داورلر 6
6
رب جِدعونو چاغیریر
1ائسرایئل اؤولادلاری گئنه ده ربّئن گؤزونده پئس ائشلر گؤردولر؛ رب ده اونلاری یدّی ائل مئدیانلیلارا تسلئم اتدی. 2مئدیانلیلارین گوجلو اَلی ائسرایئللیلرئن ضئدّئنه قالخدی. مئدیانلیلارین اوزوندن ائسرایئل اؤولادلاری اؤزلری اوچون داغلاردا سیغیناجاق یرلری، ماغارالار و قالالار قوردولار. 3ائسرایئللیلر اَکئن اَکَنده مئدیانلیلار، عمالِقلیلر و باشقا شرق خالقلاری گلئب ائسرایئللیلره هوجوم ادئردئلر. 4ائسرایئلئن ضئدّئنه اوردوگاه قوروب تورپاغین محصوللارینی غَزّهیه قدر محو ادئردئلر. ائسرایئللیلره دولانماق اوچون هچ نه قویمازدیلار، نه قویون، نه اؤکوز، نه ده اِششَک. 5چونکی اونلار اؤز حیوانلاری و چادیرلاری ائله چیخیردیلار. گلنده ده چَیئرتکه کئمی او قدر چوخ گلئردئلر کی، نه اؤزلرئنئن، نه ده دَوهلرئنئن سایی-حسابی اولوردو. اونلار گلئردئلر کی، اؤلکهنی وئران اتسئنلر. 6ائسرایئللیلر مئدیانلیلارین اَلئندن چوخ ذلئل اولدولار. اونا گؤره ده ائسرایئل اؤولادلاری ربّه فریاد اتدئلر.
7مئدیانلیلارین اَلئندن ائسرایئل اؤولادلاری ربّه فریاد ادنده، 8رب ائسرایئل اؤولادلارینا بئر پیغمبر گؤندَردی. او، ائسرایئللیلره بله ددی: «ائسرایئلئن تاریسی رب بله دیئر: ”سئزی مئصئردن چیخاردان، نؤکرچئلئک دئیاریندان قورتاران من ائدئم. 9سئزی مئصئرلیلرئن و بوتون ظولمکارلارین اَلئندن آزاد اتدئم، اونلاری قاباغینیزدان قوودوم و تورپاقلارینی سئزه وردئم. 10سئزه ددئم کی، تارینیز رب منم، تورپاغیندا یاشادیغینیز اِمورلولارین آللاهلاریندان قورخمایین. آمّا سئز منئم سؤزومه قولاق آسمادینیز.“»
11سونرا ربّئن مَلهیی گلئب اَبئعِزِرلی یوآشین عوفرا شهرئندهکی چؤل پوستهسی آغاجینین آلتیندا اوتوردو. یوآشین اوغلو جِدعون اوزوم سیخیلان یرده تاخیلی دویوردو کی، مئدیانلیلاردان گئزلَتسئن. 12ربّئن مَلهیی اونا گؤرونوب ددی: «ای جسور جنگآور، رب سنئنلهدئر.» 13جِدعون اونا ددی: «آه منئم آغام، اگر رب بئزئملهدئر، بس بوتون بو ائشلر باشیمیزا نئیه گلئب؟ اونون او بوتون موجوزهلری بس هانی کی، آتالاریمیز اونلاردان دانیشیب دیئردئلر: ”مگر رب بئزی مئصئردن چیخارتمادی؟“ ائندی رب بئزی آتیب و مئدیانلیلارین اَلئنه ورئب.» 14رب اونا باخیب ددی: «بو قووّتئنله گت، ائسرایئلی مئدیانلیلارین اَلئندن قورتار. سنی گؤندَرَن من مگر دیئلم؟» 15جِدعون اونا ددی: «ای آغام، ائسرایئلی من نجه قورتاریم؟ باخ، منئم طایفام مِنَسّه قبئلهسئنده هامیسیندان لاپ کئچئکدئر، من ده آتامین اِوئنده هامیدان لاپ کئچئیَم.» 16لاکئن رب اونا ددی: «من یقئن سنئنله اولاجاغام، سن ده مئدیانلیلارین هامیسینی بئر نفر کئمی قیراجاقسان.» 17جِدعون ددی: «اگر ائندی سنئن گؤزونده لوطف تاپمیشام، منه بئر علامت گؤرسد، بئلئم کی، منئمله دانیشان سنسن. 18خاهئش ادئرم، بورادان گتمه کی، گِدئم قوربانیمی گتئرئب سنه تقدئم اِدئم.» رب جِدعونا ددی: «سن گری قاییدانا قدر من بورادا گؤزلَیهرم.»
19جِدعون ائچهری گئردی. بئر کچی بالاسی کسئب بئر اِفا#6.19 تقرئبن ۲/۱۳ کئلو اوندان مایاسیز چؤرکلر پئشئردی؛ اَتی سبده قویدو، اَتئن سویونو دا قازانا تؤکدو. سونرا اونلاری چؤل پوستهسی آغاجینین آلتیندا ربّئن یانینا گتئرئب اونا تقدئم اتدی. 20تارینین مَلهیی اونا ددی: «اَتی و مایاسیز چؤرهیی گؤتور، بو قایانین اوستونه قوی و اَتئن سویونو دا اورایا تؤک.» جِدعون بله ده اتدی. 21ربّئن مَلهیی اَلئنده اولان عصانین اوجونو اورایا اوزادیب اَتله مایاسیز چؤرهیه توخوناندا، قایادان آلوو چیخدی و اَتله مایاسیز چؤرهیی اودوب یوخ اتدی. سونرا ربّئن مَلهیی اونون گؤزونون قاباغیندان قِیب اولدو. 22جِدعون اونون ربّئن مَلهیی اولدوغونو آنلاییب ددی: «آی آمان، ای پروردئگار رَب! من ربّئن مَلهیئنی اوز به اوز گؤرموشم.» 23رب اونا ددی: «آرام اول، قورخما، اؤلمهیهجکسن.» 24جِدعون اورادا ربّه بئر قوربانگاه دوزَلتدی و اونون آدینی یَهوِه-شالوم #6.24 «یَهوِه-شالوم» - عئبرانی دئلئنده یعنی «رب باریشدیر.» قویدو. بو قوربانگاه بو گونه قدر اَبئعِزِرلیلرئن عوفرا شهرئندهدئر.
25همئن گجه رب جِدعونا ددی: «گت، آتانین گامیشینی، یدّی ائلّئک ائکئنجی گامیشینی گؤتور. سونرا گت، آتانین بَعَل بوتونه دوزَلتدئیی قوربانگاهی داغیت و یانینداکی اَشِرا بوتونو کَس. 26بو تَپهنئن باشیندا تارین ربّه لایئق بئر قوربانگاه دوزَلت. سونرا کسدئیئن اَشِرانین آغاج بوتونه اود ووروب گؤتوردویون ائکئنجی گامیشی اونونلا یاندیرما قوربانی تقدئم ات.» 27جِدعون نؤکرلرئندن اون نفری اؤزو ائله گؤتوروب، ربّئن ددئیی کئمی اتدی؛ لاکئن آتاسینین اِو اهلئندن و شهر ساکئنلرئندن قورخدوغو اوچون ائشی گوندوز یوخ، گجه اتدی.
28شهر ساکئنلری سحر تزدن قالخیب گؤردولر کی، بَعَل قوربانگاهی کامئل داغیدیلیب و یانینداکی اَشِرا بوتو کسئلئب. قورولان تزه قوربانگاه اوستونده ده ائکئنجی گامیش یاندیرما قوربانی کئمی تقدئم اولونوب. 29آداملار بئربئرلرئنه ددئلر: «بو ائشی کئم ادئب؟» اونلار بونو آراشدیراندان سونرا ددئلر: «بو ائشی گؤرَن یوآشین اوغلو جِدعوندور.» 30شهر ساکئنلری یوآشا ددئلر: «اوغلونو بورایا گتئر کی، اؤلدورولسون. چونکی او، بَعَلئن قوربانگاهینی داغیدیب و یانینداکی اَشِرا بوتونو ده کسئب.» 31آمّا یوآش اونون ضئدّئنه چیخانلارین هامیسینا بله ددی: «بَعَلدن مگر سئز دئفاع ادهجکسئنئز؟ مگر سئز اونو قورتاراجاقسینیز؟ بَعَلدن طرفدارلیق ادن سحره قدر اؤلهجک. اگر او، حقئقتن، آللاهدیر، قوی اؤزو اؤزوندن دئفاع اتسئن، چونکی بئری اونون قوربانگاهینی داغیدیب.» 32بوندان سونرا جِدعونون آدی یِروببَعَل قویولدو، یعنی «قوی بَعَل اونونلا موبارئزه اتسئن.» چونکی او، بَعَلئن قوربانگاهینی داغیتمیشدی.
33بو واخت بوتون مئدیانلیلار، عَمالِقلیلر و باشقا شرق خالقلاری بئر یره ییغیلدیلار؛ و اوردون چایینی کچئب یئزرِعِل درهسئنده اوردوگاه قوردولار. 34ربّئن روحو جِدعونون اوستونه اِندی؛ جِدعون کَرهنای چالیب اَبئعِزِرلیلری اؤز یانینا چاغیردی. 35او بوتون مِنَسّهیه قاصئدلر گؤندَردی و اونلاری دا اؤز یانینا چاغیردی؛ سونرا آشِره، زِبولونا و نَفتالئیه قاصئد گؤندَردی. اونلار قاصئدلرئن پئشوازینا چیخدیلار.
36سونرا جِدعون تارییا ددی: «سؤز وردئیئن کئمی اگر ائسرایئلی منئم اَلئمله قورتاراجاقسان، 37قوی من خَرمَنئن اوستونه قویوندان قیرخیلان یون قویوم. اگر شح فقط یونو ائسلادسا، آمّا تورپاق قورو قالسا، اوندا بئلهجیم کی، سن، ددئیئن کئمی، ائسرایئلی منئم اَلئمله قورتاراجاقسان.» 38بله ده اولدو. جِدعون او گونون صاباحی تزدن قالخیب یونو سیخدی. یوندن بئر کاسا دولو سو چیخارتدی. 39سونرا جِدعون تارییا ددی: «قوی منئم ضئدّئمه قضبئن آلوولانماسین، گئنه بئر خاهئشئم وار. ائستهیئرم بو یونله بو ائشی بئر ده ائمتاحان اِدئم. ائندی قوی فقط بو یون قورو قالسین و بوتون یِر شِحله ائسلانمیش اولسون.» 40تاری او گجه بله ده اتدی. بوتون تورپاق شِحه بوروندو، لاکئن قیرخیلمیش یون قورو قالدی.
Currently Selected:
داورلر 6: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
