حوارئلرئن ائشلری 21
21
اورشلئمه طرف
1اولاردان آیریلیب، دهنز یولی ائنن چیخدیغیمیز زامان، موستقئم کوس جزئره سئنه، صاباحیسی رودِس جزئره سئنه، اوردان دا پاتارا بندرئنه گتدئک. 2اوردا فئنئقئیهیه گدن بئر گمی تاپدیق و اونا مئنئب دهنزه چیخدیق. 3قئبرئسی سولوموزدا گؤردویوموز زامان، اوندان کچدئک و سورئیهیه طرف گتدئک. صور بندرئنده گمئدن اِندئک؛ چونکی گمی اوردا یوکونی بوشالداجاق ائدی. 4شاگئردلری تاپیب، اوردا یدّی گون قالدیق. اولار موقدّس روح طرفئندن پولوسا دیئردئلر کی، اورشلئمه آیاق قویماسین. 5بو گونلری کچئردندن سورا، اوردان آیریلیب یولا دوشدوک و اولارین هامیسی، آروادلاری و اوشاقلاری ائنن، بئزی شهرئن اشئیئنه قدر یولا سالدیلار. اوردا ساحئلده دئز چؤکوب، دوعا الهدئک. 6بئربئرئمئز ائنن وئداعلاشاندان سورا گمئیه مئندئک. اولار دا اِولرئنه قاییتدیلار.
7بئز صور بندرئندن دهنز یولونی باشا چاتدیریب، پِتولومائس شهرئنه گلدئک و قارداشلار ائنان سالاملاشیب، اولار ائنان بئر گون قالدیق. 8او گونون صاباحی اوردان آیریلیب، قیصرئیّه شهرئنه گلدئک و موبشّئر فئلئپوسون اِوئنه کی او «یدّئلر»دن بئری ائدی گدئب، اونون یانیندا قالدیق. 9فئلئپوسون دؤرد باکئره قیزی وار ائدی کی، نبئلئک الهیئردئلر.
10اوردا بئر نچه گون قالاندان سورا، یهودئیهدن آقابوس آدیندا بئر پیغمبر گلدی. 11او بئزئم یانیمیزا گلئب پولوسون بلباغیسینی گؤتوروب اؤز اللرئنی و آیاقلارینی باغلادی و ددی: «موقدّس روح دیئر: ”اورشلئمدهکی یهودئلر بو بلباغی صاحئبئنی اله بله باغلاییب، قیرییهودئلرئن الئنه تسلئم الئیهجکلر.“»
12بو سؤزلری اشئتدئیئمئز زامان، بئز و اوردا یاشایانلار پولوسا یالواردیق کی، اورشلئمه گتمهسئن. 13آمّا پولوس جاواب وردی: «نه الهیئرسئز؟ نه اوچون آغلاییب اورهیئمی سیندیریرسیز؟ من رب عئسانین آدی یولوندا نه ائنکی باغلانماغا، حتّا اورشلئمده اؤلمهیه بله حاضیرام.» 14اوندا کی گؤردوک پولوس قانع اولمور، بئز آرتیق ساکئت قالیب ددئک: «قوی ربّئن ائرادهسی اولسون!»
15بو گونلردن سورا، بئز حاضیرلاشیب اورشلئمه طرف یولا دوشدوک. 16قیصرئیّهدن بعضی شاگئردلر ده بئز ائنن گلئب، بئزی مناسون آدیندا قئبرئسلی قدئم شاگئردلردن بئرئنئن یانینا آپاردیلار کی، اونون یانیندا قوناق قالاق.
پولوس اورشلئمده
17اورشلئمه چاتدیغیمیز زامان قارداشلار بئزی شادلیق ائنان قبول الهدئلر. 18او گونون صاباحی، پولوس بئز ائنن یعقوبون یانینا گتدی؛ بوتون آغساقّاللار دا اوردا ائدئلر. 19اولار ائنان سالاملاشاندان سورا، پولوس موفصّل اولارا نقل الهدی کی، تاری اونون خئدمتی واسئطهسی ائنن قیرییهودئلر آراسیندا نهلر الهیئب.
20اولار، بولاری اشئدن زامان، تارییا حمد الهدئلر و اونا ددئلر: «قارداش، گؤرورسن کی، یهودئلر آراسیندا نچه مئن نفر ائمان گتئرئب؛ هامیسی دا شرئعت اوچون قیرتلیدئرلر. 21اولار سنئن حاقّیندا اشئدئبلر کی، سن قیرییهودئلر آراسیندا یاشایان بوتون یهودئلره تعلئم ورئرسن کی، موسا پیغمبردن مورتد اولسونلار و دیئرسن کی، نه اوشاقلارینی ختنه الهسئنلر، نه ده رسملرئمئزه عمل الهسئنلر. 22ائندی نه اولاجاق؟ یقئن کی، سنئن گلدئیئنی اشئدهجکلر. 23اونا گؤره سنه نه دِسَک، اونی اِله؛ بئزئم آرامیزدا نذری اولان دؤرد نفر وار. 24اولاری گؤتور و اولار ائنان بئر یرده اؤزونی تطهئر اله و اولارین باشلارینی قیرخماق خرجئنی سن ور. بله ده، هامی بئلر کی، سنئن حاقّیندا اشئتدئکلرئنئن اساسی یوخدور، بلکی سن اؤزون ده موسانین شرئعتئنی رئعایت اله یئرسن. 25آمّا ائمان گتئرن قیرییهودئلر بارهده، بئز قرارا گلئب یازدیق کی، اولار آنجاق گرک بوتلره تقدئم اولونموش اَتلردن، قاندان، بوغولموش حیوانلارین اتئندن و عئفّتسئزلئکدن اؤزلرئنی اوزاق ساخلاسینلار.»
26او زامان پولوس بو آداملاری گؤتوردی و صاباحیسی گون اولار ائنان بئر یرده اؤزونی تطهئر الهدی و معبده گئرئب طهارت گونلرئنئن نه واخت باشا چاتدیغینی و اولارین هر بئری اوچون نه زامان قوربان تقدئم الئیهجهیئنی بئلدئردی.
پولوس معبدده توتولور
27او یدّی گون باشا چاتاندا، آسئیا منطقهسئندن اولان یهودئلر پولوسی معبدده گؤروب، بوتون جاماعاتی قیزیشدیردیلار و اونی یاخالاییب، 28چیغیریردیلار: «ای ائسرایئللیلر، کؤمک اله یئن! بو، اله او آدامدیر کی، خالقیمیزین، شرئعتئن و بو یرئن ضئدّئنه هر یرده ائنسانلارا تعلئم ورئر. بوندان علاوه، حتّا یونانیلری ده معبده گتئرئب و بو موقدّس یری نجئس الهیئب.» 29چونکی بوندان قاباق اِفِسوسلی تروفئموسی شهرده اونونان بئرلئکده گؤرموشدولر و اله گومان الهیئردئلر کی، پولوس اونی معبده گتئرئب.
30بوتون شهر جوشا گلدی و خالق هر طرفدن قاچیب ییغیلدی و پولوسی توتوب معبددن اشئیه سورودولر و او آندا معبدئن قاپیلاری باغلاندی. 31اولار پولوسی اؤلدورمهیه اللَشنده، روم قوشونون فرماندهئنه خبر چاتدی کی، بوتون اورشلئم ائغتئشاش ائچئندهدئر. 32فرمانده ده او آندا سربازلاری و افسرلری گؤتوروب اولارین اوستونه جومدی. اولار فرمانده و سربازلاری گؤرن زامان، پولوسی دؤیمکدن ال چکدئلر.
33او واخت فرمانده یاخینلاشدی و پولوسی توتوب امر الهدی کی، اونی بئر جوت زنجئره باغلاسینلار. اوندا سوروشدی کی، او کئمدئر و نه الهیئب. 34ائزدئحام ائچئندن هره بئر شی باغیریردی و ولوله اوزوندن فرمانده دوغری معلومات آلا بئلمئردی. اونا گؤره ده امر الهدی کی، پولوسی قالایا آپارسینلار. 35پولوس پئلّهکنده اولاندا، خالقین خشمئنه گؤره سربازلار اونی اللری اوستونده آپاردیلار. 36اولارین دالیسیجا گلن جاماعات باغیریب دیئردئلر: «اؤلدورون اونی!»
پولوس خالق ائنان دانیشیر
37قالایا گئرهجکلرئنده پولوس فرماندهه ددی: «اولار سنه بئر شی دئیم؟»
فرمانده ددی: «مگر سن یونانی دئلئنی بئلئرسن؟ 38مگر سن او مئصئرلی دیئلسن کی، بئر مودّت قاباق آداملاری قئیام اوچون قیزیشدیریب، دؤرد مئن عوصیانچینی کؤشنه آپاردی؟!»
39پولوس ددی: «من طرسوسلی بئر یهودئیم، کئلئکئیا وئلایتئنئن موهوم بئر شهرئندن. سنه یالواریرام، ائجازه ور کی، خالق ائنان دانیشیم.»
40مئنباشی اونا ائجازه وردئکده، پولوس پئلّهلر اوستونده دوروب الی ائنن خالقا ائشاره الهدی و بؤیوک بئر سوکوت دوشَنده، اولارا عئبرانی دئلئنده دانیشیب ددی:
Currently Selected:
حوارئلرئن ائشلری 21: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
