۱قورئنتلیلره 9
9
پولوسون حاقلاری
1مگر من آزاد دیئلم؟ مگر من حواری دیئلم؟ مگر ربّئمئز عئسانی گؤرمهمئشم؟ مگر سئز ربده منئم ائشئمئن ثمره سی دیئلسئز؟ 2اگر اؤزگهلره حواری دیئلم، هچ اولماسا، سئزه حوارییَم؛ چونکی ربده حوارئلئیئمئن مؤهوری سئزلرسئز.
3منی ائستئنطاق الهینلره دئفاعئیم بودور: 4مگر حاقّیمیز یوخدور کی، یِیئب ائچک؟ 5مگر حاقّیمیز یوخدور کی، ائمانلی آروادیمیزی یانیمیزدا گؤتوروب گزدئرک. نجه کی، حتّا آیری حوارئلر، ربّئن قارداشلاری و کئفا دا الهیئر؟ 6و یا ائشلَمهمَیه آنجاق منئم و بارنابانین حاقّی یوخدور؟
7کئم وار کی، هر زامان اؤز خرجی ائنن سربازلیق اِلهمئش اولسون؟ کئم وار کی، اوزوم باغی اکئب، اونون میوهسئندن یمهسئن؟ کئم وار کی، سورونی اوتاریب، اونون سودوندن ائچمهسئن؟ 8مگر بولاری ائنسان گؤروشونه گؤره دیئرم؟ مگر شرئعت ده بو شیلری دمئر؟ 9چونکی موسانین شرئعتئنده بله یازیلیب: «خرمنی دؤین اؤکوزون آغزینی باغلاما.» مگر تاری اؤکوزلرئن قیدئنه قالیر؟ 10مگر بئزئم اوچون بو شیلری دمئر؟ بلی، بولار بئزئم اوچون یازیلیب، چونکی شوخوملایان اومئد ائنن جوت سورمهلیدئر، و خرمن دؤین غلّه یه شرئک اولماق اومئدی ائنن دؤیمهلیدئر. 11اگر بئز سئزده روحانی توخوملار اکدئک، سئزدن مادّی شیلر بئچسک، بو سئزه چوخ گلئر؟ 12اگر سئزئن اوستوزده اؤزگهلرئن بله بئر حاقّی وار، مگر بئزئم بونا داها چوخ حاقّیمیز یوخدور؟ آمّا بئز بو حاقدان ائستئفاده اله مهدئک، بلکی هر شیه تاب گتئردئک کی، مسئحئن ائنجئلئنئن خوش خبرئنه هچ بئر مانع اولمایاق. 13مگر بئلمئرسئز کی، معبدده موقدّس خئدمتلری گؤرنلر معبدئن یمهیئندن ییئرلر و قوربانگاهین خئدمتچئلری اؤز پایلارینی قوربانگاهدان گؤتورورلر؟ 14بله ده رب امر الهیئب کی، ائنجئلئن خوش خبرئنی موژده ورنلر، روزئلرئنی ائنجئلدن گؤتورسونلر.
15آمّا من بو حاقلارین هچ بئرئندن ائستئفاده اله مهمئشم و بو سؤزلری یازمیرام کی، منئم اوچون ده اله اولسون. چونکی اؤلوم منه بوندان داها یاخشیدیر کی، بئری منئم ائفتئخاریمی بوشا چیخارتسین. 16اگر ائنجئلئن خوش خبرئنی اعلان الهیئرم، فخر الهمهیه حاقّیم یوخدور، چونکی بو، منئم وظئفمدئر؛ آمّا وای منه، اگر ائنجئلی اعلان اله مهیم! 17اگر بونی اؤز میلئم ائنن اله سم، اجرئم وار؛ آمّا اگر اؤز میلئم ائنن اِله مهسم، منه تاپشیریلان وظئفهنی یرئنه یتئرئرم. 18بس منئم اجرئم نهدئر؟ بودور کی، ائنجئلئن خوش خبرئنی اعلان الهین واخت، اونی تمنّاسیز عرض اله یَم کی، ائنجئلده اولان حاقّیمدان تامامن ائستئفاده اله مهیئم.
19چونکی گرچی هر کسدن آزادام، اؤزومی هامییا قول اله مئشم کی، داها چوخ آدام قازانیم. 20یهودئلری قازانماق اوچون اولارا یهودی کئمی اولدوم. اؤزوم شرئعتئن حاکئمئیّتی آلتیندا اولمادیغیم حالدا، شرئعت آلتیندا اولانلارا شرئعت آلتینداکی کئمی اولدوم کی، اولاری قازانیم. 21شرئعتسئز آداملاری قازانماق اوچون، شرئعتسئزلره شرئعتسئز بئر آدام کئمی اولدوم، گرچی تارینین حوضوروندا شرئعتسئز اولماییب، مسئحئن شرئعتی آلتیندایام. 22ضعئفلری قازانماق اوچون، اولارا ضعئف کئمی اولدوم. هر کس اوچون هر شی اولدوم کی، هر نه جور اولور-اولسون، بعضئلرئنه نئجات ورئم. 23بولارین هامیسینی ائنجئلئن خاطئری اوچون الهیئرم کی، اوندا پاییم اولسون.
24مگر بئلمئرسئز کی، قاچیش میدانیندا قاچانلارین هامیسی قاچار، آمّا تک بئر نفر جایئزهنی آلار؟ اِله قاچین کی، جایئزهنی قازاناسیز. 25موسابئقهده رقابت الهین، هر شیده نفسئنئن قاباغینی آلار. اولار بونی فانی بئر تاجی آلماق اوچون الهیئرلر، آمّا بئز فانی اولمایان اوچون الهیئرئک. 26بونا گؤره، من هدفسئز قاچان بئری کئمی قاچمیرام. یوموروغومی هاوایا ووران کئمی آتمیرام؛ 27بلکی بدنئمه اذئیّت چکدئرئب اونی قول الهیئرم کی، اولمایا اؤزگهلره وعظ الهیندن سورا، اؤزوم رد اولوم.
Currently Selected:
۱قورئنتلیلره 9: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
