۱سمویئل 19
19
یوناتان داوود اوچون شفاعت ادئر
1شاعول، اوغلو یوناتانا و بوتون اعیانلارینا تاپشیردی کی، داوودو اؤلدورسونلر. لاکئن شاعولون اوغلو یوناتانین داووددان چوخ خوشو گلئردی. 2یوناتان داوودا خبر ورئب ددی: «آتام شاعول ائستهیئر سنی اؤلدورسون. اونا گؤره خاهئش ادئرم، سحره قدر اؤزونو قورو. گئزلَنه بئلهجیئن بئر یِر تاپ، گئزلَن. 3من ده چؤلده، سنئن گئزلَندئیئن یره گلئب آتامین یانیندا دایانارام و سنئن حاقّیندا اونونلا دانیشارام. اگر بئر شی گؤرسَم، سنه خبر ورهرم.» 4یوناتان آتاسی شاعولا داوودو تعرئفلهیئب ددی: «پادشاه، قولو داوودون ضئدّئنه گوناه اتمهسئن، چونکی او سنئن ضئدّئنه هچ واخت گوناه اتمهیئب و اونون ائشلری سنئن اوچون چوخ خیئرلی اولوب. 5او، جانینی اَلئنه آلیب گولیاتی اؤلدوردو و رب بوتون ائسرایئله بؤیوک قَلَبه قازاندیردی. بونو سن ده گؤروب سِوئندئن. داوودو بوش یره اؤلدورمکله نه اوچون ناحاق قان تؤکوب گوناه ادئرسن؟» 6شاعول یوناتانین سؤزونو اشئتدی و آند ائچئب ددی: «وار اولان رب حاقّی، اونو اؤلدورمَیهجیم.» 7یوناتان داوودو چاغیردی و بوتون بو سؤزلری اونا خبر وردی. سونرا او، داوودو شاعولون یانینا گتئردی و داوود اوّلکی کئمی شاعولون قوللوغوندا دوردو.
8تزهدن موحارئبه باشلاندی. داوود قالخیب فئلئسطلیلرئن ضئدّئنه ووروشدو، اونلاری بؤیوک بئر شکئلده قیریب مغلوب اتدی. فئلئسطلیلر داوودون قاباغیندان قاچدیلار. 9شاعول اَلئنده نئزه اِوده اوتورموشدو، ربّئن طرفئندن شر بئر روح اونون اوستونه اِندی. داوود چنگ چالیردی. 10شاعول داوودو نئزه ائله دووارا یاپیشدیرماغا چالیشدی، لاکئن داوود شاعولون قاباغیندان قاچدی، نئزه دووارا یاپیشدی. داوود او گجه قاچیب جانینی قورتاردی. 11شاعول داوودون اِوئنه آداملار گؤندَردی کی، اونو گودوب سحر واختی اؤلدورسونلر. آمّا داوودون آروادی مئکَل بونو داوودا خبر ورئب ددی: «اگر بو گجه جانینی قورتارمایاسان، صاباح اؤلومه ورئلهجکسن.» 12سونرا مئکَل داوودو پنجرهدن آشاغی سالدی و او اِشئیه چیخیب قاچدی و قورتولدو. 13مئکَل عایئله بوتونو گؤتوروب یاتاغا اوزاتدی و باشینا توکلو کچی دَرئسی کچئردئب اوستونو پالتارلا اؤرتدو. 14شاعولون داوودو یاخالاماق اوچون گؤندَردئیی آداملار گلنده مئکَل ددی: «او ناخوشدور.» 15سونرا شاعول داوودو گؤرمک ائستهدی. اونون اوچون آیری آداملار گؤندَرئب ددی: «اونو یاتاغی ائله یانیما گتئرئن کی، اؤلدوروم.» 16بو آداملار ائچهری گئرئب گؤردولر کی، یاتاقدا باشینا توکلو کچی دَرئسی کچئردئلمئش بوت اوزانیب. 17شاعول مئکَله ددی: «نئیه منی بله آلدادیب دوشمنئمی بوراخدین کی، قورتولسون؟» مئکَل شاعولا جاواب وردی: «داوود منه ددی کی، منی بوراخ، گدئم! آخی نئیه سنی اؤلدوروم؟»
18داوود قاچیب قورتولدو و رامایا، سمویئلئن یانینا گلدی و شاعولون اونا اتدئیی بوتون شیلری سمویئله ددی. داوود و سمویئل نایوتا گدئب اورادا قالدیلار. 19شاعولا خبر وردئلر: «باخ، داوود راماداکی نایوتدادیر.» 20شاعول داوودو توتماق اوچون اورایا آداملار گؤندَردی. آداملار سمویئلئن باشچیلیغی آلتیندا نبئلر دستهسئنئن نبئلئک اتدئیئنی گؤردولر. او واخت بو آداملارین دا اوستونه تارینین روحو اِندی و اونلار دا نبئلئک اتمهیه باشلادیلار. 21بونو شاعولا خبر وردئلر، او آیری آداملار گؤندَردی و اونلار دا نبئلئک اتدئلر. شاعول اوچونجو دفه گئنه آداملار گؤندَردی، اونلار دا نبئلئک اتدئلر. 22آخیردا اؤزو رامایا گتدی و سِکودا اولان بؤیوک قویونون یانینا گلئب اوراداکیلاردان سوروشدو: «سمویئل و داوود هارادادیرلار؟» بئر نفر ددی: «باخ، رامانین نایوتوندا.» 23شاعول راماداکی نایوتا گِدنده، اونون دا اوستونه تارینین روحو اِندی و راماداکی نایوتا چاتانا قدر نبئلئک ادئب گتدی. 24سونرا او دا، پالتارینی سویونوب سمویئلئن قاباغیندا نبئلئک اتدی و گلئب بوتون او گونو و گجهنی لوت یره سَرئلدی. بونا گؤره دئر ده کی، دیئرلر: «مگر شاعول دا نبئلرئن سیراسیندادیر؟»
Currently Selected:
۱سمویئل 19: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
