MATTHAI 9
9
Jesu in Khutlekhe zaw Mi Khat Damsak
(Mrk 2:1-12; Luk 5:17-26)
1Tua lai panin gunkuang ah tuang leuleu-in tuili gal khat lam a om ama khua ah a va tungkik hi. 2Mi pawl khat in khutlekhe zaw mi khat, a lupna pheek tawh hong pua-in Jesu kiang a hong tunpih uh hi. Jesu in amauteʼ upna a muh ciangin a cina mipa kiangah, “Ka ta aw, na lungsim kinuamsak in; na mawhna hong kimaisak khinta hi,” a ci hi. 3Tua ciangin Thukham hilh siate pawl khat in a lungsim uh ah, “Pasian tawh a kikim bangin kampau ahih manin hih mipa in Pasian a dem ahi hi,” ci-in a ngaihsun uh hi. 4Ahi zongin Jesu in amauteʼ ngaihsutna thei ahih manin, “Bang hangin a sia lamin ngaihsun na hi uh hiam? 5‘Na mawhna hong kimaisak hi,’ cih ding le, ‘Tho inla pai in,’ cih ding koi baih zaw ahi hiam? Kampau lel pen baih mahmah hi. 6Ahi zongin Mihing Tapa in leitungah mawhmaisak theih nading thu nei hi, ci-in na theih nadingun kong lak ding hi,” a cih khit ciangin khutlekhe zaw mipa kiangah, “Tho in; na lupna pheek pua inla na inn ah ciah in,” a ci hi. 7Amah zong tho-in a inn ah a ciah pah hi. 8Mihonte in hih thu a theih uh ciangin lau mahmah uh a, Pasian in mihingte tungah hih bang vangliatna a piakna hangin ama min a phat uh hi.
Matthai A Kisapna
(Mrk 12:13-17; Luk 5:27-32)
9Tua lai mun panin Jesu a paikhiat ciangin siahdongpa Matthai a zumah tu-in a om mu a, “Hong zui in,” a cih leh amah zong dingin a zui pah hi.
10Jesu in Matthaiʼ inn ah nitak an a nek laitakin siahdong dangte le thukham a khial midang tampite in zong Jesu le a nungzuite tawh an a nekhawm uh hi. 11Farisi mite in hih thu a muh uh ciangin Jesu nungzuite kiangah, “Bang hangin na siapa un siahdongte le thukham khialte tawh an nekhawm ahi hiam?” a ci uh hi.#Luk 15:1-2 12Jesu in hih thu a zak ciangin, “Cidamte in siavuan kisam lo uh a, cina mite bek in kisam uh hi. 13Lai Siangtho sungah, ‘Ganhing tawh biak ding ka deih kei a, migitna ka deih zaw hi,’ ci-in a genna pen bang a cihnopna ahi hiam, va kan un. Mite in a zahtak mihoihte a sam dingin a hong pai ka hi kei a, mite in a pampaih mite a sam dingin a hong pai ka hi hi,” a ci hi.#Mat 12:7 #Hos 6:6
Antanna Thu Dotna
(Mrk 2:18-22; Luk 5:33-39)
14Tua ciangin Jesu kiangah Tuiphumpa Johanʼ nungzuite hong pai uh a, “Bang hangin kote le Farisi mite in an tang zelzel napi-in, na nungzuite in tang lo se ahi uh hiam?” ci-in a dong uh hi. 15Jesu in amaute kiangah, “Mopina pawi khat ah, a zineipa a om sungin a mopawi simte dah dingin um na hi uh hiam? Dah het lo ding uh hi. Ahi zongin amaute kiang panin zineipa a kilakkhiat ding hun hong tung dinga, tua hun ciangin amaute in an a tang ding uh hi. 16Kuamah in a ton nai lo puan bek thak tawh puan lui a phop kei hi. Tua bangin phop leh puan bek thak a ton ciangin a lui kaigawmin a vang a gol semsem ding hi. 17Kuamah in savun um lui sungah leenggahzu thak thun lo hi. Kithun leh a savun um phukham dinga, a leenggahzu bua-in a savun um zong a sia a suak ding hi. Leenggahzu thak pen savun um thak sungah kithun bek hi. Tua ahih manin a nihin a sia om lo hi,” ci-in a dawng hi.
Jew Mi Ulian paʼ Tanu le Jesuʼ Puan A Lawng Numei
(Mrk 5:21-43; Luk 8:40-56)
18Tua bangin Jesu in thu genin a om laitakin Jesu kiangah Jew mi ulian khat hong pai-in ama mai ah hong khukdin a, “Tu mahmah in ka tanu a si hi. Ahi zongin nang hong pai-in ama tungah na khut hong nga lecin amah hingkik ding hi,” ci-in a thum hi. 19Jesu zong ding pah a, a nungzuite tawh tua mipa a zui uh hi. 20Tua laitakin kum sawm le kum nih tawntung a si a luang numei khat Jesuʼ nungah hong pai-in a puan mongteep a lawngsim hi. 21Tua numei in, “A puan va lawng bek leng zong ka dam ding hi,” ci-in a lungsimah ngaihsun hi. 22Jesu zong hong kihei a, tua numei a muh ciangin, “Ka tanu aw, na lung kinuamsak in. Na upna in nang hong damsak khinta hi,” a cih khit phetin tua numei a dam pah hi.
23Jew mi ulian paʼ inn ah Jesu a tun ciangin tamngai tum mite le mihonpi a gamlum henhan a muh ciangin, 24“Na vekpi-un paikhia un. Hih numeino a si hi lo a, a ihmu bek ahi hi,” a ci hi. Ahi zongin amaute in Jesu zahpihin a nuihsan uh hi. 25Ahi zongin mihonpite a pua lamah a kipai khiatsak khit ciangin tua numeino omna ah Jesu tumin a khut a va let ciangin tua numeino hong tho hi. 26Hih thupiang tua gam khempeuh ah a kizel hi.
Mittaw Mi Nih in Khua Mukik
27Tua lai panin Jesu a paikhiat ciangin mittaw mi nih in a nungah hong zui-in nakpi takin kiko uh a, “Davidʼ suan Jesu aw, kote hong hehpih in,” ci-in a thum uh hi. 28Inn ah Jesu a lut ciangin mittaw mi nihte in zong hong zui uh hi. Tua ciangin Jesu in, “Na mit uh khua hong musak thei dingin hong um na hi uh hiam?” ci-in a dot ciangin amaute in, “Topa aw, ka hong um uh hi,” ci-in a dawng uh hi. 29Tua ciangin Jesu in amauteʼ mit lawnsak a, “Na upna uh tawh kizui-in note tungah hong piang tahen,” a ci hi. 30Tua ciangin amaute in khua mukik uh a, Jesu in amau tegel kiangah, “Hih thupiang kuamah theisak kei un,” ci-in khauh takin a gen hi. 31Ahi zongin amaute paikhia uh a, tua gam sung khempeuh ah hih thu a zasak uh hi.
A Pau Thei lo Mi Khat Pau Theikik
32Tua mi nihte a paikhiat laitakun mi pawl khat in dawi a veina hangin a pau thei lo mi khat, Jesu kiangah a hong paipih uh hi. 33Ama sung panin dawi a kihawlkhiat khit phetin tua mipa hong pau theikik pah hi. Mihonpite in lamdang sa mahmah uh a, “Israel gam sungah hih bang thu piang ngei nai lo hi,” a ci uh hi. 34Ahi zongin Farisi mite in, “Dawimang lian pen pa min tawh hih bangin dawi a hawl khia ahi hi,” a ci uh hi.#Mat 10:25; 12:24; Mrk 3:22; Luk 11:15
Jesu in Mite Hehpihhuai sa
35Tua bangin khuapite le khuaneute ah Jesu pai kawikawi a, a kikhopna uh innte ah thu hilhin, Pasianʼ ukna hangin a lungdamhuai thute gen a, natna nam khempeuh a damsak hi.#Mat 4:23; Mrk 1:39; Luk 4:44 36Mihonte a muh ciangin, a cing nei lo tuu hon bangin gimna ngahin lungkhamin om uh ahih manin hehpihhuai a sa hi.#Gam 27:17; 1Kum 22:17; 2Khang 18:16; Ezk 34:5; Zek 10:2; Mrk 6:34 37Tua ahih manin a nungzuite kiangah, “Anlak ding tampi om napi-in anlak na a sem ding mi tawm bek a om hi. 38Tua ahih manin ama an a la dingin an nei Topa in nasem tampi hong sawl nadingin thu ngen un,” a ci hi.#Luk 10:2
Currently Selected:
MATTHAI 9: TBR17
Highlight
Copy
Compare
Share
Want to have your highlights saved across all your devices? Sign up or sign in
Tedim Bible © Bible Society of Myanmar, 2017.
