۱پادشاهلار 20
20
بِنهَدَدئن سامئرهیه هوجومو
1اَرام پادشاهی بِنهَدَد بوتون قوشونونو ییغدی. اونونلا بئرلئکده اوتوز ائکی پادشاه، آتلار و دؤیوش عارابالاری وار ائدی. بِنهَدَد گلئب سامئرهنی موحاصئرهیه آلدی و شهره هوجوم اتدی. 2او، شهره، ائسرایئل پادشاهی اَخابین یانینا قاصئدلر گؤندَرئب ددی: 3«بِنهَدَد بله دیئر: ”سنئن قیزیل-گوموشون منئمدئر، آروادلارینین و اؤولادلارینین لاپ گؤزَلی ده منئمدئر.“» 4ائسرایئل پادشاهی جاواب ورئب ددی: «آغام پادشاه سنئن ددئیئن کئمی اؤزوم و هر نهیئم وار، سنئندئر.» 5قاصئدلر گئنه گلئب ددئلر: «بِنهَدَد بله دیئر: ”هر چند کی سنه قیزیل-گوموشونو، آروادلارینی و اوغوللارینی منه ور دیئب خبر گؤندَردئم، 6آنجاق صاباح بو واخت آداملاریمی سنئن یانینا گؤندَرهجیم. اِوئنی و اعیانلارینین سارایلارینی آختاراجاقلار و سنئن خوشونا گلن هر شیی گؤتوروب گتئرهجکلر.“»
7ائسرایئل پادشاهی اؤلکهنئن بوتون آغساقّاللارینی چاغیریب ددی: «گؤرون بو آدام نجه پئسلئک آختاریر. آروادلاریمی، اوغوللاریمی، قیزیل-گوموشومو مندن طلب اتدی، من اونا یوخ دِمهدئم.» 8بوتون آغساقّاللار و خالق اونا ددئلر: «قولاق آسما، راضی دا اولما.» 9او، بِنهَدَدئن قاصئدلرئنه ددی: «آغام پادشاها دیئن: ”بو قولوندان اوّلجه ائستهدئیئن هر شیی ورهرم، آنجاق بونو اده بئلمَیهجیم.“» قاصئدلر گدئب اونون سؤزونو چاتدیردیلار. 10بِنهَدَد اونا خبر گؤندَرئب ددی: «اگر سامئره تورپاغی منئم دالیمجا گدن قوشونون اوووجلارینی دولدورماغا بس اتسه، قوی آللاهلار منه بله و بوندان بَتَرئنی اتسئنلر.» 11ائسرایئل پادشاهی جاواب ورئب ددی: «دیئن، زئرههئنی گِیمهدن اوّل یوخ، سویوناندان سونرا فَخر اتسئن.» 12بِن-هَدَد بو سؤزو اشئدنده، پادشاهلارلا بئرلئکده چارداقلاردا شراب ائچئردی. او، عسگرلرئنه ددی: «سیرایا دوزولون!» اونلار شهرئن موقابئلئنده سیرایا دوزولدولر.
اَخابین بنهَدَدی مغلوب اتمهسی
13بو واخت بئر پیغمبر ائسرایئل پادشاهی اَخابین یانینا گلئب ددی: «رب بله دیئر: ”بوتون بو بؤیوک قوشونو گؤرورسن؟ باخ، بو گون اونلاری سنه تسلئم ادهجیم و بئلهجکسن کی، رب منم.“» 14اَخاب ددی: «کئمئن واسئطهسیائله؟» او ددی: «رب بله دیئر: ”وئلایت باشچیلارینین خئدمتئنده اولان ائگئدلرئن واسئطهسیائله بونو ادهجیم.“» او واخت اَخاب سوروشدو: «دؤیوشو کئم باشلایاجاق؟» او جاواب وردی: «سن.» 15سونرا اَخاب وئلایت باشچیلارینین ائگئدلرئنی سیرایا دوزدو. اونلار ائکی یوز اوتوز ائکی نفر ائدئلر. اونلاردان سونرا اورادا اولان خالقین هامیسینی، حتّا بوتون ائسرایئل اؤولادلارینی سیرایا دوزدو؛ اونلار یدّی مئن نفر ائدئلر.
16اونلار گون اورتا اورادان چیخدیلار. بِنهَدَد و اونا کؤمک ادن اوتوز ائکی پادشاه چارداقلاردا ائچئب کِفلَنمئشدئلر. 17اَوّل وئلایت باشچیلارینین ائگئدلری چیخدیلار. بِنهَدَدئن گؤندَردئیی جاسوسلار اونا ددئلر: «سامئرهدن آداملار چیخیب.» 18او ددی: «اگر صولح اوچون چیخیبلار، اونلاری دئری توتون، اگر دؤیوش اوچون چیخیبلار، گئنه اونلاری دئری توتون.» 19او واخت بو آداملار، یعنی هم وئلایت باشچیلارینین ائگئدلری، هم ده اونلارین دالینجا گلن قوشون، آرتیق شهردن چیخمیشدی. 20اونلاردان هر بئری قاباغیندا دورانی ووردو. اَراملیلار قاچدیلار و ائسرایئللیلر اونلاری تعقئب اتدئلر. اَرام پادشاهی بِنهَدَد آت اوستونده آتلیلاری ائله بئرلئکده قاچیب قورتاردی. 21ائسرایئل پادشاهی اورادان چیخیب آتلارا و دؤیوش عارابالارینا هوجوم اتدی و اَراملیلاری بؤیوک بئر شکئلده قیلینجدان کچئرتدی.
اَراملیلارین ائکئنجی هوجومو
22همئن پیغمبر ائسرایئل پادشاهینین یانینا گلئب اونا ددی: «گت اؤزونو مؤحکملَندئر، گؤر کی، نه اتمهلیسن. چونکی باهار گلنده اَرام پادشاهی گئنه سنئن اوستونه گلهجک.»
23اَرام پادشاهینین اعیانلاری اونا دیئردئلر: «ائسرایئللیلرئن آللاهی، داغلار آللاهلاریدیر، بونا گؤره ده بئزدن داها قووّتلی ائدئلر. اونلارلا هامار بؤلگهده ووروشساق، حتمن اونلاردان قووّتلی اولاجاغیق. 24بله ات: پادشاهلارین هر بئرئنی وظئفهسئندن گؤتور و اونلارین یرئنه والئلر تعیئن ات. 25سن ده آت یرئنه آت، عارابا یرئنه عارابا قویوب ائتئردئیئن قوشون کئمی اؤزون اوچون بئر قوشون دوزَلت کی، بئز اونلارین ضئدّئنه هامار بؤلگهده ووروشاق. حتمن بئز اونلاردان داها قووّتلی اولاجاغیق.» بِنهَدَد اونلارین سؤزونه قولاق آسدی و بله اتدی.
26باهار گلنده بِنهَدَد اَراملیلاری ییغدی و ائسرایئللیلرله ووروشماق اوچون اَفِقه طرف گتدی. 27ائسرایئل اؤولادلاری دا ییغیلدیلار، آذوقه حاضیرلادیلار و اونلارین پئشوازینا گتدئلر. ائسرایئل اؤولادلاری اونلارین قاباغیندا ائکی کئچئک کچی سوروسو کئمی اوردوگاه قوردولار، لاکئن اَراملیلار اؤلکهنی دولدوردولار. 28بئر تاری آدامی ائسرایئل پادشاهینین یانینا گلئب ددی: «رب بله دیئر: ”اَراملیلار دیئرلر کی، رب داغلار تاریسیدیر، اووالار تاریسی دیئل. بونا گؤره ده من بو بؤیوک قوشونو سنه تسلئم ادهجیم و بئلهجکسئنئز کی، رب منم.“» 29اونلار بئربئرلرئنئن قاباغیندا یدّی گون اوردوگاهدا قالدیلار. یدّئنجی گون دؤیوش باشلاندی. ائسرایئل اؤولادلاری بئر گونده اَراملیلارین پئیادا قوشونوندان یوز مئن نفری قیردیلار. 30اونلارین قالانلاری اَفِقه، شهرئن ائچئنه قاچدیلار. شهرئن دوواری قالان ائیئرمی یدّی مئن نفرئن اوستونه ییخیلدی. بِنهَدَد شهره قاچیب ائچهری بئر اوتاغا گئردی.
31اعیانلاری اونا ددئلر: «بئز اشئتمئشئک کی، ائسرایئل پادشاهلاری مرحمتلی پادشاهلارمیش. گلئن بِللرئمئزه چول، باشلاریمیزا ائپ سارییاق و ائسرایئل پادشاهینین یانینا گِدَک. بلکه او سنی صاغ بوراخار.» 32اونلار بِللرئنه چول، باشلارینا ائپ باغلادیلار و گلئب ائسرایئل پادشاهینا ددئلر: «قولون بِنهَدَد دیئر: ”یالواریرام، منی صاغ بوراخ.“» ائسرایئل پادشاهی ددی: «مگر او حله ده صاغدیر؟ او منئم قارداشیمدیر.» 33بو آداملار بئر علامت گؤزلهیئردئلر، پادشاهین سؤزونو یاخشی علامت ساییب جَلد ددئلر: «بِنهَدَد سنئن قارداشیندیر.» او ددی: «گدئن، اونو گتئرئن.» بِنهَدَد اونون یانینا گلدی و او، بِنهَدَدی اؤز دؤیوش عاراباسینا مئندئردی. 34بِنهَدَد اونا ددی: «منئم آتامین سنئن آتاندان آلدیغی شهرلری گری قایتاریرام. آتامین سامئرهده دوزَلتدئیی کئمی، سن ده دَمَشقده اؤزون اوچون بازارلار دوزَلدَرسن.» اَخاب ددی: «بو عهدله سنی صاغ بوراخارام.» بلهجه بِنهَدَدله عهد باغلاییب اونو آزاد بوراخدی.
ائسرایئل پادشاهی و پیغمبر
35پیغمبرلردن اولان بئر نفر ربّئن سؤزو ائله اؤز یولداشینا ددی: «خاهئش ادئرم منی وور.» لاکئن او آدام اونو وورماق ائستمهدی. 36او واخت پیغمبر او آداما ددی: «ائندی کی، سن ربّئن سؤزونه قولاق آسمادین، باخ، منئم یانیمدان آیریلدیقدا بئر شئر سنی اؤلدورهجک.» پیغمبرئن یانیندان آیریلدیقدا بئر شئر اونا راست گلئب اونو اؤلدوردو. 37پیغمبر آیری بئر آدام تاپیب اونا ددی: «خاهئش ادئرم، منی وور.» او آدام پیغمبری ووروب یارالادی. 38پیغمبر گتدی و گؤزلرئنی بئر اؤرتوکله اؤرتوب قئیافهسئنی دَیئشدی و پادشاهین یولو اوستونده دایاندی. 39پادشاه کچنده اونو سَسلهیئب ددی: «بو قولون دؤیوشون اورتاسینا گئرمئشدی. باخ، بئر آدام کنارا چکئلدی و منئم یانیما بئر نفر گتئرئب ددی: ”بو آدامی گود. اگر آرادان چیخسا، عوضئنده یا جانینی ورهجکسن یا دا بئر تالانت#20.39 تقرئبن ۳۴/۵ کئلو گوموش.“ 40بو قولون اورادا-بورادا مشغول اولارکن او، یانیمدان قاچدی.» ائسرایئل پادشاهی بو آداما ددی: «حؤکمون اِله ده اولمالیدیر، اؤزون قرار ورئبسن.» 41او جَلد گؤزلرئندن اؤرتویو گؤتوردو. ائسرایئل پادشاهی گؤردو کی، او پیغمبرلردن بئریدئر. 42او، ائسرایئل پادشاهینا ددی: «رب بله دیئر: ”منئم اؤلومه لعنت اتدئیئم آدامی، سن اَلدن بوراخدین. بونا گؤره ده اونون یرئنه سن اؤلهجکسن و اونون خالقینین باشینا گلهجک ائشلر، سنئن خالقینین باشینا گلهجک.“» 43ائسرایئل پادشاهی قاشقاباقلی و قضبلی سامئرهده اولان سارایینا گلدی.
Currently Selected:
۱پادشاهلار 20: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
