MATTHAI 27

Jesu, Pilat Mai ah

(Mrk 15:1; Luk 23:1-2; Joh 18:28-32)

1A zingsang ciangin siampi liante le upate in Jesu a thah nading uh a vaihawm uh hi. 2Sikkhau tawh khihin paipih uh a, tua gam sungteng a uk Pilat mangpa khut sungah a ap uh hi.

Judas A Sihna

(Sawl 1:18-19)

3A lehhek pa Judas in Jesu a si dingin thu a kikhenna a muh ciangin kisikkik ahih manin siampi liante le upate kiangah a ngun peek sawm thumte va paipihkik a, 4“Mawhna a nei lo mipa a si dingin lehhek kha ka hih manin ka mawh hi,” a va ci hi. Ahi zongin amaute in, “Kote tawh bang kisai nawn ding ahi hiam? Nangma tavuan ahi hi,” a na cih san uh hi. 5Tua ciangin amah in biakinn sungah a ngun peekte lawnin paikhia a, a mahmah a gui-awk hi.

6Ahi zongin siampite in tua ngun peekte tawm uh a, “Hih sumte pen mi thah nadingin a kipia sum ahih manin biakinn sumkholna ah koih dingin kilawm lo hi,” a ci uh hi. 7Tua ahih manin amaute a kikup khit uh ciangin khualmi a site a kivui nadingin beelseek paʼ lo a lei uh hi. 8Tua ahih manin tu dongin tua lo pen, “Mi Thahna Lo,” a kici hi.#Sawl 1:18-19

9Tua ahih manin kamsang Jeremiah in, “Israel mite pawl khat in ama man dingin a seh tua ngun peek sawm thum la uh a, 10Topa in kei tungah a hong gen mah bangin, beelseek paʼ lo lei nadingin a pia uh hi,” ci-in a gen kholhna a tung ahi hi.#Zek 11:12-13

Pilat in Jesu Thu Dong

(Mrk 15:2-5; Luk 23:3-5; Joh 18:33-38)

11Tu-in gam ukpa Pilat mai ah Jesu kidingsak ahih manin amah in, “Nang, Jew miteʼ Kumpipa na hi hiam?” ci-in a dot ciangin Jesu in, “Nang zong tua mah nong ci hi,” ci-in a dawng hi. 12Ahi zongin siampi liante le upate in mawhsakna thu a gen hangun Jesu in a dawng kei hi. 13Tua ciangin Pilat in Jesu kiangah, “Amaute in nang a hong mawhsaknate za lo na hi hiam?” a ci hi. 14Ahi zongin Jesu in amah a kimawhsaknate kam khat beek dawng het lo ahih manin Pilat in lamdang a sa mahmah hi.

Jesu a Si dingin Thu Kikhen

(Mrk 15:6-15; Luk 23:13-25; Joh 18:39—19:16)

15Paisan Pawi hun simin Rom gam ukpa in mihonteʼ deih thong kia mi khat a khah a ngeina ahi hi. 16Tua hun laitakin a gilo mahmah Barabbas a kici mi khat thongkia-in a om hi. 17Tua ahih manin mihonte hong kikhop ciangin Pilat in amaute kiangah, “Barabbas le Khris a kici Jesu, koi zaw ka khah ding deih na hi uh hiam?” ci-in a dong hi. 18Bang hang hiam cih leh Jesu a hazat man bekun ama kiangah a paipih ahihna thu teltakin a thei hi.

19Tua banah, thukhen zumah thusitin a om hunsung mahun, a zi in thu zasak a, “Tu zan ka mang sungin ama hangin nakpi takin gimna thuak ka hih manin, mawhna nei lo tua mipa bangmah cih kha kei in,” a ci hi. 20Barabbas khahin Jesu a thah nadingin Pilat kiangah a nget nadingun siampi liante le upate in mihonte a hanthawn uh hi. 21Tua ciangin Rom gam ukpa in mihonte kiangah, “Hih mi nihte, koi pen ka khah ding deih na hi uh hiam?” ci-in a dot leuleu ciangin amaute in, “Barabbas,” a ci uh hi. 22Tua ciangin Pilat in, “Tua ahihleh Khris a kici Jesu pen bang cih ding ka hi hiam?” a cih ciangin amaute khempeuh in, “Singlamteh tungah thatsak in,” a ci uh hi. 23Tua ciangin amah in, “Amah in bang gamtat khialhna nei ahi hiam?” ci-in a dot ciangin, “Singlamteh tungah thatsak in,” ci-in a awng ngeingai uh hi.

24A gengen hangin bangmah phattuamna om loin buaina piang zaw kha ding, ci-in Pilat in a theih ciangin, tui la-in mihonpiʼ muhin a khut sil a, “Hih mipa a sihna thu ah kei ka kihel kei hi. Note in thei ta un,” a ci hi.#Thkna 21:6-9 25Tua ciangin mi khempeuh in, “Hih mipaʼ sihna hangin gim thuakna, kote a kipanin ka suan ka khakte dongun ka thuak ding uh hi,” ci-in a dawng uh hi. 26Tua ciangin amauteʼ deihna bangin Barabbas khah a, Jesu ahihleh a sat khit ciangin singlamteh tungah thah dingin a pia khia hi.

Galkapte in Jesu Simmawh Bawl

(Mrk 15:16-20; Joh 19:2-3)

27Tua ciangin Pilatʼ galkapte in ama omna kumpi inn ah Jesu paipih uh a, tua lai ah galkap khempeuh a hong kikaikhawm uh hi. 28Tua lai panin Jesuʼ puan suahkhiatsak uh a, puansan khat a silhsak uh hi. 29Kumpi lukhu lim dingin ling vialin a lu ah khusak uh a, a khut tak lamah pumpeeng khat a tawisak uh hi. Tua ciangin ama mai ah khukdin uh a, “Jew miteʼ Kumpipa aw,” ci-in zahpihna tawh a hopih uh hi. 30Tua ciangin cilphih uh a, a pumpeeng tawisak uh la-in a lutang a sat uh hi. 31Tua bangin a simmawh bawl khit uh ciangin a puansan silhsak uh suah khia leuleu-in ama puan mah silhsakkik uh a, singlamteh tungah thah dingin a paikhiatpih uh hi.

Singlamteh tungah Khaina

(Mrk 15:21-32; Luk 23:26-43; Joh 19:17-27)

32Tua bangin a pai laitakun Sairin khuami Simon kici mi khat tawh kituak uh a, amah lammatin Jesuʼ singlamteh a puasak uh hi. 33Lutang guh a cihnopna Golgotha a kici mun a tun uh ciangin, 34zatui kha tawh a kihel leenggahzu a dawn dingin a pia uh hi. Ahi zongin Jesu in a ciap khit ciangin a dawn nuam kei hi.#La 69:21 35Singlamteh tungah Jesu a khai khit uh ciangin a puante kua in a koi ngah ding cih a theih nadingun suang lawnin ai san uh a, a puan teng a hawm uh hi.#La 22:18 36Tua ciangin amaute tu-in Jesu a en uh hi. 37Tua ciangin amah a mawhsakna uh, “Hih pa, Jew miteʼ Kumpi Jesu ahi hi,” cihna lai gelhin ama lutang sanah a suang uh hi. 38Tua ciangin mi that nih, Jesuʼ tak lamah khat, a veilamah khat tawh zong a khai khawm uh hi.

39Tua ciangin amah a va mu kha mi peuhmah in a lu uh peisanin,#La 22:7; 109:25 40“Biakinn susia-in ni thum sungin a lamkik ding pa aw, nang le nang kihon khia in. Pasianʼ Tapa na hih takpi leh singlamteh tung panin hong kum suk in,” ci-in a zahko uh hi.#Mat 26:61; Joh 2:19 41Tua bangmahin siampi liante in Thukham hilh siate le upate tawh zahko-in, 42“Amah in midangte hon khia thei napi-in a mahmah kihon khia thei lo hi. Amah, Israel miteʼ Kumpi ahi hi. Tu-in singlamteh tung panin hong kum suk leh i um ding hi. 43Amah in, ‘Kei, Pasianʼ Tapa ka hi hi,’ ci ahih manin, amah in Pasian muanin a nei hi. Pasian in a hot nop leh tu-in hon khia tahen,” a ci uh hi.#La 22:8 44Tua mah bangin amah tawh a kikhai khawm mi thatte in zong a zahko uh hi.

Jesuʼ Sihna

(Mrk 15:33-41; Luk 23:44-49; Joh 19:28-30)

45Sun nai sawm le nih hun a kipanin nitak nai thum dong, nai thum sung, tua gam sung khempeuh ah khim a zing hi. 46Nitak nai thum hun pawl laitakin Jesu nakpi takin kiko a, “Ka Pasian, ka Pasian, bang hangin kei hong nusia na hi hiam?” a cihna ahi, “Eloi, Eloi, lama sabakthani,” a ci hi.#La 22:1 47A gei ah a om a pauna a za mite pawl khat in, “Hih mipa in Elijah a sam ahi hi,” a ci uh hi. 48Tua ciangin amaute khat va tai-in tuihupna la-in leenggah-zuhau sungah a diah khit ciangin pumpeeng dawnah henin Jesuʼ hup dingin a tah to hi.#La 69:21 49Ahi zongin a dangte in, “Khawl dih un; amah a hon khia dingin Elijah hong pai hiam ngak dih ni,” a ci uh hi. 50Tua ciangin Jesu nakpi takin kiko kikin a si ta hi.

51Tua laitakin biakinn sung deina puan, a lu panin a taw dongin kikekin phel nih a suak hi. Zin zong liingin suangtumpite kitam hi.#Pai 26:31-33 52Hankhukte zong kihong a, Pasianʼ mi a si sa tampite zong kithokiksak hi. 53Han khuk panin amaute paikhia uh a, sihna panin Jesu a thawhkik khit ciangin, amaute zong khuapi siangtho sungah hong lut uh a, mi tampi in a mu uh hi. 54Jesu enin a om galkap bupa le galkapte in zinlinna le a thupiangte a muh uh ciangin lamdang sa mahmah uh a, “Hih pa, Pasianʼ Tapa taktak mah ahi hi,” a ci uh hi.

55Galilee gam panin Jesu hong zui-in amah a huh, a gal et numei tampi zong a om hi. 56Tua numeite lakah Magdala khuami Mary, James le Josefʼ nu Mary le James le Johanʼ nu ahi, Zebediʼ zi, a kihel uh ahi hi.#Luk 8:2-3

Jesu A Kivuina

(Mrk 15:42-47; Luk 23:50-56; Joh 19:38-42)

57A nitak ciangin Arimathea khuami, Jesu thu a um, mihau ahi Josef a kici mi khat, 58Pilat kiangah va pai-in Jesuʼ luang a va ngen hi. Pilat in Josefʼ ngetna bangin Jesuʼ luang a kipiak nadingin thu a pia hi. 59Josef in zong Jesuʼ luang la-in, dial puan thak tawh a tun khit ciangin, 60suang a kikhuak thak ahi ama hankhuk sungah a vui hi. Tua ciangin suangtum lianpi khat hualin a han kongvang hucipin a ciah hi. 61Magdala khuami Mary le a dang Mary zong a hankhuk mai ngatin a tu uh hi.

Han Cingte

62A zing ciang, Sabbath ni-in Pilat kiangah siampi liante le Farisi mite hong pai uh a, 63“Topa aw, hih mi khem pa in a nuntak lai-in, ‘Ni thum khit ciangin ka hingkik ding hi,’ ci-in a thugenna ka thei uh hi.#Mat 16:21; 17:23; 20:19; Mrk 8:31; 9:31; 10:33-34; Luk 9:22; 18:31-33 64Tua ahih ciangin ni thum sung a han hoihtakin a kicin nadingin thu pia in. Tua hikeileh a nungzuite in a luanghawm gu khia-in mite kiangah, ‘Sihna panin hingkik khin hi,’ ci kha ding uh ahih manin a mi khem masakna uh sangin a khem nunungna uh hong husia zaw lai kha ding hi,” a ci uh hi. 65Pilat in amaute kiangah, “Galkapte cingsak unla, a muanhuai theithei dingin na siam bangun hih un,” a ci hi. 66Tua ahih ciangin amaute pai uh a, a han hukna suang limtakin a ciamteh khit uh ciangin galkapte a cingsak uh hi.

Currently Selected:

MATTHAI 27: TBR17

Highlight

Copy

Compare