تثنئیه 32
32
1«ای گؤیلر، قولاق آسین، قویون دانیشیم،
قوی یر اوزو آغزیمدان چیخان سؤزلری اشئتسئن.
2قوی تعلئمئم باهار یاغیشلاری کئمی تؤکولسون،
سؤزوم شح کئمی دوشسون،
چمن اوستونه دوشَن نارین یاغیش کئمی اولسون،
اوت اوستونه تؤکولَن سولارا اوخشاسین.
3چونکی ربّئن آدینی اعلان ادئرم!
تاریمیزین عظمتئنی مدح ادئن!
4او، قایادیر، ائشلری کامئلدئر،
چونکی بوتون یوللاری حاقدیر،
وفالی تاریدیر، حاقسیزلیق اوندا تاپیلماز،
صالح و دوز اولان اودور.
5اونون ضئدّئنه خیانت اتدئلر،
فاسئد اولدوقلارینا گؤره، اونون اؤولادلاری دیئللر،
اَیری و تَرسه بئر نسئلدئرلر.
6ربّه بله عوض ورئرسئنئز، ای آغیلسیز، آخماق خالق؟
مگر سئزی ساتین آلان او آتانیز دیئل؟
سئزی یارادان، سئزی برقرار ادن اودور.
7کچن گونلری یادینیزا سالین،
کچمئش نسئللرئن ائللرئنه باخین،
آتانیزدان سوروشون، او سئزه دئیَر،
آغساقّاللارینیزدان سوروشون، اونلار سئزه دانیشارلار.
8اوجالاردا اولان مئلّتلره ائرثی تورپاق بؤلرکَن،
بشر اؤولادلارینی آییرارکَن،
ائسرایئل اؤولادلارینین #32.8 «اؤلو دهنز طومارلاریندا» بو کلمهلرئن یرئنه «تاری اؤولادلارینین» گلئب سایینا گؤره
خالقلارا سرحد قویدو.
9چونکی ربّئن پایی اؤز خالقیدیر!
یعقوب اونون پایینا دوشَن ائرثئدئر.
10اونو کؤشَنده،
اولایان، بوش بئر صحرادا تاپدی.
اونو دؤورهلهدی، اونون قیدئنه قالدی،
گؤز بَبهیی کئمی اونو حئفظ اتدی.
11یوواسیندا بالالارینی اوچورماغا قیشقیرتیب،
اونلار اوستونده قاناد چالان قارتال کئمی،
او قانادلارینی آچدی و اونلاری توتدو،
اونلاری پَرلرئنئن اوستونده آپاردی.
12اونا یول گؤرسهدن فقط رب ائدی.
یانیندا اؤزگه بئر تاری یوخ ائدی.
13اونو یر اوزونون اوجالارینا مئندئردی،
زَمئنئن محصولوندان یِدئرتدی.
اونو قایادان سوزولَن باللا،
چاخماق داشیندان چکئلَن یاغلا اَمئزدئردی.
14اونو ائنَکلرئن قاتیغی ائله، سورونون سودو ائله،
قوزولارین پئیی ائله،
باشانداکی قوچلارلا، تَکهلرله،
لاپ یاخشی بوغدا ائله کؤکَلتدی.
اوزومون قانی ائله شراب ائچدئن،
15لاکئن یِشورون #32.15 «یِشورون» ائسرایئلئن بئر لَقَبی اولوب «دوز اولان» معناسینی ورئر. کؤکهلئب تَپئک آتدی،
کؤکهلئبسن، یوغونلاشیبسان، پئیلهشئبسن!
سونرا اونو یارادان تارینی ترک اتدی،
خئلاصکاری اولان قایایا گوستاخلیق اتدی.
16باشقا آللاهلارلا تارینی قیرته گتئردئلر،
ائیرنج عمللرله اونو قضبلَندئردئلر.
17تاری اولمایان ائبلئسلره،
تانیمادیقلاری آللاهلارا،
آتالارینین قورخمادیقلاری،
آخیر زامانلار تزه گلن آللاهلارا قوربان کسدئلر.
18سئز، سئزی حیاتا گتئرن قایانی آتدینیز.
سئزی یارادان تارینی یاددان چیخارتدینیز.
19رب بونو گؤروب اونلاری ردّ اتدی،
چونکی اوغوللاری و قیزلاری اونو قضبه گتئردئلر.
20او واخت رب ددی: ”اونلاردان اوزومو گئزلَدهجیم،
اونلارین عاقئبتئنئن نه اولاجاغینی گؤرهجیم.
چونکی اونلار تَرسه بئر نسئل،
وفاسیز اؤولادلاردیلار.
21منی تاری اولمایانلارلا قیرته گتئرئبلر،
بوش بوتلری ائله منی قضبلَندئرئبلر.
من ده اونلاری خالق اولمایان بئر خالقلا پاخیلّیغا سالاجاغام،
آخماق بئر مئلّتله قضبلَندئرهجیم.
22چونکی قضبئمدن بئر اود آلوولانیب،
اؤلولر دئیارینین دئبئنهجک یانیر.
دونیانی و نعمتلرئنی اودوب قورتاریر،
داغلارین بونؤورهلرئنی اودلاییر.
23من اونلارین اوستونه بلالار ییغاجاغام،
اوخلاریمی اونلارین طرفئنه آتاجاغام.
24قیتلیقدان تلف اولاجاقلار، وبادان قیریلاجاقلار،
آجی هلاکتدن یوخ اولاجاقلار.
وحشی حیوانلارین دئشلرئنی،
تورپاقدا سورونن ائلانلارین زَهَرئنی اونلارا ساری دؤندَرهجیم.
25اِشئکده قیلینج اونلاری اؤولادسیز ادهجک،
اِولرئنده دهشت حؤکم سورهجک،
جاوان اوغلانی، باکئره قیزی، سود اَمن کؤرپهنی، آغساچلی کئشئنی محو ادهجک.
26دِدئم: ”اونلاری پارچالایاجاغام،
اونلاری ائنسانلارین خاطئرهسئندن پوزاجاغام.“
27مگر دوشمنئن ائستِهزاسیندان قورخمادیم کی،
مبادا اونلارلا ساواشانلار سَهو آنلاییب دسئنلر:
”اؤز اَللرئمئز بئزه ظفر قازانیب،
بوتون بو ائشلری گؤرن رب دیئل.“
28چونکی اونلار دوشونجهسئز بئر مئلّتدئر،
اونلاردا فهم یوخدور.
29کاشکی، حئکمتلی اولوب بونو درک اتسَیدئلر،
کاشکی، عاقئبتلرئنی دوشونسَیدئلر.
30اگر اونلارین قایاسی اونلاری ساتماسایدی،
اگر رب اونلاری تسلئم اتمهسَیدی،
بئر آدام مئن نفری نجه قووا بئلردی؟
ائکی کئشی اون مئن نفری نجه قاچیردا بئلردی؟
31حقئقتن، اونلارین قایاسی بئزئم قایامیز کئمی دیئل،
حتّا دوشمنلرئمئز بونو قبول ادئر.
32تَنَکلری سودومداکی اوزوم آغاجلارینداندیر،
گومورا باغلارینداندیر.
اوزوملری زهرلیدئر،
سالخیملاری آجیدیر.
33شرابلاری ائلانلار زهریدئر،
اَفعئلرئن اؤلدوروجو زهریدئر.
34”مگر بونلارین هامیسی یانیمدا ساخلانمادی؟
بونلار مگر خزئنهلرئمده مؤهورلَنمهدئلر؟
35قئصاص منئمدئر، عوضئنی من ورهجیم.
واختی چاتارکَن آیاقلاری سوروشهجک،
چونکی اونلارین هلاک گونو یاخیندیر،
اجللری تز چاتار.“
36رب اؤز خالقینین حاقینی آلاجاق.
قوللارینین گوجونون قورتاردیغینی گؤرنده،
نه قولدان، نه آزاددان کئمسه قالمایاندا،
اونلارا رحم ادهجک.
37دئیهجک: ”هانی اونلارین آللاهلاری، هانی اونلارین سیغیناجاقلاری قایا؟
38قوربانلارینین پئیئنی یئیَن کئم ائدی؟
مایع تقدئملرئنئن شرابینی ائچَن کئم ائدی؟
قوی سئزه کؤمک اتمک اوچون قالخسینلار،
پناهگاهینیز اولسونلار.
39ائندی گؤرون کی، تاری فقط منم.
باشقاسی یوخدور.
منم اؤلدورَن و حیات ورن،
منم یارالایان و شفا ورن،
هچ کئم الئمدن قورتارا بئلمز.
40دوغرودان دا الئمی گؤیلره قالدیریب دیئرَم:
ابدی وارلیغیما آند اولسون کی،
41اگر شئمشک چیخان قیلینجیمی ائتئلدئب
عدالتی الئمه آلسام،
دوشمنلرئمدن قئصاص آلاجاغام،
مندن نئفرت ادنلردن عوض چیخاجاغام.
42اونلارین قانی ائله اوخلاریمی کِفلَندئرهجیم،
قیلینجیم اَتی،
قیریلانلارین، اسئر ادنلرئن قانینی،
دوشمن رهبرلرئنئن باشینی اوداجاق.“
43ای مئلّتلر، اونون خالقی ائله برابر سِوئنئن!
چونکی او، قوللارینین قان قئصاصینی آلاجاق،
دوشمنلرئندن عوض چیخاجاق،
اؤلکهسی و خالقی اوچون کفّاره ادهجک.»
44موسا نون اوغلو یوشَعله #32.44 عئبرانی متنئنده: «هوشِعهله» برابر گلئب، بو نغمهنئن بوتون سؤزلرئنی خالقین قاباغیندا ددی. 45موسا بوتون ائسرایئله بو سؤزلرئن هامیسینی دیئب قورتاراندا، 46اونلارا بله ددی: «بو گون سئزه بیان اتدئیئم سؤزلرئن هامیسینا اورَکدن باغلانین کی، اؤولادلارینیزا بو قانونون بوتون سؤزلرئنه دئقّتله عمل اتمهیی امر ادهسئنئز. 47چونکی بو سئزئن اوچون بوش بئر سؤز دیئل؛ حقئقتن کی، بو سؤزلر حیاتینیزدیر. بو سؤزلر مولک آلماق اوچون اوردون چایینی کچئب گدهجیئنئز تورپاقدا سئزه اوزون عؤمور ورهجکدئر»
موسانین اؤلومونون اوّلدن بئلدئرئلمهسی
48رب اله همئن گون موسا ائله دانیشیب اونا ددی: 49«اَرئحانین موقابئلئنده، موآب تورپاغیندا اولان بو عَبارئم داغینا، نِبو داغینا چیخ. ائسرایئل اؤولادلارینا مولک ورهجیئم کَنَعان تورپاغینی گؤر. 50قارداشین هارون حور داغیندا اؤلوب اجدادلارینا قوشولدوغو کئمی، سن ده چیخاجاغین داغدا اؤلوب خالقینا قوشولاجاقسان. 51چونکی سئن صحراسیندا، مِرئبا-قِدِش سولاریندا، ائسرایئل اؤولادلارینین قاباغیندا منئمله موقدّس کئمی رفتار اتمهدئن. 52اونا گؤره اؤلکهنی اوزاقدان گؤرهجکسن، لاکئن ائسرایئل اؤولادلارینا ورهجیئم تورپاغا گئرمیهجکسن.»
Currently Selected:
تثنئیه 32: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
