۱سمویئل 20
20
یوناتانلا داوودون عهدی
1داوود راماداکی نایوتدان قاچدی و گلئب یوناتاندان سوروشدو: «مگر من نه اتمئشم؟ تقصئرئم نهدئر؟ آتانین ضئدّئنه نه گوناهیم وار کی، جانیمین قصدئنه دوروب؟» 2یوناتان اونا جاواب وردی: «ائراق اولسون! سن اؤلمهیهجکسن. باخ، آتام منه دِمهمئش هچ بئر ائش گؤرمَز، ائستر بؤیوک اولسون، ائستر کئچئک. اونا گؤره ده نه اوچون آتام مندن بو ائشی گئزلَتسئن؟ بله شی اولا بئلمز!» 3داوود گئنه آند ائچئب ددی: «آتان یاخشی بئلئر کی، من سنئن گؤزونده لوطف تاپمیشام. اونا گؤره دیئب: ”قویمایین یوناتان بونو بئلسئن، یوخسا ناراحات اولار.“ لاکئن وار اولان ربّه و جانینا آند اولسون، منئمله اؤلوم آراسیندا، حقئقتن، آنجاق بئر قَدَم وار.» 4یوناتان داوودا ددی: «سن نه دئیهسن، اونو دا ادهجیم.» 5داوود یوناتانا ددی: «صاباح تزه آی مراسئمئدئر و قطعن پادشاهلا یِمَیه اوتورمالییام. لاکئن سن منه اوچونجونون آخشامیناجاق ائجازه ور، گدئب چؤلده گئزلهنئم. 6اگر آتان منئم یوخلوغومو آنلاسا، او واخت دِه کی، داوود اؤز شهری بیتلِحِمه دَیمَک اوچون مندن ائجازه ائستهدی. چونکی اورادا بوتون عایئلهسئنئن ائلّئک قوربانی وار. 7اگر دِسه: ”لاپ یاخشی.“ دِمهلی سنئن قولون سالاماتدیر، یوخ، اگر قضبلَنسه، اوندا او منه پئسلئک اتمک نئیّتئندهدئر. 8بونا گؤره بو قولونا خیئرخاهلیق ات، چونکی قولونو اؤزونله ربّئن عهدئنه سالدین. لاکئن اگر منئم تقصئرئم وار، اِله سن اؤزون منی اؤلدور، نه اوچون منی آتانین یانینا آپاراسان؟» 9یوناتان ددی: «اصلا، بو سنئن باشینا گلمَز! آتامین سنه پئسلئک اتمک نئیّتئنده اولدوغونو بئلسَیدئم، سنه مگر خبر ورمَزدئم؟» 10داوود یوناتانا ددی: «آتان اگر سنه بو بارهده بَرک بئر جاواب ورسه، بونو منه کئم بئلدئرَر؟» 11یوناتان داوودا ددی: «گل چؤله چیخاق.» ائکئسی ده چؤله چیخدیلار.
12سونرا یوناتان داوودا ددی: «ائسرایئلئن تاریسی رب شاهئد اولسون! صاباح و یا او بئرئسی گون بو واختلاراجاق من آتامدان فئکرئنی اؤیرَنمئش اولارام. اَگَر، حقئقتن، داوودون ضئدّئنه فئکری یاخشی اولسا، مگر بو خبری سنه چاتدیرمارام؟ 13یوخ، اگر آتامین خوشونا بو گلسه کی، سنه پئسلئک اتسئن و من بونو سنه بئلدئرمهسَم کی، سالامات چیخیب گدهسن، رب یوناتانا بِلهسئنی و بوندان بَتَرئنی اتسئن. رب نجه آتاملا اولوب، سنئنله ده اِله اولسون. 14سن منئم حیاتیم بویونجا، منه ربّئن مهرئبانلیغینی گؤرسد کی، اؤلمهیئم. 15بو مهرئبانلیغی رب داوودون بوتون دوشمنلرئنی یر اوزوندن سئلَن زامان دا هچ واخت اِوئمدن کسمیهجکسن.» 16بلهجه یوناتان داوود نسلی ائله عهد باغلاییب ددی: «قوی رب داوودون دوشمنلرئنی اؤزو جزالاندیرسین!» 17یوناتان داوودا اولان سِوگئسئنه گؤره بئر ده اونا آند ائچدئردی، چونکی اونو اؤز جانی کئمی سِوئردی.
18یوناتان ددی: «صاباح تزه آی مراسئمئدئر، یِرئن بوش اولدوغو اوچون اورادا اولمادیغین باشا دوشولهجک. 19اوچ گون قالاندان سونرا، تزدن بورا اِنَرسن و اوّل گئزلَندئیئن یره گلئب ”اِسِل“ #20.19 عئبرانی دئلئنده «آیریلیق»داشینین یانیندا اوتورارسان. 20من هَدفه آتان کئمی، داشین بئر طرفئنه اوچ اوخ آتارام. 21سونرا ”گت اوخلاری تاپ“ دِئیب بئر اوشاق گؤندَرهرم. باخ، اگر اوشاغا مخصوصَن دِسَم کی: ”اوخلار سنئن بو یانیندادیر، گت اونلاری اورادان گؤتور.“ سن یانیما گل، چونکی سنئن اوچون سالاماتلیقدیر و وار اولان ربّه آند اولسون، هچ بئر شی یوخدور. 22لاکئن اگر اوشاغا ”اوخلار سندن اوزاقدادیر“ دِسَم، اؤز یولونلا چیخ گت، چونکی رب سنی اوزاغا گؤندَرئب. 23آرامیزدا دانیشدیغیمیز سؤزه گلئنجه، بئل کی، رب ابده کئمی سنئنله منئم آرامدادیر.»
24بلهجه داوود چؤلده گئزلَندی. تزه آی مراسئمی باشلایارکَن پادشاه یِمَیه اوتوردو. 25همئشهکی کئمی پادشاه اؤز یرئنده، دووارین یانیندا اوتوردو. یوناتان آیاغا قالخدی و آبنِر شاعولون یانیندا اوتوردو. آمّا داوودون یری بوش ائدی. 26شاعول او گون بئر سؤز دِمهدی، چونکی دوشونوردو: «داوودون باشینا بئر شی گلمئش اولمالی، طاهئر دیئل، حَتمن طاهئر دیئل.» 27او گونون صاباحیسی یعنی تزه آی مراسئمئنئن ائکئنجی گونو داوودون یری گئنه ده بوش ائدی. اونون اوچون شاعول اوغلو یوناتاندان سوروشدو: «نه اوچون یَسّهنئن اوغلو نه دونَن، نه ده بو گون یِمَیه گلمهیئب؟» 28یوناتان شاعولا جاواب وردی: «داوود بیتلِحِمه گتمک اوچون مندن ائصرارلا ائجازه ائستهدی. 29منه ددی: ”خاهئش ادئرم، ائجازه ور گدئم، چونکی شهرده عایئلهمئزئن قوربانی وار. بؤیوک قارداشیم منه امر ادئب کی، اورادا اولوم. اگر ائندی گؤزونده لوطف تاپمیشام، خاهئش ادئرم، منی بوراخ، گدئم قارداشلاریملا گؤروشوم.“ بونا گؤره ده پادشاهین سوفرهسئنه گله بئلمهیئب.»
30یوناتانین ضئدّئنه شاعولون قضبی آلوولاندی و اونا ددی: «ای خیانتکار و اَیری آروادین اوغلو! یَسّهنئن اوغلو داوودون طرفدارلیغینی اتمهیئندن مگر خبرئم یوخدور؟ بو هم سنه، هم ده سنی دوغوران آنانا بیآبیرچیلیقدیر. 31نه قدر کی یَسّهنئن اوغلو یِر اوزونده یاشاییر، نه سن برقرار اولاجاقسان، نه ده پادشاهلیغین. ائندی آدام گؤندَر، و اونو یانیما گتئرت، چونکی او اؤلوم جزاسینا لایئقدئر.» 32یوناتان آتاسی شاعولا جاواب وردی: «نه اوچون اؤلمهلیدئر؟ مگر نه ادئب؟» 33شاعول یوناتانی اؤلدورمک اوچون نئزه آتدی. او واخت یوناتان باشا دوشدو کی، آتاسی، داوودو اؤلدورمک نئیّتئندهدئر. 34یوناتان آلوولانان قضبله سوفره اوستوندن قالخدی. تزه آیین ائکئنجی گونونده یمک یِمهدی، چونکی آتاسینین داوودا نامردلئک اتدئیی اوچون قانی قارالمیشدی.
35او گونون صاباحی یوناتان داوودلا تعیئن اتدئیی واخت چؤله گتدی. یانیندا کئچئک بئر اوشاق وار ائدی. 36او، اوشاغا ددی: «قاچ، ائندی آتاجاغیم اوخلاری تاپ.» اوشاق قاچارکَن یوناتان اونون باشی اوستوندن بئر اوخ آتدی. 37اوشاق یوناتانین آتدیغی اوخون یانینا چاتاندا، یوناتان اوشاغی آرخادان چاغیریب ددی: «اوخ سندن اوزاقدا مگر دیئل؟» 38یوناتان اوشاغی گئنه آرخادان چاغیریب ددی: «تِز اول، قاچ، دایانما!» یوناتانین نؤکری اوخو گؤتوروب آغاسینین یانینا گلدی. 39لاکئن اوشاغین هچ نهدَن خبری یوخ ائدی. بو ائشی آنجاق یوناتانلا داوود بئلئردی. 40یوناتان سئلاحلارینی اوشاغا ورئب ددی: «گت، بونلاری شهره آپار.» 41اوشاق گِدندن سونرا، داوود داشین جنوب طرفئندن چیخیب اوزو اوسته یره دوشدو و اوچ دفه اونون موقابئلئنده اَیئلدی. اونلار اؤپوشوب آغلاشدیلار، داوود داها چوخ آغلادی. 42یوناتان داوودا ددی: «صاغ-سالامات گت، چونکی ائکئمئز ده ربّئن آدینا آند ائچئب دمئشئک: ”سنئنله منئم آرامدا و سنئن اؤولادلارینلا منئم اؤولادلاریم آراسیندا ابده کئمی رب اولاجاق“» بوندان سونرا داوود قالخیب اؤز یولو ائله گتدی، یوناتان دا شهره قاییتدی.
Currently Selected:
۱سمویئل 20: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
