MATTHAI 8
8
Jesu in Miphak Khat Damsak
(Mrk 1:40-45; Luk 5:12-16)
1Tua mual panin Jesu hong pai suk ciangin mihon tampi in amah a zui uh hi. 2Tua laitakin miphak khat hong pai-in ama mai ah hong khukdin a, “Topa aw, nong damsaknop nakleh nong damsak thei ding hi,” a ci hi. 3Jesu in zong a khut zanin tua mipa lawng a, “Ka hong damsak nuam hi; dam ta in,” a cih khit phetin a phakna a dam pah hi. 4Tua ciangin Jesu in ama kiangah, “Hih thupiang kuama kiangah gen masa loin siampipa kiangah va paisuak pahin va kivelsak inla, na dam khitna thu mi khempeuh in a theih nadingin Moses thupiakna tawh kizui-in biakna va pia in,” ci-in a vaikhak hi.#Siam 14:1-32
Jesu in Galkap bupaʼ Nasem pa Damsak
(Luk 7:1-10)
5Kapernaum khua a tun ciangin Rom mi galkap bu khat ama kiangah hong pai-in, 6“Topa aw, ka nasem pa cina-in inn ah lupna ngakin om a, gim mahmah in taang zo het lo ahih manin hong damsak in,” ci-in a thum hi. 7Jesu in, “Hong pai-in ka damsak ding hi,” a ci hi. 8Ahi zongin galkap bupa in, “Topa aw, keima inn ah nang pipi nong pai dingin kilawm lo ka hih manin a dam nadingin thu pia lel lecin zong ka nasem pa dam ding hi. 9Kei zong uliante khutnuai ah nasem mi ka hi a, keima khutnuai ah zong galkapte a om hi. Tua galkapte khat kiangah, ‘Pai in,’ ci-in sawl leng, pai a, a dang khat kiangah, ‘Hong pai in,’ ci-in sam leng, hong pai a, ka nasem pa kiangah, ‘Hih sem in,’ ci-in sawl leng, a sem hi,” a ci hi. 10Jesu in hih bupa thugen a zak ciangin lamdang sa a, amah a zui mihonte kiangah, “A mantak a kong genin ah Israel mite lak nangawn ah hih bang upna a nei ka mu nai kei hi. 11Nisuahna le nitumna panin mi tampi tak hong pai-in vantung ki-ukna sungah Abraham, Isaac le Jakob-te tawh an ne-in sabuai ah tukhawm ding uh hi.#Luk 13:29 12Ahi zongin vantung ki-ukna sungah a om dingin a kingaihsun Israel mite ahihleh pualam khuamialna ah kilawn khia dinga, tua lai ah kapin a hagawi ding uh hi,” a ci hi.#Mat 22:13; 25:30; Luk 13:28 13Tua ciangin Jesu in galkap bupa kiangah, “Na inn ah ciah in. Na up bangin hong piang ding hi,” a ci hi. Tua hun laitak teek mahin a nasem pa a dam hi.
Jesu in Peterʼ Sungnu Damsak
(Mrk 1:29-31; Luk 4:38-39)
14Peterʼ inn ah Jesu va pai a, Peterʼ sungnu nattunin lupna tungah a lum a mu hi. 15Jesu in ama khut va lawnsak hi. A natna dam pah a, amah zong tho-in a zinte a do zo pah hi.
Jesu in Nitakin Mi Tampi Damsak
(Mrk 1:32-34; Luk 4:40-41)
16A nitak ciangin mite in Jesu kiangah dawivei mi tampi tak hong paipih uh hi. Jesu in kam khat pauna bek tawh dawite hawl khia-in cina khempeuh a damsak hi. 17Kamsang Isaiah in, “Amah in eiteʼ natna teng thuakin, eiteʼ gimna teng pua khia hi,” ci-in a genna thu a tun nadingin hih bang a piang ahi hi.#Isa 53:4
Jesuʼ Nungzui Ahi Dingte
(Luk 9:57-62)
18Jesu in ama kiangah mi tampi tak a hong om lam a theih ciangin a nungzuite kiangah, “Tuili gal khat ah pai ni,” ci-in a gen hi. 19Tua laitakin Thukham hilh siate khat in ama kiangah, “Sia aw, na paina peuhpeuh ah ka hong zui ding hi,” a cih leh 20Jesu in, “Ngiate in lup nading kua nei uh a, vasate in zong giah nading bu nei uh hi. Ahi zongin Mihingʼ Tapa in a luptheih nading mun koi mahah nei lo hi,” ci-in a dawng hi. 21Tua ciangin amah a zui midang khat in, “Topa aw, kei hong ciahsak inla, ka pa hong vuisak masa in,” a cih leh 22Jesu in, “Nangmah in kei hong zui inla, misi bang ahi mite in misite a vui dingun nusiat in,” ci-in a dawng hi.
Jesu in Huihpi Daisak
(Mrk 4:35-41; Luk 8:22-25)
23Gunkuang tungah Jesu a tuan ciangin a nungzuite in zong a zui uh hi. 24Thakhat thu-in huihpi hong nung ahih manin tuihualte in gunkuang tum dekdek a, ahi zongin Jesu a ihmu hi. 25Nungzuite in Jesu va phong uh a, “Topa aw, ka si dektak uh hi; hong hon in,” a va ci uh hi. 26Jesu in, “Bang hangin tua ci lau na hi uh hiam? Na upna uh neu mahmah hi,” a cih khit ciangin tho-in huihpi le tuihualte thu pia a, a dai dide pah hi. 27A nungzuite in lamdang sa mahmah uh a, “Huihpi le tuihualte nangawn in ama thu mang ahih manin hih mipa a bangci mi hi ding ahi hiam?” a ci uh hi.
Gadara khuami Dawiveite Kidamsak
(Mrk 5:1-20; Luk 8:26-39)
28Tuili gal khat, Gadara gam a tun ciangin han panin dawivei mi nih hong pai khia-in Jesu a na dawn uh hi. Tua mi nihte kihtakhuai mahmah ahih manin amaute omna lam tawnin kuamah pai ngam lo uh hi. 29Amaute nakpi takin hong kiko uh a, “Pasianʼ Tapa aw, kote bang hong nuammawh na hi hiam? A hun tung nai lopi-in kote gim a pia dingin hong pai na hi hiam?” a ci uh hi. 30Tua laitakin tua san panin a gamla lo mun khat ah vok honpi gamta-in a om hi. 31Tua ciangin dawite in Jesu kiangah, “Kote hong hawl khia ding na hih leh hua vokte sungah hong lutsak in,” ci-in a thum uh ciangin 32Jesu in, “Pai un,” ci ahih manin amaute zong pai khia-in vokte sungah a lut uh hi. Tua vok honte, keen luvum panin tuak suk gawpin tuili sung tu uh ahih manin a vekpi-in tui kia-in a si khin hi. 33Tua vokcingte zong tai-in khua sung tuh uh a, tua dawivei miteʼ thu le a thupiang khempeuh a gen uh hi. 34Tua ciangin khua sung mi khempeuh, Jesu kiangah hong pai-in amah a muh uh ciangin, amau gam panin a paikhiat nadingin a thum uh hi.
Currently Selected:
MATTHAI 8: TBR17
Highlight
Copy
Compare
Share
Want to have your highlights saved across all your devices? Sign up or sign in
Tedim Bible © Bible Society of Myanmar, 2017.
