۲سمویئل 14
14
اَبشالومون اورشلئمه قایتاریلماسی
1صِرویا اوغلو یوآب باشا دوشموشدو کی، پادشاه اَبشالومون حسرتئنی چکئر. 2بونا گؤره ده تِقوعهیه آدام گؤندَرئب اورادان حئکمتلی بئر آرواد گتئرتدی و اونا ددی: «خاهئش ادئرم، اؤزونو یاسلی آدام کئمی گؤرسد. یاس پالتاری گِیئن، باشینا زیتون یاغی سورتمه، اؤزونو اله بئری بَنزَت کی، اله بئل، اؤلو اوچون چوخدان بَری یاسلیدیر. 3سونرا پادشاهین یانینا گت و اونونلا بله دانیش.» بلهجه یوآب آروادا نه دمک لازیم اولدوغونو اؤیرَتدی.
4تِقوعهلی آرواد پادشاهین حوضوروندا گلنده اوزو اوسته یره دوشوب تعظئم اتدی و اونا بله ددی: «کؤمک ات، ای پادشاه!» 5پادشاه اونا ددی: «دردئن نهدئر؟» آرواد جاواب وردی: «حقئقتن، من دول بئر آروادام، اَرئم اؤلوب. 6کنئزئنئن ائکی اوغلو وار ائدی. بئر گون اونلارین ائکئسی ده چؤلده بئر-بئری ائله ساواشدیلار. اورادا اونلاری آییران هچ کئم یوخ ائدی و بئری او بئرئنی ووروب اؤلدوردو. 7ائندی بوتون عایئله بو کنئزئنه ضئدّ چیخیب دیئرلر: ”قارداش قاتئلئنی بئزه ور، اؤلدوردویو قارداشینین جانی عوضئنه اونو اؤلدورَک، قوی مئراثا وارئث اولان قارداش دا هلاک اولسون.“ بلهجه اونلار اوجاغیمین قالان کؤزونو ده سؤندورهجکلر و اَرئمئن یر اوزونده نه آدی، نه ده یادئگاری قالاجاق.»
8پادشاه آروادا ددی: «اِوئنه قاییت. من سنئن حاقّیندا فرمان ورهرم.» 9تِقوعهلی آرواد پادشاها ددی: «آغام پادشاه، گوناهین قوی منئم و آتامین نسلی اوستونه دوشسون! قوی پادشاهلا تختی گوناهسیز قالسین!» 10پادشاه ددی: «کئم سنه بئر سؤز دِسه، اونو منئم یانیما گتئر؛ او سنه آرتیق توخونمایاجاق.» 11آرواد ددی: «خاهئش ادئرم، پادشاه، تاریسی ربّی خاطیرلاسین اِله کی، قان قئصاصینی آلان، هلاک اتمَیه آرتیق چالیشماسین. یوخسا اونلار منئم اوغلومو هلاک ادهجکلر.» داوود ددی: «وار اولان رب حاقّی، اوغلونون باشیندان بئر توک بِله، اَسکئک اولمایاجاق.»
12او واخت آرواد ددی: «خاهئش ادئرم، ائجازه ور، کنئزئن آغام پادشاها بئر سؤز دانیشسین.» او ددی: «دِه.» 13آرواد ددی: «اگر بلهدئر، بس نه اوچون تاری خالقینین ضئدّئنه بو جور ائش گؤرورسن؟ چونکی پادشاهین بو سؤزو اونون اؤزونو ده تقصئرکار ادئر. اونا گؤره کی، آوارا اتدئیی آدامی قایتاریب گری گتئرتمئر. 14هامیمیز اؤلهجیئک، یره داغیلان و تزهدن بئر یره ییغیلمایان سو کئمئیئک. لاکئن تاری جانی آلماز، بئر چاره دوشونَر کی، آوارالیغا دوشَن آدام، اؤزوندن اوزاق دوشمهسئن. 15ائندی آغام پادشاها بو سؤزو دِمَک اوچون گلمهیئمئن سببی بودور کی، خالق منی قورخودوب. اونا گؤره ده بو کنئزئن ددی: ”قوی ائندی گدئب پادشاهلا دانیشیم، بلکه پادشاه کنئزئنئن خاهئشئنی یرئنه یتئرَر. 16اونا گؤره کی، پادشاه بو کنئزئنی اِشئدَر و او آدامدان قورتارار کی، ائستهیئر هم منی، هم ده اوغلومو تارینین ائرث وردئیئندن آتسین.“» 17او واخت کنئزئن دوشوندو: «خاهئش ادئرم، آغام پادشاهین سؤزو منه تسّلی ورسئن، چونکی یاخشینی-پئسی باشا دوشمکده تارینین مَلهیی نجهدئر، آغام پادشاه دا الهدئر. قوی رب تارین سنه یار اولسون!»
18بو سؤزدن سونرا پادشاه آروادا جاواب ورئب ددی: «سندن بئر شی سوروشاجاغام، خاهئش ادئرم هچ بئر شیی مندن گئزلَتمه.» آرواد ددی: «آغام پادشاه، بویور، خاهئش ادئرم.» 19پادشاه ددی: «آیا سنئن بو ائشلرئنئن هامیسیندا یوآبین دا اَلی وار؟» آرواد جاواب وردی: «سنئن جانین اوچون دیئرم کی، آغام پادشاهین سؤزوندن هچ کئم نه صاغا، نه ده سولا دؤنه بئلر. دوغرودان دا قولون یوآب منه امر اتدی و بو سؤزلرئن هامیسینی کنئزئنه او، اؤیرَتدی. 20قولون یوآب بونو ائشئن گؤرونوشونو دیئشمک اوچون بله اتدی. لاکئن آغام تارینین مَلهیی قدر حئکمتلیدئر، یر اوزونده اولوب-کچن هر شیی بئلئر.»
21پادشاه یوآبا ددی: «یاخشی، اونو ادهرم. گت، او جاوانی، اَبشالومو گری گتئر.» 22یوآب اوزو اوسته یره دوشدو و تعظئم ادئب پادشاها تبرئک ددی. سونرا یوآب ددی: «آغام پادشاه، بو گون سنئن گؤزونده لوطف تاپدیغینی بو قولون بئلئر، چونکی پادشاه قولونون خاهئشئنه عمل اتدی.» 23بلهجه یوآب دوروب گِشورا گتدی و اَبشالومو اورشلئمه گتئردی. 24لاکئن پادشاه ددی: «قوی او اؤز اِوئنه قاییتسین، منئم گؤزومه گؤرونمهسئن.» بلهجه اَبشالوم اِوئنه قاییتدی و پادشاهین گؤزونه گؤرونمهدی.
25بوتون ائسرایئلده هچ کئم یوخ ائدی کی، یاخیشیقلیغینا گؤره، اَبشالوم قدر تعرئفلنسئن. تپهدن دیرناغا قدر اوندا بئر عیئب یوخ ائدی. 26هر ائلئن آخیریندا ساچینی اونا آغیرلیق اتدئیی اوچون کَسَردی، باشیندان ساچینی کسنده ساچی پادشاه تَرهزئسی ائله ائکی یوز شِکِل#14.26 پادشاه تَرهزئسی ائله ائکی یوز شِکِل تقرئبن ۵/۲ کئلو گلردی. 27اَبشالومون اوچ اوغلو و تامار آدیندا بئر قیزی وار ائدی. تامار چوخ گؤزل بئر آرواد اولموشدو.
28اَبشالوم ائکی ائل تامام اورشلئمده قالدی و پادشاهین اوزونو گؤرمهدی. 29سونرا یوآبین یانینا آدام گؤندَردی کی، اونو پادشاهین یانینا گؤندَرسئن. آمّا یوآب ائستمهدی کی، اونون یانینا گلسئن. اَبشالوم ائکئنجی دفه یوآبین یانینا آدام گؤندَردی، او گئنه ده ائستمهدی کی، گلسئن. 30سونرا اَبشالوم قوللارینا ددی: «باخین، یوآبین زمئسی منئمکئنه بئتئشئکدئر و اورادا اونون آرپاسی وار. گدئن اورایا اود وورون.» اَبشالومون قوللاری گدئب زمئیه اود ووردولار. 31یوآب دوروب اَبشالومون اِوئنه گلدی و اونا ددی: «نئیه سنئن قوللارین گلئب منئم زمئمه اود ووردولار؟» 32اَبشالوم یوآبا ددی: «باخ سنئن یانینا آدام گؤندَرئب ددئم: ”بورایا گل کی، سنی پادشاهین یانینا گؤندَرئم کی، اونا دئیهسن: من گِشوردان بورایا نه اوچون گلمئشم؟ اورادا قالسایدیم، منئم اوچون بوندان داها یاخشی اولاردی. بونا گؤره ائندی قوی پادشاهین اوزونو گؤروم و اگر خاطام وارسا، قوی منی اؤلدورسون.“» 33یوآب دا پادشاهین یانینا گلئب بونو اونا بئلدئردی. پادشاه اَبشالومو چاغیردی. اَبشالوم پادشاهین یانینا گدئب اونون قاباغیندا اوزو اوسته یره تعظئم اتدی و پادشاه اونو اؤپدو.
Currently Selected:
۲سمویئل 14: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
