روملولارا 15
15
1ائندی بئز کی، قووّتلییئک، گرک قووّتسئزلرئن ضعئفلئکلرئنه دؤزَک و آنجاق اؤز خوشلوغوموزی آختارمایاق. 2هر بئرئمئز یاخشیلیقدا بئنا الهمک اوچون قونشوموزی خوشلاندیراق. 3اونا گؤره کی، مسئح ده اؤز خوشلوغونی آختارمادی؛ نجه کی، یازیلیب: «سنه حقئر باخانلارین حقارتی منئم اوستومه دوشدی.» 4چونکی قاباقدان یازیلانلارین هامیسی، بئزئم تعلئمئمئز اوچون یازیلدی کی، تحمّول و موقدّس یازیلارین تسلّئسی ائنن اومئدئمئز اولسون.
5قوی تحمّول و تسلّی ورن تاری مسئح عئسایا گؤره، سئزه بئربئرئز ائنن همفئکئر اولماغی احسان الهسئن کی، 6سئز بئرلئکده بئر سس ائنن ربّئمئز عئسا مسئحئن آتاسی اولان تارینی اوجالداسیز.
7بونا گؤره، نجه کی، مسئح سئزی تارینین جلالی اوچون قبول الهدی، سئز ده بئربئرئزی قبول الهیئن. 8چونکی بونی دیئرم کی، مسئح تارینین حقئقتئندن اؤتری ختنه اولانلارین یعنی یهودئلرئن خئدمتکاری اولدی کی، اجدادیمیزا ورئلن وعدهلری تصدئق الهسئن. 9و قیرییهودئلر تارینین رحمتی اوچون اونا حمد و سئتایئش الهسئنلر، نجه کی، یازیلیب دا؛
«بونا گؤره قیرییهودئلر آراسیندا حمد الئیه جهیم،
و سنئن آدین اوچون اوخویاجاغام.»
10و گئنه دیئر:
«ای قیرییهودئلر، اونون خالقی ائنن شادلیق اله یئن!»
11و گئنه:
«ای بوتون مئلّتلر ربّه حمد الهیئن.
قوی بوتون خالقلار اونا حمد الهسئنلر!»
12و گئنه اِشَعیا دیئر:
«یسّهنئن کؤکوندن اولان گلهجک.
و او، قیرییهودئلره حؤکمرانلیق الهمک اوچون قالخاجاق.
قیرییهودئلر اونا اومئد باغلایاجاقلار.»
13قوی اومئد تاریسی ائماندا سئزی هر جور شادلیق و باریش ائنان دولدورسون کی، سئز موقدّس روحون قووّتی ائنن، اومئد ائنن دولوب داشاسیز.
پولوسون خئدمتی قیری یهودئلر آراسیندا
14بوندان علاوه، ای قارداشلار، من اؤزوم ده سئزئن حاقّیزدا یقئنئم وار کی، سئز اؤزوز ده یاخشیلیقدا دؤولتلی و هر معرئفتده دولوسوز و بئربئرئزی ده نصئحت الهمهیه قادئرسئز. 15آمّا بعضی مسلهلر بارهده سئزه داها جسارت ائنن یازمیشام کی، سئزه خاطیرلامیش اولوم، او فیضدن اؤتری کی، تاری طرفئندن منه ورئلئب کی، 16قیرییهودئلره عئسا مسئحئن خئدمتکاری اولام و تارینین ائنجئلئنه بئر کاهئن کئمی خئدمت اِله یم، اِله کی، منئم تقدئم الهدئیئم قیرییهودئلر، تارییا مقبول و موقدّس روح طرفئندن تقدئس اولونموش بئر قوربان اولسون.
17بله ده مسئح عئسادا تارییا تقدئم اولان خئدمت اوچون فخر الهیئرم. 18چونکی من هچ بئر شی دانیشماغا جسارت اِله مهرم، مگر اولار حاقّیندا کی، مسئح منئم واسئطم ائنن قیرییهودئلرئن ائطاعتی اوچون هم سؤزده، هم ده عملده، 19علامتلر و عجایئبلر قووّتئنده و موقدّس روحون قووّتئنده یرئنه یتئرئب؛ بله کی، اورشلئمدن باشلاییب ائلئرکوما قدر مسئحئن ائنجئلئنی تامام-کامال اعلان اله مئشم. 20و بله اللشمئشَم کی، ائنجئلی، مسئحئن حله آدی اولارا یتئشمهمئش یرلرده اعلان الهیئم، اله کی آیری بئر آدامین قویدوغی بونؤورَده بئنا اله مهیئم. 21آمّا نجه کی، یازیلیب:
«اونون حاقّیندا خبرلری اولمایانلار گؤرهجکلر،
و اشئتمهمئش اولانلار آنلایاجاقلار.»
22بوندان اؤتری ده چوخ دفه سئزئن یانیزا گلمکدن ساخلاندیم.
پولوس روما گتمک ائسته یئر
23آمّا ائندی کی، بو اؤلکهلرده آرتیق بئر یر قالماییب و اوزون ائللردن بری سئزئن طرفلرئزه گلمهیی آرزی الهیئرم، 24ائسپانئیایا کچئب-گدنده اومئدئم وار کی، سئزی ده گؤرَم و اوّل بئر مودّت سئزئن یانیزدا اولماقدان دویام و سورا سئز منی اورایا یولا سالاسیز. 25آمّا ائندی اورشلئمه گدئرم، اله کی موقدّسلره خئدمت الهیئم. 26چونکی مقدونئیّه و اخایئه منطقهلرئنئن کلئسالارینا خوش گؤروندی کی، اورشلئمدهکی موقدّسلرئن آراسیندا کاسیب اولانلارا کؤمک ییغسینلار. 27البتّه خوش گؤروندی؛ دوغرودان دا یهودئلرئن دِینی آلتیندا ائدئلر، چونکی اگر قیرییهودئلر اولارین روحانی برکتلرئنده شرئک اولدولار، اولارا مادّی برکتلر ائنن ده خئدمت اِله مهلیدئرلر. 28بلهده بو ائشی باشا چاتدیریب و بو ییغیلان کؤمکلری اولارین الئنه چاتدیراندان سورا، سئزئن طرفلرئزدن کچئب ائسپانئیایا گدهجهیم. 29و بئلئرم کی، سئزئن یانیزا گلنده مسئحئن بول برکتی ائنن گلهجهیم.
30ائندی ای قارداشلار! سئزه ربّئمئز عئسا مسئحئن خاطئری اوچون و روحون محبّتئنئن خاطئری اوچون یالواریرام کی، تارییا منئم حاقّیمدا الهدئیئز دوعالاردا من ائنن بئرلئکده اللشه سئز کی، 31یهودئیهده اولان ائطاعتسئزلردن خئلاص اولوم و اورشلئمه اولان خئدمتئم، موقدّسلره مقبول اولسون. 32بله ده من تارینین ائرادهسی ائنن شادلیق ائنان سئزئن یانیزا گلئم و سئزئن دوستلوغوز ائنان بئر دئنجَلئم. 33ائندی صولح و سالاماتلیق ورن تاری سئزئن هامیز ائنان اولسون. آمئن.
Currently Selected:
روملولارا 15: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
