۱سمویئل 12
12
سمویئلئن وئداعلاشما نئطقی
1سمویئل ائسرایئللیلرئن هامیسینا ددی: «باخین من سئزئن هر دِدئیئنئزه قولاق آسیب اوستونوزه بئر پادشاه تعیئن اتمئشم. 2ائندی قاباغینیزدا پادشاه گدئر، لاکئن من آرتیق قوجالمیشام، ساچلاریم آغاریب. باخ، اوغلانلاریم دا سئزئنلهدئر. جاوانلیغیمدان بو گونه قدر سئزئن قاباغینیزدا گتمئشم. 3باخ، قاباغینیزدایام، هانسینیزین اؤکوزونو آلمیشام؟ کئمئن اِششهیئنی آلمیشام؟ کئمی آلداتمیشام، کئمه ظولم اتمئشم، یا دا کئمدن روشوَت آلیب حاقسیز عملئنه گؤز یومموشام؟ ربّئن و اونون مسح اتدئیئنئن قاباغیندا منئم ضئدّئمه شهادت ادئن کی، حاقّینیزی ورئم.» 4اونلار بله جاواب وردئلر: «سن بئزی هچ واخت آلداتماییبسان، ظولم اتمهیئبسن، هچ کئمئن اَلئندن ده هچ نه آلماییبسان.» 5سمویئل اونلارا ددی: «سئزئن ضئدّئنئزه اَلئمده بئر شی تاپمادیغینیزا بو گون رب و اونون مسح اولونموش پادشاهی دا شاهئددئر.» خالق ددی: «بلی، شاهئددئر.»
6سمویئل خالقا ددی: «موسانی و هارونو تعیئن ادن، آتالارینیزی مئصئر دئیاریندان چیخاردان ربدئر. 7ائندی، دایانین. قویون ربّئن حوضوروندا، ربّئن سئزه و آتالارینیزا اتدئیی بوتون صالح عمللر بارهده ثوبوتلار گؤرسدئم. 8یعقوب مئصئره گتدی. سونرا آتالارینیز ربّه فریاد اتدئلر. رب موسا و هارونو گؤندَردی کی، آتالارینیزی مئصئردن چیخاردیب بو یرده ساکئن اتسئن. 9لاکئن اونلار تاریلاری ربّی یاددان چیخارتدیلار، رب ده اونلاری خاصور قوشونونون باشچیسی سئسِرایا، فئلئسطلیلره و موآب پادشاهینا تسلئم اتدی. اونلار آتالارینیزین ضئدّئنه ووروشدولار. 10خالق ربّه فریادلا ددی: ”بئز گوناه اتمئشئک، چونکی ربّی آتیب، بَعَل و عَشتاروت بوتلرئنه قوللوق اتمئشئک. ائندی یارب، بئزی دوشمنلرئمئزئن اَلئندن قورتار و بئز سنه قوللوق ادهرئک.“ 11رب ده یِروببَعَلی#12.11 یعنی جِدعونو. قدئم یونان و اَرامی ترجومهسئنده «باراق»، لاکئن عئبرانی متنده «بِدان» گلمئشدئر.، یئفتاخی و من سمویئلی گؤندَردی. او سئزی اطرافینیزداکی دوشمنلرئن اَلئندن قورتاردی و اَمئن-آمانلیقدا یاشادینیز. 12سئز عَمّون پادشاهی ناخاشین سئزئن ضئدّئنئزه گلدئیئنی گؤرنده، رب تارینیز سئزه پادشاه ائکَن منه دِدئنئز: ”خیر، گرک بئزه بئر پادشاه حؤکمرانلیق اتسئن.“ 13ائندی باخین. بو دا سِچدئیئنئز و ائستهدئیئنئز پادشاه! باخین، رب اوستونوزه بئر پادشاه تعیئن ادئب. 14اگر ربدن قورخوب اونا قوللوق ادهسئنئز و سَسئنه قولاق آسیب امرئنه ضئدّ چیخمایاسینیز، او واخت هم سئزه حؤکمرانلیق ادن پادشاهینیز، هم ده سئز تارینیز ربّئن دالینجا گِدَرسئنئز. 15یوخ، اگر ربّئن سَسئنه قولاق آسمایاسینیز و ربّئن امرئنه ضئدّ چیخاسینیز، او زامان ربّئن اَلی آتالارینیزا ضئدّ اولدوغو کئمی، سئزئن ده ضئدّئنئزه اولار.
16حتّا ائندی دایانین، ربّئن گؤزونوز قاباغیندا ادهجَیی بو بؤیوک حادئثهنی گؤرون. 17بو گون مگر بوغدا بئچئمی دیئل؟ ربّئن حوضورونا یالواراجاغام کی، گؤی گورولتوسو و یاغیش گؤندَرسئن. او زامان گؤرَرسئنئز کی، اؤزونوز اوچون پادشاه ائستهمَکله اتدئیئنئز پئسلئک، ربّئن گؤزونده نه قدر بؤیوکدور.»
18سمویئل ربّی چاغیردی و رب او گون گؤی گورلادیب یاغیش یاغدیردی. بوتون خالق ربدن و سمویئلدن چوخ قورخدو. 19او واخت جاماعات سمویئله ددی: «قوللارین اوچون تارین ربّه یالوار کی، اؤلمهیک، چونکی بوتون گوناهلاریمیزین اوستونه اؤزوموزه پادشاه ائستهمک تقصئرئنی ده علاوه اتدئک.» 20لاکئن سمویئل خالقا ددی: «قورخمایین، بوتون بو پئسلئیی سئز ادئبسئنئز، آمّا گئنه ده ربّئن دالینجا گتمکدن دؤنمهیئن، بوتون قلبئنئزله ربّه قوللوق ادئن. 21دؤنمهیئن، چونکی او زامان بوش بوتلرئن دالینجا گتمئش اولاجاقسینیز، او بوتلر کی فایدا ورمَزلر، خئلاص دا اتمَزلر، چونکی پوچدورلار. 22چونکی رب خالقینی اؤز بؤیوک آدینین خاطئرئنه آتمایاجاق، اونا گؤره کی، سئزی اؤز خالقی اتمک ربّئن خوشونا گلئب. 23بوندان علاوه، منه گلئنجه، مندن ائراق اولسون کی، سئزئن اوچون دوعا اتمکدن اَل چکئب، بلهجه ربّئن ضئدّئنه گوناه اِدئم. من سئزه یاخشی و حاق یولونو اؤیرَدهجیم. 24آنجاق ربدن قورخون و اونا حقئقتده بوتون قلبئنئزله خئدمت ادئن. گؤرون سئزئن اوچون نجه عظمتلی ائشلر گؤروب. 25آمّا اگر پئسلئک اتمکده داوام ادهسئنئز، هم سئز محو اولاجاقسینیز، هم ده پادشاهینیز.»
Currently Selected:
۱سمویئل 12: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
