حوارئلرئن ائشلری 20
20
پولوس مقدونئیّه و یوناندا
1ولوله ساکئت اولاندان سورا، پولوس شاگئردلری چاغیردی و اولاری تشوئق الهیندن سورا وئداعلاشیب، مقدونئیّه منطقهسئه یولا دوشدی. 2و او منطقه لردن کچئب ائمانلیلاری چوخلی تشوئق الهیندن سورا یونانئستانا گلدی. 3و اوچ آی اوردا قالدی و گمی ائنن سورئیهیه گتمک قصدئنده اولاندا، یهودئلر اونون ضئدّئنه نقشه چکدئلر. اونا گؤره ده قرار وردی کی، مقدونئیّه یولوندان قاییتسین. 4پئرهوس اوغلی بئرئیهلی سوپاتِر، تسالونئکلیلردن اَرئسترخوس و سِکوندوس، دِربهلی غایوس و تئموتاعوس و آسئیالی تئخئکوس و تَروفئموس اونونان بئرلئکده گتدئلر. 5آمّا بولار قاباقجا گدئب، بئزی تِروآسدا گؤزلهیئردئلر. 6بئز ده مایاسیز چؤرک بایرامینین گونلرئندن سورا، فئلئپئدن گمی ائنن یولا دوشدوک و بش گون عرضئنده تِروآسا، اولارین یانینا چاتدیق و اوردا یدّی گون قالدیق.
پولوسون تِروآسدا دانیشماسی
7هفتهنئن بئرئنجی گونونده، او زامان کی، چؤرک بؤلمک اوچون بئر یره ییغیلدیق. پولوس صاباحی گون یولا دوشمک نئیّتئنده اولدوغوندان، اولارا صؤحبت الهمهیه باشلادی و گجه یاریسینا قدر سؤزونی اوزاتدی. 8ییغیلدیغیمیز بالاخانادا چوخلی چیراق یانیردی. 9اله او حالدا کی پولوس حله دانیشیردی، اوتئخوس آدیندا بئر جاوان پنجره قیراغیندا اوتورموشدی، اونی آغیر یوخی باسدی و بئردن اوچونجی مرتبهدن آشاغی ییخیلدی و اونی یردن اؤلی گؤتوردولر. 10آمّا پولوس آشاغی انئب، اونون اوستونه دوشدی و اونی قوجاقلاییب ددی: «ناراحات اولمایین، چونکی اونون جانی ائچئندهدئر.» 11پولوس گئنه یوخاری چیخدی و چؤرک بؤلوب یئیندن سورا، سحره قدر اولار ائنان صؤحبت الهدی و سورا یولا دوشدی. 12اولار جاوان اوغلانی دئری آپاردیلار و حدسئز تسلّی تاپدیلار.
اِفِسوس آغساقّاللاری ائنن وئداعلاشماق
13آمّا بئز قاباقجا گمئیه گدئب آسوس شهرئنه طرف یولا دوشدوک کی، پولوسی اوردان گؤتورَک. چونکی بله قرار ورمئشدی کی، اؤزی پئیادا گتسئن. 14پولوس آسوسدا بئزه قوشولاندان سورا، اونی گمئیه گؤتوروب، مئتئلهنه شهرئنه گتدئک. 15اوردان گمی ائنن یولا دوشوب صاباحیسی خئیوس جزئرهسئنئن موقابئلئنه یتئشدئک. بئر گون سورا ساموسدان کچئب صاباحیسی دا مئلئتوس شهرئنه یتئشدئک. 16پولوس تصمئم توتموشدی کی، گمی ائنن اِفِسوسون یانیندان کچسئن. چونکی ائستهمئردی کی، آسئیا منطقه سئنده واختینی تلف الهسئن. پولوس تَلهسئردی کی، اگر مومکون اولسا، پنطئکاست گونونده اورشلئمده اولسون.
17پولوس مئلئتوسدان اِفِسوسا آدام گؤندَرئب، کئلئسانین آغساقّاللارینی یانینا چاغیرتدیردی. 18یانینا گلدئکلری زامان اولارا ددی: «سئز اؤزوز بئلئرسئز کی، آسئیا منطقهسئنه آیاق قویدوغوم ائلک گوندن بری، سئز ائنن بوتون واختی نجه کچئرتمئشم؛ 19بوتون تواضؤع، گؤز یاشلاری و یهودئلرئن نقشه لری ائنن باشیما گلن ائمتاحانلار ائنان ربّه خئدمت الهدئم. 20و نجه سئزه فایدالی اولان هچ بئر شیی بیان الهمکدن چکئنمهدئم؛ ائستر آچیقجا، ائستر اِودن اِوه سئزه تعلئم ورمئشم. 21هم یهودئلره و هم یونانئلره جئدّی شهادت وردئم کی، تؤوبه ائنن تارییا ساری دؤنسونلر و ربّئمئز عئسا مسئحه ائمان گتئرسئنلر.
22ائندی، باخین، موقدّس روحون هئدایتی ائنن اورشلئمه گدئرم و اوردا باشیما نه گلهجهیئنی ده بئلمئرم. 23آنجاق هر شهرده موقدّس روح منه شهادت ورئر کی، منی زنجئرلر و موصئبتلر گؤزلهیئر. 24آمّا من حیاتیمی هچ بئر جهتدن اؤزومه عزئز توتمورام. یتر کی، دؤورومی باشا چاتدیریم و رب عئسادان آلدیغیم خئدمتی، یعنی تاری فیضئنئن خوش خبرئنی جئدّی بئر شکئلده شهادت ورئم.
25«ائندی، باخین، بئلئرم کی، آرازدا تارینین پادشاهلیغینی اعلان الهدئیئم سئزلردن هچ بئرئز، آرتیق منئم اوزومی گؤرمهیهجکسئز. 26اونا گؤره ده، بو گونکی گونده سئزه شهادت ورئرم کی، بوتون ائنسانلارین قانیندان تمئزم. 27چونکی تارینین بوتون ائرادهسئنی سئزه بیان الهمکدن چکئنمهدئم. 28اؤزوزه و بوتون سورویه گؤز-قولاق اولون. تارینین موقدّس روحی سئزی او سورونون ائچئنده ناظئر تعیئن الهیئب کی، اؤز قانی باهاسینا آلدیغی تارینین کئلئساسینا چوبانلیق الئیهسئز. 29بئلئرم کی، من گدندن سورا، ییرتیجی قوردلار آرازا گلهجکلر و سورویه رحم الهمئیهجکلر. 30سئزئن اؤز آرازدان دا آداملار چیخاجاقلار کی، شاگئردلری داللاریسیجا چکئب آزدیرماق اوچون ترسه سؤزلر دانیشاجاقلار. 31بونا گؤره آییق اولون. خاطیرلایین کی، اوچ ائل گجه-گوندوز گؤز یاشلاری ائنن هر بئرئزه نصئحت ورمکدن ال چکمهدئم.
32ائندی سئزی تارییا و اونون فیضئنئن کلامینا تاپشیریرام کی، قادئردئر سئزی بئنا الهسئن و تقدئس اولونموشلارین هامیسی آراسیندا سئزه مئراث ورسئن. 33هچ کئمئن گوموشونه، و یا قیزیلینا، یا دا پالتارینا گؤز دئکمهمئشم. 34اؤزوز بئلئرسئز کی، منئم بو اَللرئم اؤز احتئیاجلاریما و من ائنن اولان آداملارا خئدمت الهیئب. 35الهدئیئم هر شیده سئزه گؤرستدئم کی، بو جور زحمت چکمک ائنن گرک ضعئفلره کؤمک الئیهسئز و رب عئسانین سؤزونی خاطیرلایین کی، او اؤزی ددی: ”ورمک آلماقدان داها چوخ برکتلیدئر.“»
36بولاری دئیندن سورا، پولوس دئز چؤکوب، اولارین هامیسی ائنن دوعا الهدی. 37اولار دا اوجا سَس ائنن آغلادیلار و پولوسی قوجاقلاییب، دالبادال اؤپدولر. 38اولاری لاپ چوخ قمگئن الهین، اونون ددئیی بو سؤزلر ائدی کی، «آرتیق منئم اوزومی گؤرمهیهجکسئز.» سورا اونی گمئیه قدر یولا سالدیلار.
Currently Selected:
حوارئلرئن ائشلری 20: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
