صَلمونّانین اَلی سنئن اَلئندهدئر کی، سنئن یورغون آداملارینا چؤرک وِرَک؟“» 16سونرا او، شهر آغساقّاللارینی ییغدی؛ سوکّوتون بو کئشئلرئنی چؤل تئکانلاری و کوللارلا دؤیوب تَنبِه اتدی. 17بوندان سونرا دا گلئب پِنواِل بورجونو داغیتدی و شهرئن کئشئلرئنی قیردی.
18جِدعون زِبَخله صَلمونّایا ددی: «تابوردا اؤلدوردویونوز آداملار نجه آداملار ائدئلر؟» اونلار ددئلر: «هامیسی سنئن کئمی پادشاه اوغوللارینا اوخشاییردی.» 19جِدعون ددی: «اونلار منئم قارداشلاریم، آنامین اوغوللاری ائدئلر. وار اولان رب حاقّی، اگر سئز اونلاری صاغ بوراخسایدینیز، من ده سئزی اؤلدورمَزدئم.» 20و ائلک اوغلو یِتِره ددی: «قالخ اونلاری اؤلدور.» لاکئن اوغلان قیلینجینی چکمهدی، چونکی حله جاوان اولدوغونا گؤره قورخوردو. 21زِبَخ و صَلمونّا ددئلر: «دور، بئزی سن وور، چونکی بئر کئشئنی آنجاق بئر کئشی اؤلدورَر.» جِدعون قالخیب زِبَخله صَلمونّانی اؤلدوردو و سونرا آی پارالارینی کی، اونلارین دَوهلرئنئن بویونلاریندان آسیلمیشدی، گؤتوردو.
جِدعونون اِفودو
22ائسرایئللیلر جِدعونا ددئلر: «سن، اوغلون و نَوَن بئزه حاکئم اولون. چونکی بئزی مئدیانین اَلئندن سن قورتاردین.» 23لاکئن جِدعون اونلارا ددی: «نه من سئزئن اوستونوزده حاکئم اولاجاغام، نه ده اوغلوم. سئزئن اوستونوزه رب حؤکمرانلیق ادهجک.» 24سونرا جِدعون اونلارا ددی: «آنجاق سئزدن بئر خاهئشئم وار کی، گؤتوردویونوز تالان مالیندان هر کس منه بئر گوشوارا ورسئن.» چونکی دوشمنلر ائسماعئللی اولدوقلاری اوچون قیزیل گوشوارا تاخیردیلار. 25اونلار جِدعونا ددئلر: «بونو مَمنونئیّتله ورهرئک.» اونلار یره بئر پالتار سَردئلر و هامی تالان مالیندان بئر گوشوارا بو پالتارین اوستونه آتدی. 26آیپارالاردان، بویونباغیلاردان، مئدیان پادشاهلارینین اَینئندهکی اَرغوانی پالتارلاردان و دَوهلرئن بوینونداکی زنجئرلردن علاوه بو قیزیل گوشوارالارین چکئسی مئن یدّی یوز شِکِل#8.26 تقرئبن ۵/۱۹ کئلو گلئردی. 27جِدعون اونلاردان بئر اِفود دوزَلتدی و اونو اؤز شهری عوفرادا قویدو. بوندان سونرا بوتون ائسرایئللیلر اورادا بو اِفودا سجده ادئب بلهجه ربّه خیانت اتدئلر. بو اِفود جِدعون و اونون اِو اهلی اوچون تله اولدو. 28مئدیانلیلار ائسرایئل اؤولادلارینا تابع اولوب بئر داها باشلارینی قالدیرا بئلمهدئلر. جِدعونون دؤورونده اؤلکهیه قیرخ ائل راحاتلیق دوشدو.
جِدعونون اؤلومو
29یوآش اوغلو یِروببَعَل قاییدیب گئنه اؤز اِوئنده یاشادی. 30اونون بِلئندن گلن یتمئش اوغلو وار ائدی، چونکی آروادی چوخ ائدی. 31شِکِمده اولان جارئیهسی ده اونا بئر اوغول دوغدو و جِدعون اونون آدینی اَبئمِلِک قویدو. 32یوآش اوغلو جِدعون اوزون و یاخشی عؤمور سوروب اؤلدو. او، اَبئعِزِرلیلرئن عوفرا شهرئنده، آتاسی یوآشین مقبرهسئنده دفن اولوندو.
33جِدعونون وفاتیندان سونرا ائسرایئل اؤولادلاری گئنه ده بَعَل بوتلرئنه سئتایئش ادئب، زئنایا چکئلدئلر. اونلار بَعَل-بِرئتی اؤزلرئنه آللاه اتدئلر. 34بلهجه ائسرایئل اؤولادلاری تاریلاری ربّی کی، اونلاری اطرافلارینداکی بوتون دوشمنلرئنئن اَلئندن قورتارمیشدی، یادا سالمادیلار. 35یِروببَعَلئن، یعنی جِدعونون ائسرایئللیلره اتدئیی بوتون خیئرخاهلیغین عوضئنه، اونون نسلی ائله ده یاخشی رفتار اتمهدئلر.
Currently Selected:
داورلر 8: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
