MATTHAI 28
28
Thawhkikna
(Mrk 16:1-8; Luk 24:1-12; Joh 20:1-10)
1Sabbath ni khit, Nipi ni zingsang khua hong vak kuan ciangin Magdala khuami Mary le a dang Mary, daihawh dingin a va pai uh hi. 2Thakhatin zin nakpi takin hong liing hi. Topaʼ vantungmi khat, vantung panin hong pai suk a, han hukna suang a likkhiat khit ciangin a tungah a tu hi. 3Ama mel, khuaphialep tawh kibang a, a puan zong vuk bangin a pak hi. 4Han cingte in kihta lua uh ahih manin liingin a sibup uh hi.
5Ahi zongin tua vantungmi in numeite kiangah, “Lau kei un. Singlamteh tungah a kithat Jesu a zong na hih lam uh ka thei hi. 6Hih lai ah amah om nawn lo hi. A gen sa bangin thokik khinta hi. Hong pai unla, amah a kisialna mun hong en un. 7Tu-in manlang takin va ciah unla, a nungzuite kiangah, ‘Sihna panin Jesu kithosak khin a, Galilee gam note mai ah a pai ding hi. Tua lai ah amah na mu ding uh hi,’ ci-in va gen un. Hih kong gen thute hoihtakin ciamteh un,” a ci hi. 8Tua ahih manin numeite zong laukawm, nuamkawmin nungzuite kiangah hih thu a ko dingin a tai pah uh hi. 9Jesu in lampi ah tua numeite na dawntuahin, “Lungnuam un!” ci-in a na hopih hi. Numeite in zong Jesu a khe ah lenin a bia uh hi. 10Tua ciangin Jesu in amaute kiangah, “Lau kei un. Pai unla, Galilee gamah ka sanggamte a pai nadingin va gen un. Tua lai ah kei hong mu ding uh hi,” a ci hi.
Han Cingteʼ Thu Zaksakna
11Tua bangin numeite a pai laitakin han a cing galkapte pawl khat khua sungah hong ciah uh a, siampi liante kiangah a thupiang khempeuh a ko uh hi. 12Siampi liante in upate tawh thu kikupna khat nei-in vai a hawm khit uh ciangin sum tampi tawh galkapte golhguk uh a, 13“Mite kiangah, ‘A nungzuite, zanin ka ihmut kalun hong pai-in a luang a gu khia uh hi,’ ci-in gen un. 14Gam ukpa Pilat in hih thu a zak ciangin ama lungkim zawh nading dongin ka na genpih ding uh a, note adingin bangmah lunghihmawhna om lo ding hi,” a ci uh hi. 15Tua ahih manin galkapte in a sum sang uh a, a kisawl bangin a gamta uh hi. Tua ahih manin tu ni dongin Jew mite lakah tu-a bangin hih thu a kigengen lai ahi hi.
Jesu in Sawm le khatte Sawl
(Mrk 16:14-18; Luk 24:36-49; Joh 20:19-23; Sawl 1:6-8)
16Nungzui sawm le khatte zong, Jesu in a gen sa bangin Galilee gam a mual tungah a pai uh hi.#Mat 26:32; Mrk 14:28 17Amaute in Jesu a muh uh ciangin bia uh a, ahi zongin pawl khat in um zo taktak lo uh hi. 18Tua ciangin amaute mai ah Jesu hong pai a, “Leitungah ahi a, vantungah ahi zongin vangliatna khempeuh kei tungah hong kipia khinta hi. 19Tua ahih ciangin note pai unla, midang khempeuh, keima nungzui mi suaksakin, Pa min, Tapa min le Kha Siangtho min tawh tui sungah na phum un.#Sawl 1:8 20Tua ciangin note tungah kong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi.
Currently Selected:
MATTHAI 28: TBR17
Highlight
Copy
Compare
Share
Want to have your highlights saved across all your devices? Sign up or sign in
Tedim Bible © Bible Society of Myanmar, 2017.
