تثنئیه 18
18
لاوئلیلرله کاهئنلرئن پایی
1لاوئلی کاهئنلرئن و بوتون لاوی قبئلهسئنئن او بئری ائسرایئللیلرله بئرلئکده پایی و ائرثی اولمایاجاق. اونلار ربّه اودلا تقدئم ادئلَنلرله و ربّئن پایی ائله دویاجاقلار. 2لاوئلیلرئن هموطنلری آراسیندا ائرثی تورپاقلاری اولمایاجاق؛ اونلارین ائرثی رب اؤزودور، نجه کی، سؤز ورئب.
3خالق آراسیندا اؤکوز و یا قویون قوربانی تقدئم ادنلرئن کاهئنلره ورهجیی پای بو اولاجاق: قول، چَنه و ائچآلات. 4تاخیلینیزین، تزه شرابینیزین، زیتون یاغینیزین نوبارینی و قویونلارینیزدان قیرخدیغینیز ائلک یونو کاهئنلره ورئن. 5چونکی تارینیز رب اونلاری و اؤولادلارینی بوتون قبئلهلرئنئز آراسیندان سچئب کی، دائم ربّئن آدینا خئدمتده دایانسینلار. 6اگر بئر لاوئلی یاشادیغی ائسرایئل شهرلرئنئن بئرئندن اؤز گؤیلو ائله ربّئن سچهجیی یره گلسه، 7اورادا تاریسی ربّئن حوضوروندا دایانان لاوئلی هموطنلری کئمی، ربّئن آدینا خئدمت اتسئن. 8اونلارین پایی بئر اولاجاق مگر نه کی، آتا مولکونون ساتیشیندان اَله گتئرئر.
آیری مئلّتلرئن ائیرنج رسم-روسوملاری
9تارینیز ربّئن سئزه ورهجیی تورپاغا گئردئیئنئز زامان، او مئلّتلرئن ائیرنج رسم-روسوملارینی اؤیرهنئب تقلئد اتمهیئن. 10آرانیزدا اوغول و قیزینی اوددا قوربان ادن، فالچی، گلهجیی دئیَن، باخیجی، جادوگر، 11اووسونچو، جئنلرله رابئطه ساخلایان، روحلار و یا اؤلولری چاغیران اولماسین. 12بله ائش گؤرَنلر ربّه ائیرنجدئرلر؛ و اله بو ائیرنج ائشلره گؤره تارینیز رب اونلاری سئزئن قاباغینیزدان قوواجاق. 13تارینیز ربّئن گؤزو قاباغیندا کامئل اولون. 14چونکی تورپاقلارینی آلاجاغینیز بو مئلّتلرئن هامیسی گلهجیی دئیَنلرئن و فالچیلارین سؤزلرئنه قولاق آسیرلار. آمّا سنه گلئنجه؛ تارینیز رب سئزئن اوچون بونا ائجازه ورمئر.
گلهجک پیغمبر
15تارینیز رب سئزئن اوچون آرانیزدان، اؤز هموطنلرئنئز ائچئندن منئم کئمی بئر پیغمبر یتئرهجک. اونا قولاق آسین. 16چونکی خورِبده ییغیلدیغینیز گون، تارینیز ربدن بونو آرزو اتمئشدئنئز: ”قوی بئر ده تاریم ربّئن سَسئنی اشئتمهیئم و بئر داها بو بؤیوک آلووو گؤرمهیئم، یوخسا اؤلهرَم.“ 17او واخت رب منه ددی: ”ددئکلری دوغرودور. 18اونلار اوچون هموطنلری آراسیندان سنئن کئمی بئر پیغمبر یتئرهجیم و سؤزلرئمی اونون آغزینا قویاجاغام. او امر اتدئیئم هر شیی اونلارا دئیهجک. 19منئم آدیمدا دئیهجیی سؤزلره قولاق آسمایان آدامی، من اؤزوم جزالاندیراجاغام. 20لاکئن هانسی بئر پیغمبر اونا امر اتمهدئیئم سؤزو منئم آدیمدا دِمَیه جورعت اتسه، و یا آیری آللاهلارین آدیندا دانیشسا، او پیغمبر گرک اؤلدورولسون.“
21مومکوندور اورهیئنئزده دئیهسئنئز: ”بو سؤزون رَبدن اولوب-اولمادیغینی نجه بئلَک؟“ 22اگر بئر پیغمبر ربّئن آدیندا دانیشاندا، ددئیی سؤز باش ورمَزسه، و یا دوز چیخمازسا، اونو رب دمهمئشدئر. او پیغمبر گوستاخلیقلا دانیشیب. اوندان قورخمایین.
Currently Selected:
تثنئیه 18: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
