۱پادشاهلار 8
8
عهد ساندیغینین معبده گتئرئلمهسی
(۲سال. ۵:۲-۶:۲)
1او زامان سولیمان پادشاه ائسرایئلئن آغساقّاللارینی، بوتون قبئله باشچیلارینی، یعنی ائسرایئل اؤولادلارینین نسئل رهبرلرئنی اورشلئمه، اؤزونون یانینا ییغدی کی، ربّئن عهد ساندیغینی داوودون شهری اولان صَحیوندان یوخاری گتئرسئنلر. 2یدّئنجی آیدا اولان بایرام واختی، یعنی اتانئم آییندا بوتون ائسرایئل خالقی سولیمان پادشاهین یانینا ییغیلدی. 3سونرا بوتون ائسرایئل آغساقّاللاری گلدئلر و کاهئنلر ربّئن ساندیغینی گؤتوردولر. 4کاهئنلر و لاوئلیلر، ربّئن ساندیغینی و اونونلا بئرلئکده، حوضور چادیرینی و چادیردا اولان بوتون موقدّس اشیالاری یوخاری گتئردئلر. 5سولیمان پادشاه و اونون یانینا ییغیلمیش بوتون ائسرایئل جاماعاتی ساندیغین قاباغیندا او قدر قویون-کچی و اؤکوز قوربان کَسدئلر کی، چوخلوغونا گؤره سایی حسابا گلمَز. 6کاهئنلر ربّئن عهد ساندیغینی معبدئن ائچ اوتاغینا، یعنی لاپ موقدّس یره، کَرّوبلارین قانادلاری آلتینداکی اؤز یرئنه گتئردئلر. 7کَرّوبلار قانادلارینی ساندیغین یری اوستونده آچمیشدیلار، اونلار ساندیغی و اونون دئرَکلرئنی یوخاریدان اؤرتموشدولر. 8دئرَکلر اله اوزون ائدی کی، اونلارین اوجو ائچ اوتاغین قاباغینداکی موقدّس یردن گؤرونوردو، آنجاق باییر طرفدن گؤرونموردو. اونلار بو گونه قدر اورادادیرلار. 9ساندیقدا هچ بئر شی یوخ ائدی، مگر موسانین خورِبده قویدوغو ائکی داش لؤوحهسی. رب اورادا ائسرایئل اؤولادلاری ائله، مئصئر تورپاغیندان چیخدیقلاری زامان عهد باغلادی.
10کاهئنلر موقدّس یردن چیخدیقلاری واخت، بولود ربّئن معبدئنی اله دولدوردو کی، 11کاهئنلر بولودا گؤره دایانیب خئدمت ادهبئلمهدئلر. چونکی ربّئن شؤوکتی اونون معبدئنی دولدورموشدو. 12او واخت سولیمان ددی: «رب بویوروب کی، قالین قارانلیقدا ساکئن اولاجاق. 13دوغرودان دا من سنئن اوچون شؤوکتلی بئر معبد تئکمئشم کی، سنئن ابدی یاشایاجاغین یِر اولسون.»
سولیمانین خالقلا دانیشماسی
(۲سال. ۶:۳-۱۱)
14پادشاه اوزونو دؤندَرئب بوتون ائسرایئل جاماعاتینا برکت وردی. بو زامان بوتون ائسرایئل جاماعاتی آیاق اوسته دورموشدو. 15پادشاه ددی: «ائسرایئلئن تاریسی رب موبارک اولسون کی، آتام داوودا اؤز آغزی ائله دانیشدی و اؤز اَلی ائله اونو یرئنه یتئردی. او دمئشدی: 16”من خالقیم ائسرایئلی مئصئردن چیخارتدیغیم گوندن بَری ائسرایئلئن هچ بئر قبئلهسئندن بئر شهر سچمهدئم کی، اورادا بئر معبد تئکئم و آدیم اوستونده اولسون.“ 17آتام داوودون اورهیئنده آرزو وار ائدی کی، ائسرایئلئن تاریسی ربّئن آدینا بئر معبد تئکسئن. 18لاکئن رب آتام داوودا ددی: ”سن یاخشی ادئبسن کی، منئم آدیما بئر معبد تئکمک نئیّتئنه دوشوبسن. 19آنجاق معبدی سن تئکمیهجکسن، سنئن بِلئندن گلن اوغلون منئم آدیما معبد تئکهجک.“ 20رب وعده وردئیئنی یرئنه یتئردی: چونکی من آتام داوودون یرئنه قالخیب، ربّئن ددئیی کئمی ائسرایئل تختئنده اوتورموشام و ائسرایئلئن تاریسی ربّئن آدینا معبد تئکمئشم. 21اورادا ساندیق اوچون یِر حاضیرلامیشام کی، ربّئن باغلادیغی عهد اونون ائچئندهدئر، او عهد کی، رب آتالاریمیزی مئصئر تورپاغیندان چیخارتدیغی واخت اونلارلا باغلادی.»
معبدئن تقدئسی اوچون سولیمانین دوعاسی
(۲سال. ۶:۱۲-۲۲)
22سولیمان ربّئن قوربانگاهی قاباغیندا، بوتون ائسرایئل جاماعاتینین حوضوروندا دوردو و اَللرئنی گؤیه طرف آچیب 23ددی: «یارب، ائسرایئلئن تاریسی! نه یوخاریدا گؤیده، نه ده آشاغیدا یرده سنئن کئمی تاری وار. سن عهدئنی و محبّتئنی بوتون او قوللارینلا ساخلاییرسان کی، بوتون اورَکلری ائله سنئن حوضوروندا یاشاییرلار. 24سن قولون آتام داوودا وردئیئن وعدهیه عمل ادئبسن؛ اؤز دئلئنله ددئیئنی بو گون اؤز اَلئنله یرئنه یتئرئبسن. 25یارب، ائسرایئلئن تاریسی، ائندی ده قولون آتام داوودا وردئیئن وعدهیه عمل ات، اؤزون دمئشدئن: ”اگر سن یولوملا گتدئیئن کئمی، اوغوللارین دا یولوملا گدئب اؤز عمللرئنه دئقّت اتسهلر، ائسرایئل تختئنده سنئن نسلئندن بئر کئشی اَسکئک اولمایاجاق.“ 26ای ائسرایئلئن تاریسی، ائندی قولون آتام داوودا ددئیئن سؤزون تصدئق ادئلسئن!
27لاکئن، مگر تاری دوغرودان دا یرده ساکئن اولار؟ سن گؤیه و گؤیلرئن گؤیونه سیغمازسان، او کی قالدی منئم تئکدئیئم معبده! 28آنجاق سن بو قولونون دوعاسینا و یالواریشینا نظر سال، یارب تاریم، بو گون سنئن قاباغیندا اتدئیی فریادینی و دوعاسینی اشئت. 29قوی سنئن نظرئن گجه-گوندوز بو معبدئن اوستونده اولسون. بو یِر بارهده سن دیئبسن: ”منئم آدیم اورادا اولاجاق.“ قولونون بورایا اوز توتوب اتدئیی دوعاسینی اشئت. 30بو یِره طرف دوعا اتدئکلری واخت، اؤز قولونون و خالقین ائسرایئلئن یالواریشلارینی سن اشئت؛ گؤیلرده اولان مسکنئنده اشئت و باغیشلا!
31اگر بئر آدام اؤز یاخینینین ضئدّئنه گوناه اتسه و اوندان آند ائچمک طلب اولونسا، او دا گلئب بو معبده، سنئن قوربانگاهین قاباغیندا آند ائچسه، 32او واخت سن گؤیده اشئت، عمل ات، و قوللارینا حؤکم ات. شَرور آدامین عملئنی اؤز باشینا دؤندَرهرک اونو محکوم ات و صالح آداما صالحلئیئنه گؤره بَرائت ور.
33خالقین ائسرایئل سنئن ضئدّئنه گوناه اتدئیی اوچون دوشمن قاباغیندا مغلوب اولاندا، اگر اونلار تکرار سنه طرف دؤنوب آدینی دئللرئنه گتئرسهلر و بو معبده سنه یالواریب فریاد اتسهلر، 34او واخت سن گؤیده اشئت و خالقین ائسرایئلئن گوناهینی باغیشلا، اونلاری گئنه آتالارینا وردئیئن تورپاغا قایتار.
35خالقین سنئن ضئدّئنه گوناه اتدئیی اوچون گؤی باغلانیب یاغیش یاغمایان واخت، اگر بو یره طرف دوعا ادئب آدینی دئللرئنه گتئرسهلر و اگر سن اونلارا بلا گؤندَردئیئن واخت اؤز گوناهلاریندان دؤنسهلر، 36او واخت سن گؤیده اشئت، قوللارینین و خالقین ائسرایئلئن گوناهینی باغیشلا و گدهجکلری طرف یاخشی یولو اونلارا اؤیرَت. خالقینا ائرث وردئیئن تورپاغینا دا یاغیش گؤندَر.
37اگر اؤلکهده آجلیق اولسا، وبا اولسا، ائستی یِل یا دا کوف، چَیئرتکه یا دا بئتکی قوردو اولسا، اگر دوشمن اونلاری اؤلکهنئن هر هانسی بئر شهرئنده موحاصئرهیه آلسا، هانسی بلا، هانسی ناخوشلوق اولور، اولسون، 38بئر شخصئن، یا دا بوتون خالقین ائسرایئل طرفئندن بئر دوعا و یالواریشی اولسا، هر کس اؤز اورهیئنئن دردئنی بئلئب بو معبده طرف اَللرئنی آچسا، 39او واخت سن گؤیده، اؤز مسکنئنده اشئت، باغیشلا و بئر علاج ات. اورهیئنی بئلدئیئن هر آداما بوتون عمللرئنه گؤره عوض ور، چونکی هر ائنسانین اورهیئنی فقط سن بئلئرسن. 40اله کی، اونلار آتالاریمیزا وردئیئن تورپاقدا یاشادیقلاری بوتون گونلر بویو سندن قورخسونلار.
41اگر خالقین ائسرایئلدن اولمایان یاداِللی ده سنئن آدینین خاطئرئنه اوزاق اؤلکهدن گلسه، 42چونکی سنئن بؤیوک آدین، قودرتلی اَلئن و اوزانان قولون بارهده اشئدهجکلر، او یاداِللی گلئب بو معبده طرف دوعا ادنده، 43او واخت سن گؤیده، اؤز مسکنئنده اشئت و یاد اِللینئن سنه فریاد اتدئیی هر شیی ات کی، یِر اوزونون بوتون خالقلاری دا سنئن آدینی تانیسینلار، خالقین ائسرایئل کئمی سندن قورخسونلار و بئلسئنلر کی، تئکدئیئم بو معبد سنئن آدینلا چاغیریلیر.
44اگر خالقین گؤندَردئیئن یوللا دوشمنلرئنئن ضئدّئنه موحارئبهیه چیخسالار و سنئن سچدئیئن شهره طرف، سنئن آدینا تئکدئیئم معبده طرف ربّه دوعا اتسهلر، 45سن گؤیده اونلارین دوعا و یالواریشلارینی اشئت، اونلارین طرفئنده اول.
46اگر اونلار سنئن ضئدّئنه گوناه اتسهلر-چونکی گوناه اتمهین ائنسان یوخدور-سن قضبلهنئب اونلاری دوشمنه تسلئم ادهسن و دوشمن اونلاری اسئر ادئب یاخین یا اوزاق تورپاغینا آپارسا، 47اگر اونلار اسئرلئکده اولدوقلاری اؤلکهده اورَکلرئنی دؤندَرئب تؤوبه اتسهلر و اسئر اولان یرده سنه دوعا ادئب دِسهلر کی، ”بئز گوناه و خاطا اتمئشئک، پئسلئک اتمئشئک“، 48اگر اونلاری اسئر ادن دوشمنلرئن اؤلکهسئنده بوتون اورَکلری و جانلاری ائله سنه طرف دؤنسهلر، آتالارینا وردئیئن تورپاغا، سچدئیئن شهره و آدینا تئکدئیئم معبده طرف اوز توتوب سنه دوعا اتسهلر، 49او واخت سن گؤیده، اؤز مسکنئنده اونلارین دوعا و یالواریشلارینی اشئت، اونلارین طرفئنده اول. 50سنئن ضئدّئنه گوناه ادن خالقینی و اونلارین سنئن ضئدّئنه اتدئکلری بوتون تقصئرلری باغیشلا و اونلاری اسئر آلانلارا شفقت ور کی، اونلارلا شفقتلی رفتار اتسئنلر. 51چونکی اونلار سنئن خالقین، سنئن ائرثئندئرلر. سن اونلاری مئصئردن، دمئر اَرئتمه کورهسئنئن ائچئندن چیخاردیبسان. 52بو قولونون و خالقین ائسرایئلئن یالواریشینا نظر یتئر کی، اونلارین سنه فریاد اتدئکلری هر سؤزو اشئدهسن. 53چونکی، یا پروردئگار رب، سن ائرثئن اولماق اوچون اونلاری یِر اوزونون بوتون خالقلاریندان آییردین. نجه کی، بونو آتالاریمیزی مئصئردن چیخارتدیغین واخت قولون موسا واسئطهسیائله دمئشدئن.»
سولیمانین خالقا برکت ورمهسی
54سولیمان بوتون بو دوعا و یالواریشینی ربّه دیئب قورتاراندان سونرا، ربّئن قوربانگاهی قاباغیندان، اَللری گؤیه آچیق حالدا، دئزه دوشدویو یردن قالخدی. 55او آیاغا دوردو و بوتون ائسرایئل جاماعاتینا اوجا سَسله برکت ورئب ددی: 56«رب موبارک اولسون کی، وردئیی وعدهلرئن هامیسینا موطابئق خالقی ائسرایئله دئنجلئک ورئب! اؤز قولو موسانین واسئطهسیائله وردئیی یاخشی وعدهلرئندن هچ بئری هدر اولماییب. 57قوی تاریمیز رب آتالاریمیزا یار اولدوغو کئمی بئزه ده یار اولسون، قوی بئزی بوراخماسین و ترک اتمهسئن. 58بئزئم اورَکلرئمئزی اؤزونه طرف یؤنَلتسئن کی، اونون بوتون یوللاری ائله گِدَک و اونون آتالاریمیزا بویوردوغو امرلرئنه، قایدالارینا و حؤکملرئنه عمل اِدَک. 59قوی ربّئن قاباغیندا بو یالواریش سؤزلرئم گجه-گوندوز رب تاریمیزین خاطئرئنده اولسون، اؤز قولونون و خالقی ائسرایئلئن یاخشیلیغی اوچون گون به گون چالیشسین. 60اله کی یِر اوزونون بوتون خالقلاری بئلسئن کی، فقط رب تاریدیر، اوندان باشقا یوخدور. 61قوی سئزئن اورهیئنئز کامئل بئر شکئلده تاریمیز ربّه صادئق اولسون کی، بو گون اولدوغو کئمی اونون قایدالاری ائله گدهسئنئز و اونون امرلرئنه عمل ادهسئنئز.»
معبدئن تقدئس ادئلمهسی
(۲سال. ۷:۴-۱۰)
62پادشاه و اونونلا بئرلئکده بوتون ائسرایئل ربّئن قاباغیندا قوربانلار کَسدی. 63سولیمانین ربّه تقدئم اتدئیی باریش قوربانلارینین سایی ائیئرمی ائکی مئن اؤکوز و یوز ائیئرمی مئن قویون-کچی ائدی. بلهجه، پادشاه و بوتون ائسرایئل اؤولادلاری ربّئن معبدئنی تقدئس اتدئلر. 64همئن گون پادشاه ربّئن معبدی قاباغینداکی حَیَطئن اورتاسینی تقدئس اتدی کی، یاندیرما قوربانلارینی، تاخیل تقدئملرئنی و باریش قوربانلارینین پئیئنی اورادا تقدئم اتسئن، چونکی ربّئن قاباغینداکی بورونج قوربانگاه کئچئک ائدی و یاندیرما قوربانلاری، تاخیل تقدئملری و باریش قوربانلارینین پئیی اورایا یِرلَشمَزدی.
65او واخت سولیمان و اونونلا بئرلئکده بؤیوک بئر جاماعات، خَمات کِچئدئندن مئصئر درهسئنه قدر یاشایان بوتون ائسرایئل، تاریمیز ربّئن قاباغیندا یدّی گون و داها یدّی گون یعنی اون دؤرد گون بایرام توتدو. 66سکّئزئنجی گون سولیمان خالقی بوراخدی. اونلار پادشاها برکت ورئب، ربّئن قولو داوودا و خالقی ائسرایئله اتدئیی بوتون یاخشیلیقلارا گؤره شادلیقلا و شاد اورَکله اؤز اِولرئنه گتدئلر.
Currently Selected:
۱پادشاهلار 8: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
