اِستِر 8
8
یهودئلرئن پادشاه طرفئندن مودافئعه‌سی
1اِله همئن گون پادشاه اَخَشوِروش یهودئلرئن دوشمنی هامانین اِوئنی ملکه اِستِره وردی. موردوکای پادشاهین حوضورونا گلدی، چونکی اِستِر موردوکایین کئم اولدوغونو پادشاها معلوم اتمئشدی. 2پادشاه هاماندان گری آلدیغی مؤهورلو اوزویو چیخاردیب موردوکایا وردی. اِستِر ده موردوکایی هامانین اِوئنه نظارتچی قویدو.
3بوندان سونرا اِستِر گئنه ده پادشاها دانیشیب، اونون آیاقلارینا دوشدو و آغلایا-آغلایا یالواردی کی، اَگَگلی هامانین یَهودئلره قَرَضله قوردوغو قصدئن قاباغینی آلسین. 4پادشاه قیزیل عصاصینی اِستِره اوزاتدی. اِستِر آیاغا قالخیب پادشاهین حوضوروندا دوردو. 5سونرا دا ددی: «اگر پادشاهین خوشونا گلسه، اگر اونون حوضوروندا لوطف تاپمیشام، اگر بو ائش پادشاهین گؤزونده دوز گؤرونور و منی بَیَنمئشدئر، قوی بئر فرمان یازیلسین کی، اَگَگلی هَمِدّاتا اوغلو هامانین قصد-قَرَضله پادشاهین بوتون وئلایتلرئنده یاشایان یهودئلری قیرماق اوچون یازدیغی مکتوبلاری لغو اتسئن. 6خالقیمین باشینا گلن بو موصئبته نجه دؤزه بئله‌رم؟ گؤزومون قاباغیندا قوحوملاریمین محو اولماسینا نجه دؤزه بئله‌رم؟» 7پادشاه اَخَشوِروش ملکه اِستِره و یهودی موردوکایا ددی: «باخ، هامانین اِوئنی اِستِره ورمئشم. هامانی دار آغاجیندان آسدیرمیشام، چونکی یهودئلرئن قصدئنه اَل اوزادیب. 8ائندی گؤزونوزده نجه خوش گؤرونور، پادشاهین آدیندا یهودئلره باشقا بئر مکتوب یازین و پادشاهین مؤهورلو اوزویو ائله مؤهورله‌یئن. چونکی پادشاهین آدیندا یازیلمیش و پادشاهین مؤهورلو اوزویو ائله مؤهورله‌نَن فرمانی هچ کئم لغو اده بئلمز.»
9اله او زامان اوچونجو آی یعنی سئوان آیینین ائیئرمی اوچونده پادشاهین مئرزه‌لری چاغیریلدی. موردوکایین هودّودان کوشا قدر یوز ائیئرمی یدّی وئلایتده‌کی یهودئلره، ساتراپلارا، والئلره، وئلایتلرئنئن ریئسلرئنه امر اتدئیی هر شی یازیلیب، هر وئلایته اؤز یازیسی ائله و هر خالقا اؤز دئلی ائله، یهودئلره ده اؤز یازی و دئللرئنده گؤندَ‌رئلدی.
10موردوکای پادشاه اَخَشوِروشون آدی ائله اونون امرئنی مکتوبلارا یازیب، پادشاهین مؤهورلو اوزویو ائله مؤهورله‌دی و چاپارلارلا کی، پادشاه اوچون بَسله‌نَن خوصوصی چاپار آتلارا مئنمئشدئلر، بو مکتوبلاری گؤندَ‌ردی. 11بو مکتوبلارا گؤره پادشاه هر شهرده یاشایان یهودئلره ائجازه وردی کی، ییغیلیب اؤز جانلارینی حئفظ اتسئنلر. اونلارا، آرواد و اوشاقلارینا هوجوم ادن هر مئلّتئن و یا هر وئلایتئن سئلاحلی دسته‌لرئنی قیریب، اؤلدوروب، یوخ اتسئنلر، اَملاکلارینی دا تالان اتسئنلر. 12پادشاه اَخَشوِروشون بوتون وئلایتلرئنده اون ائکئنجی آی اولان اَدار آیینین اون‌اوچو بو ائش اوچون موعیّن اولونموشدو. 13بو فرمانین صورتی هر وئلایتده قانون کئمی دست-خطه یازیلمالی و بوتون خالقلارا اعلان اولونمالی ائدی کی، یهودئلر همئن گون اؤز دوشمنلرئندن قئصاص آلماغا حاضیر اولسونلار. 14قاصئدلر پادشاها خئدمت ادن چاپار پادشاهین آتلارینا مئندئرئلدی و پادشاهین امری ائله تَلَسدئرئلئب تز یولا سالیندی. فرمان شوشَن قالاسیندا دست-خطله اعلان ادئلدی.
15موردوکای پادشاهین حوضوروندان باشیندا بؤیوک قیزیل تاج، آغ و لاجورد شاهانه لئباسدا، اَرغوانی نازئک کتان جوبّه ائله چیخدی. شوشَن شهری شادلیق ائچئنده هارای چکدی. 16آرتیق یهودئلرئن آراسیندا نور، شادلیق، سِوئنج و حؤرمت وار ائدی. 17پادشاهین امری و فرمانی هانسی وئلایته، هانسی شهره چاتیردی، اورادا یهودئلر اوچون شادلیق، سِوئنج، ضئیافت و بایرام گونو اولوردو. اؤلکه‌نئن باشقا خالقلاری آراسیندان بئر چوخو، یهودئلردن قورخدوقلاری اوچون یهودی اولدولار.
@ 2022 Korpu Company