۱سمویئل 9
9
شاعولون پادشاهلیغا سچئلمهسی
1بِنیامئندن اَفیاَخ اوغلو بِکورَت اوغلو صِرور اوغلو اَبیاِل اوغلو قئش آدلی بئر آدام وار ائدی. بو آدام سؤزو کچن بئری ائدی. 2اونون شاعول آدلی جاوان و یاراشیقلی اوغلو وار ائدی و ائسرایئل اؤولادلاری آراسیندا اوندان یاراشیقلیسی یوخ ائدی. او، خالقین هامیسیندان بئر بویون اوجا ائدی.
3شاعولون آتاسی قئشئن اِششَکلری ائتمئشدی. قئش، اوغلو شاعولا ددی: «قالخ، نؤکرلردن بئرئنی یانینا آل، گت، اِششَکلری آختار.» 4اونلار اِفرایئمئن داغلیق بؤلگهسئنی گَزدئلر و شالئشا دئیاریندان کچدئلر، لاکئن اِششَکلری تاپمادیلار. شَعلئم دئیارینی دولاندیلار، اِششَکلر اورادا دا دیئلدی. سونرا بِنیامئن تورپاغینی گَزدئلر، لاکئن اِششَکلری تاپمادیلار. 5بوندان سونرا صوف بؤلگهسئنه گلدئلر و شاعول یانینداکی نؤکرئنه ددی: «گل قاییداق، یوخسا آتام اِششَکلری یاددان چیخاردیب بئزئم اوچون نئگاران اولاجاق.» 6نؤکری اونا ددی: «باخ بو شهرده بئر تاری آدامی وار. او، مؤحترم بئر آدامدیر و نه دیئر، هامیسی حتمن دوغرو چیخیر. گل اورایا گِدَک، بلکه بئزه گدهجیئمئز یولو او گؤرستدی.» 7شاعول نؤکرئنه ددی: «اگر گِتسَک، او آداما نه آپاراق؟ آرتیق توربالاریمیزدا چؤرک قورتاریب و تاری آدامینا ورمک اوچون بئر هدئیّهمئز یوخدور. مگر نهیئمئز وار؟» 8نؤکر شاعولا جاواب ورئب گئنه ددی: «باخ اَلئمده دؤردده بئر شِکِل#9.8 تقرئبن ۳ گرم گوموش وار. من اونو تاری آدامینا ورهرم، او دا بئزه یولوموزو گؤرسهدَر.» 9(اَوّللر ائسرایئلده تارینین ائرادهسئنی بئلمک اوچون گدنده آداملار بله دئیَردئلر: «گل گؤروجونون یانینا گِدَک.» او واخت پیغمبرلری گؤروجو چاغیریردیلار.) 10او واخت شاعول نؤکرئنه ددی: «یاخشی دیئرسن، گل گِدَک.» بلهجه اونلار تاری آدامینین اولدوغو شهره گتدئلر.
11اوزو یوخاری یولدان شهره چیخاندا، جاوان قیزلارا راست گلدئلر کی، سو چکمَک اوچون شهردن چیخیردیلار. اونلارا ددئلر: «آیا گؤروجو بورادادیر؟» 12اونلارا جاواب ورئب ددئلر: «بورادادیر، سئزدن قاباقدادیر. تَلهسئن، اله بو گون شهره گلئب، چونکی خالق بو گون پرستئشگاهدا قوربان کَسهجک. 13شهره گئرن کئمی اونو یمک اوچون پرستئشگاها قالخمازدان اوّل تاپارسینیز، اونا گؤره کی او گلمهیئنجه خالق یِمَیه باشلاماز. چونکی گرک قوربانا برکت ورسئن، سونرا چاغیریلانلار یئیَرلر. تِز قالخاسینیز، اونا چاتارسینیز.» 14اونلار شهره گتدئلر. شهره گئرَرکَن سمویئله راست گلدئلر کی، پرستئشگاها چیخیردی.
15شاعول گلمهمئشدن بئر گون اوّل رب سمویئله بونو بئلدئرئب دمئشدی: 16«صاباح بو واختلار سنئن یانینا بِنیامئن تورپاغیندان بئر آدام گؤندَرهجیم. اونو منئم خالقیم ائسرایئللیلره باشچی آدیندا گرک مسح ادهسن. فئلئسطلیلرئن اَلئندن خالقیمی او قورتاراجاق. چونکی خالقیمی گؤرموشم. اونا گؤره کی، فریادی گلئب منه چاتیب.»
17سمویئل شاعولو گؤرنده رب اونا ددی: «باخ، سنه ددئیئم بو آدام خالقیما حؤکمرانلیق ادهجک.» 18شاعول دروازادا سمویئله یاخینلاشیب ددی: «خاهئش ادئرم، گؤروجونون اِوئنئن هارادا اولدوغونو منه گؤرسدهسئنئز.» 19سَمویئل شاعولا جاواب وردی: «گؤروجو منم، مندن قاباق پرستئشگاها چیخین. بو گون منئمله برابر یمک یئیهجکسئنئز، صاباح آچیلاندا سئزی یولا سالارام، اورهیئنده اولانلارین هامیسینی دا سئزه بئلدئرهرم. 20اوچ گون قاباق ائتَن اِششَکلرئنه گلئنجه، اونلارین فئکرئنی چکمه، آرتیق تاپیلیبلار. بوتون ائسرایئل نهیئن حسرتئندهدئر؟ مگر سن و آتانین اِو اهلی اوچون دیئل؟» 21شاعول جاواب وردی: «مگر من ائسرایئل قبئلهلرئنئن لاپ کئچئیی اولان بِنیامئندن دیئلم؟ مگر نسلئم بِنیامئن قبئلهسئنئن نسئللرئنئن لاپ کئچئیی دیئل؟ بس نه اوچون منه بله سؤز دیئرسئنئز؟»
22سمویئل شاعوللا نؤکری گؤتوروب اوتاغا آپاردی و اوتوز نفره قدر چاغیریلمیش آداملارین آراسیندا باش طرفده اونا یِر وردی. 23سمویئل آشپازا ددی: «او پایی بورایا گتئر کی، سنه ورئب ددئم: ”بونو بئر یانا آیری قوی.“» 24آشپاز بود و اونون اوستونده اولانی شاعولون قاباغینا قویدو. سمویئل ددی: «بو سنئن اوچون آیریلان پایدیر! بویور یِه. بونو سنئن اوچون ساخلادیم کی، تعیئن اتدئیئم گون چاغیردیغیم خالقلا بئرلئکده یئیهسن.» بلهجه او گون شاعول سمویئلله بئرلئکده یمک یِدی.
25اونلار پرستئشگاهدان شهره اِندئلر، سمویئل شاعولا اِوئن دامیندا صؤحبت اتدی. 26اونلار اِرکَن قالخدیلار. سحر آچیلاندا سمویئل شاعولو دامدان چاغیریب ددی: «دور، سنی یولا سالیم.» او دا قالخیب سمویئلله بئرلئکده باییرا چیخدی. 27اونلار شهر کنارینا اِنَرکَن، سمویئل شاعولا ددی: «نؤکره دِه کی، قاباقدا گتسئن و بئزی کچسئن. آمّا سن ائندی آیاق ساخلا کی، تارینین سؤزونو سنه بئلدئرئم.»
Currently Selected:
۱سمویئل 9: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
