حوارئلرئن ائشلری 17
17
پولوس و سئلاس تسالونئکده
1پولوس و سئلاس آمفئپولئس و آپولّونئیا شهرلرئندن کچئب تسالونئک شهرئنه گلدئلر کی، اوردا یهودی بئر عئبادتگاه وار ائدی. 2پولوس نجه کی، عادتی ائدی، یهودئلرئن یانینا گدئب اوچ موقدّس شنبه اولار ائنان موقدّس یازیلار حاقّیندا بحث الهیئردی، 3و آچیقلاییب ثابئت الهیئردی کی لازیم ائدی کی مسئح عذاب چکئب اؤلولردن دئرئلسئن. او دیئردی کی: «سئزه اعلان الهدئیئم بو عئسا، اله همن وعده ورئلن مسئحدئر.» 4اولاردان بعضئلری، هم ده تاریدان قورخان یونانیلرئن بؤیوک بئر قئسمی و بئر عئدّه آدلی-سانلی آروادلار، قانع اولوب پولوس و سئلاسا قوشولدولار.
5آمّا یهودئلر پاخیلّیق الهیئب بازار خالقیندان بعضی یاراماز آداملاری اؤزلری ائنن گؤتوردولر و شولوغلوق سالیب، شهرده ائغتئشاش یاراتدیلار. و یاسونون اِوئنه هوجوم الهیئب ائستهدئلر کی، پولوس و سئلاسی خالقین حوضورونا چیخارتسینلار. 6آمّا اولاری تاپمایان زامان، یاسون و بعضی قارداشلاری شهرئن ریئسلری یانینا سورویوب قیشقیریردیلار: «دونیانی آلت-اوست الهین بو آداملار بورایا دا گلئبلر، 7و یاسون اولاری اِوئنه قوناق آپاریب. بولارین هامیسی ائمپراطورون فرمانلارینا ضئدّ دوروب دیئرلر کی، عئسا آدیندا آیری بئر پادشاه وار.» 8خالق و شهرئن ریئسلری بولاری اشئدنده قیزیشدیلار 9و یاسون و او بئرئلردن ضمانت آلاندان سورا، اولاری بوراخدیلار.
بئرئیه شهرئنده
10قارداشلار فورَن گجه ائنن پولوس و سئلاسی بئرئیه شهرئنه گؤندَردئلر. اورایا چاتدیقلاری زامان، یهودئلرئن عئبادتگاهلارینا گتدئلر. 11بولار تسالونئکده اولانلاردان داها نجئب ائدئلر، چونکی کلامی بؤیوک شؤق ائنان قبول الهیئب هر گون موقدّس یازیلاری آراشدیریردیلار کی، بو شیلرئن دوغری اولدوغونی گؤرسونلر. 12بله ده اولاردان بئر چوخی بئر عئدّه مؤعتبر یونانی کئشی و آرواد ائنان ائمان گتئردئلر.
13آمّا تسالونئکدهکی یهودئلر پولوسون بئرئیهده ده، تارینین کلامینی اعلان الهدئیئنی بئلَنده، اورایا دا گلدئلر و خالقی تحرئک الهیئب قیزیشدیردیلار. 14او زامان قارداشلار، پولوسی فورَن یولا سالدیلار کی، دهنزه طرف گتسئن، آمّا سئلاس و تئموتاعوس اوردا قالدی. 15پولوس ائنان بئرلئکده گدنلر، اونی آتن شهرئنه قدر گتئردئلر و پولوسدان سئلاس و تئموتاعوس اوچون امر آلاندان سورا کی، تزلئک ائنن اونون یانینا گلسئنلر، اوردان آیریلدیلار.
پولوس آتنده
16پولوس آتنده اولاری گؤزلهین واخت، بو شهری بوتلر ائنن دولی گؤروب روحونی قم باسدی. 17پس، عئبادتگاهدا یهودئلر ائنن، تاریدان قورخانلار ائنان، هر گون ده بازار میدانیندا راستلاشدیغی آداملار ائنان بحث الهیئردی. 18اپئکوری و رواقی فئلسوفلاردان بعضئلری ده اونونان بحث الهدئلر. بئر نچهسی دیئردئلر: «بو بوشبوغاز نه دمک ائستهیئر؟» آیریلاری دا دیئردئلر: «اجنبی آللاهلاری تبلئغ الهین بئر آداما بنزهیئر.» چونکی پولوس اولارا عئسانی و اؤلولردن دئرئلمهنی اعلان الهیئردی. 19اولار اونی توتدولار و ’آریوپاگوس‘ ائجلاسینا گتئرئب ددئلر: «اولار بئلَک تبلئغ الهدئیئن بو تزه تعلئم نهدئر؟ 20چونکی سنئن سؤزلرئن بئزئم قولاقلاریمیزا قرئبه گلئر. ائندی بو شیلرئن نه اولدوغونی بئلمک ائستهیئرئک.» 21بوتون آتِنلیلر و اوردا یاشایان اجنبئلر واختلارینی آنجاق بونون ائنان کچئردئردئلر کی، یا تزه بئر شی دسئنلر و یا تزه بئر شی اشئتسئنلر.
22پولوس آریوپاگوسون اورتاسیندا دوروب ددی: «آتن کئشئلری! من سئزی هر جهتدن دئندار گؤرورم. 23چونکی شهردن کچَنده، سئزئن نهلری پرستئش الهدئکلرئزی آراشدیردیم و بئر قوربانگاها دا راست گلدئم کی، اوستونده بله یازیلمیشدی: ”نامعلوم بئر تارییا.“ من سئزه، بئلمهدن پرستئش الهدئیئزی اعلان الهیئرم.
24او تارینی کی، دونیانی و ائچئنده اولان بوتون شیلری یارادیب و گؤیون و یرئن ربّی اولدوغوندان اَل ائنن تئکئلمئش معبدلرده ساکئن اولماز. 25ائنسان اَللری ائنن ده اونا خئدمت اولونا بئلمز، گرچی اونون هچ شیه احتئیاجی یوخدور، چونکی هامییا حیاتی، نفسی و بوتون شیلری ورن او، اؤزودور. 26او، بوتون مئلّتلرئن ائنسانلارینی، بئر نفردن یاراتدی کی، بوتون یر اوزونده یاشاسینلار و قاباقدان اولارین واختلارینی و یاشادیقلاری یرلرئن سرحدلرئنی تعیئن الهدی کی، 27تارینی آختارسینلار و بلکه ده گزئب اونی تاپسینلار، گرچی او، هچ بئرئمئزدن اوزاق دیئل. 28چونکی دئرئلئیئمئز، حرکتئمئز و وارلیغیمیز اوندادیر، نجه کی، شاعئرلرئزدن بعضئلری ده دیئبلر: ”بئز ده اونون نسلئندنئک.“
29«بله ده، تارینین نسئلی اولدوغوموزا گؤره، گرک بله دوشونمهیک کی، ائلاهی وارلیق، ائنسانین صنت و تخیّولی ائنن شکئل تاپان قیزیلا، گوموشه، یا دا داشا بنزهیئر. 30دمهلی، تاری جهالت زامانلارینا گؤز یوموب، ائندی هر یرده ائنسانلارا اعلان الهیئر کی، تؤوبه الهسئنلر. 31چونکی بئر گون تعیئن الهیئب کی، او گونده سچدئیی آدامین واسئطهسی ائنن دونیانی صالحلئکده موحاکئمه اِلئیهجک و اونی اؤلولردن دئرئلتدئیی ائنن، بوتون ائنسانلارا بو ائشی ثابئت الهدی.»
32اؤلولرئن دئرئلمهسی بارهسئنده اِشئدنده، بعضئلری مسخره الهیئب گولدولر، آمّا قالانلاری ددئلر: «بو بارهده گئنه سنه قولاق آساریق.» 33بله ده پولوس اولارین آراسیندان گتدی. 34آمّا بعضی آداملار اونا قوشولوب ائمان گتئردئلر؛ بولارین آراسیندا آریوپاگوسلی دئونئسئوس و دامارئس آدیندا بئر آرواد و اولار ائنان برابر آیری آداملار دا وار ائدی.
Currently Selected:
حوارئلرئن ائشلری 17: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
