حوارئلرئن ائشلری 16
16
تئموتاعوسون اولارا قوشولماسی
1پولوس دِربه و لئستره شهرلرئنه گلدی. اوردا تئموتاعوس آدیندا بئر شاگئرد وار ائدی کی ائمانلی بئر یهودی آروادین اوغلی ائدی، آمّا آتاسی یونانی ائدی. 2لئستره و ائقونئیهده اولان قارداشلار اونون حاقّیندا یاخشی سؤزلر دیئردئلر. 3پولوس کی ائستهیئردی بو کئشی اونونان گتسئن، او یرلرده یاشایان یهودئلرئن خاطئرئنه اونی ختنه الهدی؛ چونکی آتاسینین یونانی اولدوغونی هامی بئلئردی. 4اولار شهردن شهره گدنده، او قانونلاری کی، اورشلئمده حوارئلر و آغساقّاللار قویموشدولار، ائمانلیلارا تاپشیردیلار کی اولاری رئعایت الهسئنلر. 5بله ده کئلئسالار ائماندا قووّت تاپیب، گون بهگون ساییدا چوخالیردیلار.
پولوسون رؤیاسی
6موقدّس روح اولارا ائجازه ورمهدی کی، آسئیا ایالتئنده کلامی دانیشسینلار، اونا گؤره ده فئرئجئیه و قالاتئیا منطقهلرئندن کچدئلر. 7مئسیا منطقهسئنه چاتاندا، بئتئنئیا وئلایتئنه گتمهیه اَللَشدئلر، آمّا عئسانین روحی اولارا ائجازه ورمهدی. 8مئسیادان کچئب تروآسا گتدئلر. 9گجه پولوس بئر رؤیا گؤردی؛ مقدونئیّهلی بئر آدام اونون قاباغیندا دوردی و اونا یالواریب دیئردی: «مقدونئیّهیه گل و بئزه کؤمک اله!» 10پولوسون بو رؤیاسیندان سورا، فورَن اللشدئک کی، مقدونئیّهیه گدک، چونکی بله حساب الهدئک کی، رب بئزی ائنجئلئن خوش خبرئنی اولارا دا موژده ورمک اوچون چاغیریب.
لئدئیه ائمان گتئرئر
11دهنز یولی ائنن تِروآس شهرئندن چیخیب، دوز ساموتراکئیا جزئرهسئنه و صاباحیسی دا نئیاپولئس شهرئنه یتئشدئک. 12اوردان دا فئلئپئیه شهرئنه گتدئک کی، مقدونئیّه منطقهسئئن باش شهرلرئندن بئری ائدی و روملولار اوردا یاشاییردیلار. بو شهرده بئر نچه گون قالدیق.
13موقدّس شنبه گونی شهردن چیخیب بئر چای قیراغینا گلدئک و گومان الهیئردئک کی، اوردا عئبادت اوچون بئر یر اولاجاق. اوتوروب اورایا ییغیلان آروادلار ائنان دانیشماغا باشلادیق. 14تئیاتئرا شهرئندن لئدئیه آدیندا ارغوان قوماش ساتان بئر آرواد بئزه قولاق آسیردی. لئدئیه تارینی پرستئش الهین بئری ائدی. رب اونون اورهیئنی آچدی کی، پولوسون دانیشدیقلارینی قبول الهسئن. 15لئدئیه عایئلهسی ائنن برابر تعمئد آلاندان سورا بئزه یالواریب ددی: «اگر منی ربّه ائمانلی ساییبسیز، اِوئمه گلئن و اوردا قالین.» و بئزه چوخ ائصرار الهدی.
پولوس ائنان سئلاس زئنداندا
16بئر واخت بئز دوعا اولونان یره گدَنده، ائچئنده فالچیلیق روحی اولان بئر کنئز بئزه راست گلدی کی، فالچیلیق الهمک ائنن آغالارینا چوخ قازانج گتئرئردی. 17قیز، پولوس و بئزئم دالیمیزا دوشدی و قیشقیریب دیئردی: «بو آداملار تاعالا تارینین قوللاریدیرلار کی، سئزه نئجات یولونی اعلان الهیئرلر.» 18او بئر چوخ گونلر بونی گئنه الهدی. آخیردا پولوس چوخ ناراحات اولدی و دؤنوب او روحا ددی: «عئسا مسئحئن آدیندا سنه امر الهیئرم کی، اوندان اشئیه چیخاسان!» و روح او آندا اشئیه چیخدی.
19آمّا کنئزئن آغالاری، قازانج اومئدئنئن کسئلدئیئنی گؤرَنده، پولوس و سئلاسی توتوب، میدانا، حاکئملرئن یانینا چکئب آپاردیلار. 20اولاری باش حاکئملرئن یانینا آپاراندان سورا، ددئلر: «بو آداملار یهودیدئرلر و شهرئمئزه ائغتئشاش سالیرلار. 21و بئز روملولارا اله رسملری اعلان الهیئرلر کی، اولاری نه قبول الهمک، نه ده عمل اله مک بئزه جائزدئر.»
22خالق دا اولارین ضئدّئنه قالخدی و باش حاکئملر امر الهدئلر کی، اولارین پالتارلارینی اَیئنلرئندن ییرتیب، ال آغاجی ائنن دؤیسونلر. 23پولوس و سئلاسا چوخ ضربه ووراندان سورا، زئندانا آتیب زئندانبانا امر الهدئلر کی، اولاری دئقّت ائنن گودسون. 24زئندانبان دا، بله بئر امری آلدیغیندان، اولاری ائچهری ده کی زئندانا آتیب، آیاقلارینی کوندهیه ووردی.
25آمّا گجه یاریسینا یاخین پولوس و سئلاس دوعا الهیئب، تارییا حمد نغمهلری اوخویوردولار. زئندانئلر ده اولارا قولاق آسیردیلار. 26بئردن اله بؤیوک بئر زلزله اولدی کی، زئندانین بونؤورهلری اَسدی. او آندا بوتون قاپیلار آچیلدی و هامینین زنجئرلری تؤکولدی. 27زئندانبان اویانیب، زئندانین قاپیلارینی آچیلمیش گؤرَنده قیلینجینی چکدی و زئندانیلری قاچمیش گومان الهیئب ائستهدی کی، اؤزونی اؤلدورسون. 28آمّا پولوس اوجا سس ائنن قیشقیریب ددی: «اؤزونه هچ بئر زئیان یتئرمه، چونکی بئز هامیمیز بورداییق.» 29زئندانبان ائشیق ائستهیئب تلهسئک ائچهری گئردی. قورخودان لرزهیه دوشوب، پولوس و سئلاسین قاباغیندا یره دوشدی. 30اوندان سورا اولاری اشئیه چیخاردیب ددی: «آغالار! نئجات تاپماق اوچون نه اِله مهلییم؟»
31اولار دا ددئلر: «رب عئسایا ائمان گتئر کی، سن و اِوئن اهلی نئجات تاپارسان.» 32و ربّئن سؤزونی اونا و اِوئندهکئلرئن هامیسینا دانیشدیلار. 33زئندانبان، گجهنئن همن ساعاتیندا اولاری گؤتوروب یارالارینی یودی و بوتون اِوئندهکئلر ائنن برابر فورَن تعمئد آلدی. 34و اولاری اؤز اِوئنه گتئرئب سوفره سالدی و تارییا ائمان گتئردئیئندن، بوتون اِو اهلی ائنن شادلیق الهدئلر.
35سحر آچیلاندا، باش حاکئملر موحافئظلرئنی گؤندَردئلر کی، دسئنلر: «او آداملاری آزاد اله.» 36زئندانبان بو سؤزلری پولوسا خبر ورئب ددی: «باش حاکئملر آدام گؤندَرئبلر کی، سئزی آزاد الهسئنلر. بونا گؤره، ائندی چیخین و سالامات گدئن.»
37آمّا پولوس اولارا ددی: «روم تبعه لری اولدوغوموز حالدا، بئزی موحاکئمه الهمهدن بوتون خالقین قاباغیندا دؤیوب زئندانا آتیبلار؛ ائندی ده بئزی گئزلئجه بوراخماق ائستهیئرلر؟! یوخ، اولماز! قوی اؤزلری گلئب بئزی اشئیه چیخارتسینلار.»
38موحافئظلر بو سؤزلری باش حاکئملره خبر وردئلر. اولار پولوس و سئلاسین روم تبعه لری اولدوغونی اِشئدنده قورخدولار. 39پس گلئب اولارا یالواردیلار و اشئیه چیخارداندان سورا، اولارا ائلتئماس الهدئلر کی، شهری ترک الهسئنلر. 40اولار دا زئنداندان چیخیب، لئدئیهنئن اِوئنه گتدئلر و قارداشلاری گؤروب اولاری تشوئق الهدئلر. اوندان سورا یولا دوشدولر.
Currently Selected:
حوارئلرئن ائشلری 16: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
