۲سمویئل 7
7
تارینین داوودا وردئیی وعده
(۱سال. ۱۷:۱-۱۵)
1داوود پادشاه اؤز اِوئنده ساکئن اولاندا و رب داوود پادشاها اطرافیندا اولان بوتون دوشمنلرئنئن اَلئندن راحاتلیق ورن زامانلاردا، 2پادشاه پیغمبر ناتانا ددی: «باخ، من سئدر آغاجیندان تئکئلَن بئر سارایدا یاشاییرام، لاکئن تارینین ساندیغی بئر چادیردا قالیر.» 3ناتان پادشاها ددی: «گت، اورهیئندهکی نئیّتئنی یرئنه یتئر، چونکی رب سنئنلهدئر.»
4لاکئن او گجه ربّئن سؤزو ناتانا نازئل اولوب ددی: 5«گت، قولوم داوودا دِه: رب دیئر: ”مگر سن منه یاشاماق اوچون اِو تئکهجکسن؟ 6ائسرایئل اؤولادلارینی مئصئردن چیخارتدیغیم گوندن بو گونه قدر من هچ بئر اِوده یاشامامیشام، آنجاق بئر سیّار چادیردا، حتّا خیمهده اورایا-بورایا کؤچموشم. 7بوتون او یِرلردهکی ائسرایئل اؤولادلاری ائله بئرلئکده گَزدئم، مگر اولوب کی، ائسرایئل قبئلهلرئندن بئرئنه دئیَم: ‹نئیه منه سئدر آغاجیندان بئر اِو تئکمهدئنئز؟› او قبئلهلره کی، خالقیمین چوبانلیغینی اونلارین اوستونه قویدوم؟“ 8ائندی قولوم داوودا دِه: قوشونلار ربّی بله دیئر: ”من سنی اوتلاقلاردا قویون اوتاراندا گؤتوروب، خالقیم ائسرایئله حؤکمدار اتدئم. 9گتدئیئن هر یرده سنئنله اولدوم و سنئن قاباغیندان بوتون دوشمنلرئنی قیریب آتدیم. آدینی دا دونیاداکی بؤیوکلرئن آدی کئمی بؤیوک ادهجیم. 10خالقیم ائسرایئل اوچون بئر یر تعیئن ادئب اونلاری اورادا ساکئن ادهجیم کی، اؤز یوردلاریندا یاشاسینلار و بئر داها نه پرئشان اولسونلار نه ده شر آداملار اوّللر کئمی اونلارا ظولم اتسئنلر، 11حتّا او گوندن کی، خالقیم ائسرایئل اوستونه داورلر تعیئن اتدئم. من سئزه بوتون دوشمنلرئنئز اَلئندن راحاتلیق ورهجیم.“ رب سنه بونو دا بئلدئرئر کی، رب اؤزو سنه اِو تئکهجک. 12”عؤمرون باشا چاتیب آتالارینلا یاتاندا، یرئنه سنئن نسلئندن یعنی بِلئندن گلن اؤولادینی قالدیراجاغام و اونون پادشاهلیغینی برقرار ادهجیم. 13او منئم آدیم اوچون اِو تئکهجک و اونون شاهلیق تختئنی ابدهجک برقرار ادهجیم. 14من اونا آتا، او دا منه اوغول اولاجاق. گوناه ادنده اونو ائنسانلارین دَیَنهیی ائله، بشر اؤولادلارینین کؤتَکلری ائله ووراجاغام. 15لاکئن شفقتئم اوندان آیریلمایاجاق، نجه کی، شفقتئمی سنئن قاباغیندان گؤتوردویوم شاعولدان گؤتوردوم. 16سنئن نسلئن و پادشاهلیغین منئم حوضورومدا ابدهجک سورهجک و تختئن ابدهجک پایدار قالاجاق.“» 17ناتان داوودا بوتون بو سؤزلری و بوتون بو وحیی نقل اتدی.
داوودون دوعاسی
(۱سال. ۱۷:۱۶-۲۷)
18داوود پادشاه ائچهری کچدی و ربّئن حوضوروندا اوتوروب ددی: «ای پروردئگار رب، من کئمم و نسلئم کئمدئر کی، سن منی بو یره چیخارتدین؟ 19ای پروردئگار رب، سنئن گؤزونده بو دا کئچئک گؤروندو، حله بو قولونون نسلئنئن گلهجیی حاقّیندا دا خبر ورئبسن. مگر ائنسانلارلا بله رفتار ادئرسن، ای پروردئگار رب؟ 20داوود سنه داها نه دئیه بئلر؟ ای پروردئگار رب، سن بو قولونو تانیییرسان! 21سن بوتون بو بؤیوک شیلری قولونا باشا سالماق اوچون، هم ده اؤز سؤزونون خاطئری اوچون اؤز اورهیئنجه ادئبسن. 22بونون اوچون، ای پروردئگار رب، سن بؤیوکسن. قولاقلاریمیزلا اشئتدئکلرئمئزئن هامیسینا گؤره سنئن کئمئسی هچ یوخدور و سندن باشقا تاری یوخدور. 23یر اوستونده خالقین ائسرایئل کئمی بئر مئلّت مگر وار؟ ای تاری، سن اونو اؤزونه خالق اتمک اوچون ساتین آلماغا گتدئن کی، اؤزونه شؤهرت قازاناسان و اونلار اوچون بؤیوک ائشلر و اؤلکَن اوچون خارئقهلی ائشلر ادهسن؛ بله کی، سن مئصئردن ساتین آلدیغین اؤز خالقین قاباغیندان مئلّتلری و اونلارین آللاهلارینی قوودون. 24خالقین ائسرایئلی اؤزون اوچون ابده کئمی برقرار اتدئن و سن، یارب، اونلارین تاریسی اولدون.
25ائندی ده، یارب تاری، بو قولون و اونون نسلی حاقّیندا ددئیئن سؤزو ابدی ساخلا و ددئیئنه عمل ات. 26قوی دیئلسئن: ”قوشونلار ربّی ائسرایئلئن اوستونه تاریدیر.“ و بلهجه آدین ابدهجک اوجالدیلسین. و قولون داوودون نسلی سنئن حوضوروندا پایدار اولسون. 27چونکی سن قوشونلار ربّی، ائسرایئلئن تاریسی بو قولونا وحی گؤندَرئب ددئن: ”سنه اِو تئکهجیم.“ اونا گؤره ده قولون جسارت تاپدی کی، سنه بو دوعانی اتسئن. 28ای پروردئگار رب، سن تاریسان، سنئن سؤزلرئن حقئقتدئر و بو قولونا بو یاخشی شیی وعده ورئبسن. 29قوی بو قولونون نسلئنه برکت ورمک سنئن گؤزونه خوش گلسئن و سنئن حوضوروندا ابدهجک قالسین. چونکی سن ای رب پروردئگار، دانیشیبسان. قوی بو قولونون نسلی سنئن برکتئنله ابدئلئک برکت آلسین!»
Currently Selected:
۲سمویئل 7: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
